Read Central Malay LUKAS 20 Bible Online

LUKAS 20 - Central Malay bible

LUKAS 20

¹Adau saghi Yesus dang ngajagh jemau banyak di Ghuma Allah ngan ngiciakka ceritau iluak, imam-imam bepangkat tinggi, guru-guru ukum Taurat ngan tuau-tuau jemau Yahudi datang ke situ.

²Ughangtu bekatau ngan Yesus, “Cubau kiciakka ngan kami, pakai kuasau apau Kaba ngerjauka gegalaunyautu? Mangku sapau ngajung Kaba?”

³Yesus bekatau, “Aku pulau endak betanyau ngan kapu dighi. Cubau kiciakka ngan Aku,

⁴baptisan Yuhanis itu asalau jak di sergau apu jak di manusiau?”

⁵Ughangtu mulai buijau, “Amun kitau kiciakka, ‘Asalau jak di Allah’, Diau ka bekatau, ‘Ngapau kapu dighi nidau percayau ngan diau?’

⁶Anyautu amun kitau kiciakka, ‘Asalau jak di manusiau,’ gegalau jemau ka nyipati kitau ngan batu, karnau ughangtu percayau, bansau Yuhanistu sughang nabi.”

⁷Mangku ughangtu nimbal, “Kami endiak keruan.”

⁸Mangku Yesus bekatau ngan ughangtu, “Amun luak itu, Aku enggup pulau ngiciakka ngan kapu dighi ngan kuasau sapau Aku ngerjauka gegalaunyau ini.”

⁹Yesus ngiciakka cuntau ceritau ini ngan jemau banyak, “Adau sughang diau mbukak kebun anggur. Udim dibukak, diparauka ngan bebeghapau jemau parauan. Mangku diau pegi ke nenggeri lain. Diau lamau mendam di situ.

¹⁰La pangkaunyau, jemau ngempu kebun tadi ngajung sughang anak-buahau pegi njenguak jemau parauan tadi endak mintak bagian asil kebunau. Anyautu jemau parauantu mbaduki anak-buahau tadi, diajung baliak nidau bepulian.

¹¹Mangku jemau ngempu kebuntu ngajung sughang anak-buahau diau lain. Anyautu anak-buahautu dibaduki pulau, digelakka ughangtu, mangku diajung baliak nidau bepulian.

¹²Udim itu diajungau anak-buahau diau ketigau. Anyautu anak-buahautu dilukaui pulau, mangku dicapakka keluagh kebun itu.

¹³Mangku jemau ngempu kebun itu bekatau, ‘Tuapau agi diau kubuat? Aku ka ngajung anakku diau kusayangi. Cengki diautu ka diregaui ughangtu.’

¹⁴Anyautu satu jemau parauan nginak anak jemau ngempu kebuntu, ughangtu buijau sampai bekatau, ‘Diautu ka ngempu kebun ini nanti. Mela kitau mbunua diau, mangku kebun ini njadi kebun kitau.’

¹⁵Ughangtu naghiak diau keluagh kebun, udim itu dibunuau.” Mangku Yesus betanyau, “Tuapau ka dibuat jemau ngempu kebun ngan jemau parauan tadi?

¹⁶Diau ka datang mbunua jemau parauantu, mangku nyeraka kebunau ngan jemau lain.” Ndengagh titu jemau banyak bekatau, “Jangan!”

¹⁷Yesus ngina'i ughangtu ngan bekatau, “Amun luak itu, tuapau retiau katau ini diau ditulis di Injil? ‘Batu diau dicapakka tukang negak ghuma la njadi pelapiak tiang.’

¹⁸Jemau diau tumban di batu itu ka pata, mangku jemau diau ditinggang batu itu ka lulua.”

¹⁹Guru-guru ukum Taurat ngan imam-imam bepangkat tinggi keruan, bansau cuntau ceritau itu ngenaui ughangtu. Itula sebapau ughangtu endak nangkap Yesus masau itu pulau. Anyautu ughangtu takut ngan jemau banyak.

²⁰Guru-guru ukum Taurat ngan imam-imam bepangkat tinggi ngengina'i Yesus. Ughangtu ngajung jemau diau ngerjauka luak kerjau jemau iluak endak betanyau ngan Yesus, supayau Diau sala ngiciak, mangku pacak nyerakaNyau ngan kekuasauan gubernur.

²¹Ughangtu ngiciak luak ini, “Guru, kami keruan ajaghan ngan kici'an Dighi benagh. Dighi nidau milia jemau, tapitu ngajaghka kendak Tuhan ngan benagh.

²²Karnau itu kami endak betanyau ngan Dighi, apu bulia mbayigh cuki ngan Kaisar apu nidau?”

²³Yesus keruan rencanau diau jedit itu, mangku Diau bekatau,

²⁴“Cubau kinakka ngan Aku sutiak tanci pirak. Gambaran ngan tulisan sapau adau di situ?” Ughangtu nimbal, “Gambaran Kaisar.”

²⁵“Amun luak itu,” katau Yesus, “Enjuakkala ngan Kaisar setu diau pantas ngan Kaisar. Mangku enjuakkala ngan Allah setu diau pantas ngan Allah!”

²⁶Mangku ughangtu dikit kia nidau ndapatka katau diau sala di Yesus di mukau jemau banyaktu. Ughangtu kemangan ngan timbalAutu, mangku diam galau.

²⁷Jemau Saduki nidau percayau, bansau jemau mati ka ngulang idup agi. Mangku adau jemau Saduki datang njenguak Yesus ngan betanyau,

²⁸“Pak Guru, Musa nuliska perinta ini batan endak kitau: ‘Amun sughang jemau lanang mati lum adau anak, denga-sana'au mesti nika ngan randaunyau, mangku endak ngadauka jurai batan endak jemau diau la matitu.’

²⁹Na, adau jemau lanang tujua beghading. Diau tuau nika mangku mati, lum adau anak.

³⁰Mangku diau keduau nika ngan randaunyau. Diau mati pulau, nidau bediau anak.

³¹Luak itu pulau diau ketigau enggut diau ketujua mati galau, nidau bediau anak.

³²Udim-udimau tinau itu mati pulau.

³³Luak manau ngan tinau itu masau jemau mati ka diidupka agi? Bini sapau tinautu, karnau ughang tujuatu la nikainyau galau?”

³⁴Yesus nimbal, “Jemau di deniau mbak kini belaki bebini.

³⁵Anyautu jemau diau pantas ngulang idup jak di mati di deniau diau ka datang, diautu nidau ka belaki bebini agi.

³⁶Ughangtu luak malaikat, nidau ka mati agi. Ughangtu anak Allah, karnau la diidupkaNyau agi.

³⁷Musa la ngiciakka, mbak bansau jemau mati ka diidupka agi. Di ceritau belukagh diau maghak itu diau ngiciakka, ‘Tuhanla Allah Abraham, Allah Isak ngan Allah Yakub.’

³⁸Na, Allah ukan Allah jemau mati, anyautu Allah jemau idup, karnau di adapan Allah gegalau jemau idup.”

³⁹Ndengagh luak itu, guru-guru ukum Taurat bekatau, “Timbal kaba nendiau.”

⁴⁰Mangku ughangtu nidau beghani agi nanyaui Yesus.

⁴¹Yesus betanyau ngan ughangtu, “Luak manau dikiciakka, bansau Rajau Penyelamat pengadau Daud?

⁴²Awuak Daud itu la ngiciak dalam kitab Masmur, ‘Allah bekatau ngan TuhanKu, Duduakla di sebela kananKu,

⁴³enggut Aku mbuat musua Kaba tunduak ngan nyemba Kaba.’

⁴⁴Daud ngiciakka Rajau Penyelamat itu Tuhan, manau ka adau Diau pengadau Daud?”

⁴⁵Penarau jemau banyak ndengagh Yesus ngiciak ngan anak-buaHau, Diau bekatau,

⁴⁶“Sepepadaula ngan guru-guru ukum Taurat diau galak bejalan pakai baju lambing endak diregaui di pekan. Ughangtu galak duduak di mukau sekali di ghuma sembayang ngan di bada jemau njamu.

⁴⁷Ughangtu nipuka randau-randau ngan ngambiak ghumahau, mangku mbunika peremba'autu ngan bedu'a panjang-panjang. Beghatla ukuman ughangtu nanti sangkan jemau lain.”