Read Central Malay LUKAS 22 Bible Online

LUKAS 22 - Central Malay bible

LUKAS 22

¹Aghi rerayau Ruti Nidau Beghagi diau dikiciakka Paska la pasigh.

²Imam-imam bepangkat tinggi ngan guru-guru ukum Taurat dang ndalak jalan endak mbunua Yesus carau diam-diam, karnau ughangtu takut ngan jemau banyak.

³Mangku Iblis la nguasaui Yudas diau pulau dikiciakka Iskariut. Diautu sughang jak di duau belas anak-bua Yesus.

⁴Mangku Yudas pegi buijau ngan imam-imam bepangkat tinggi ngan kepalak penjagau Ghuma Allah, luak manau diau pacak nyeraka Yesus ngan ughangtu.

⁵Ughangtu injiak nian, mangku bejanji endak ngenjuakka tanci ngan diau.

⁶Yudas tetuju, mangku mulai ndalak jalan endak nyeraka Yesus ngan ughangtu, nidau dikina'i jemau banyak.

⁷Mangku la sampai aghi rerayau Ruti Nidau Beghagi, aghi endak nyembelia bebiri batan endak makan Paska.

⁸Mangku Yesus ngajung Pitrus ngan Yuhanis, katauNyau, “Pegila, sediaukala jamuan Paska batan endak kitau.”

⁹Katau ughang duautu, “Di manau Dighi endak kami nyediaukanyau?”

¹⁰Yesus nimbal, “Amun kamu masuak ke kuta, kamu ka betemu ngan jemau lanang mbatak ayiak seguci. Ngikutla diau ke ghuma diau dimasu'inyau,

¹¹mangku kiciakkala ngan jemau ngempu ghumatu, ‘Guru betanyau, di manau badahau batan endak Aku makan jamuan Paska ngan anak-buaKu?’

¹²Mangku jemau ngempu ghumatu ka nunjuakka ngan kamu bada umbang di atas lagi la genap ngan dandanan. Sediaukala di situ.”

¹³Mangku pegi ughang duautu, ditemuinyau gegalaunyau luak dikiciakka Yesus, mangku disediaukanyau jamuan Paska.

¹⁴La masaunyau endak makan jamuan Paska itu, Yesus duduak makan serempak ngan rasul-rasul.

¹⁵Mangku Yesus ngiciak ngan ughangtu, katauNyau, “Aku endak nian makan makanan Paska ini serempak ngan kamu, antak ka Aku sengsarau.

¹⁶Percayaula: Aku nidau ka makanau agi, enggut reti jamuan ini dinyatauka di sergau.”

¹⁷Udim itu Yesus ngambiak mangkuak besak, bedu'a beterimau-kasia mangku bekatau, “Ambiakla, gilirkala ngan kamu.

¹⁸Keruanila, mulai mbak kini Aku nidau ka minum anggur ini agi, enggut Allah merinta.”

¹⁹Udim itu Yesus ngambiak ruti, bedu'a beterimau-kasia, dipiya'Au rutitu, dienjuakkaNyau ngan ughangtu sampai bekatau, “Inila badanKu diau dienjuakka batan endak kamu. Kerjaukala ini batan endak meghingati Aku.”

²⁰Luak itu pulau udim makan dienjuakkaNyau mangkuak anggur ngan bekatau, “Mangkuak ini umpamau pejanjian Allah diau empai diau diteguaka ngan daghaKu diau melilia batan endak kamu.

²¹Tapitu kina'ila! Jemau diau njualka Aku duduak makan di sini serempak ngan Aku.

²²Nyela, Anak Manusiau ka mati nendiau, luak diau la ditetapka Allah. Anyautu celakaula jemau diau njualkaNyau!”

²³Mangku ughangtu mulai betanyau-tanyau sughang ngan diau lain, sapau jak di ughangtu diau ka ngerjauka titu.

²⁴Mangku anak-bua Yesus bebala mbalaka sapau jak di ughangtu pacak dikiciakka penting sekali.

²⁵Yesus bekatau ngan ughangtu, “Rajau bangsau diau nidau takut ngan Allah nyaraui masarakatau, penguasaunyau endak dikiciakka ‘penulung jemau’.

²⁶Kamu jangan luak itu. Anyautu jemau diau penting sekali jak di kamu mesti njadi luak jemau diau mudau sekali, mangku pengulu mesti njadi luak anak-bua.

²⁷Sapau diau lebia penting? Apu diau duduak makan, apu diau nepiakkanyau? Cengki jemau diau duduak makan. Anyautu Aku adau di guak kamu luak sughang budak.

²⁸Dalam gegalau sengsarauKu kamutu maju guak Aku.

²⁹Bapak la ngenjuakka ngan Aku kuasau endak merinta. Luak itu pulau Akuni ka ngenjuakka kuasau itu ngan kamu,

³⁰mangku kamu ka minum-makan serempak ngan Aku, amun Aku la njadi rajau. Mangku kamu ka duduak di kerusi rajau ngadili duau belas bangsau jemau Israil.

³¹Simun, Simun, dengaghkala. Iblis la diajung nguji kamu, luak padi ditampi.

³²Anyautu Aku la bedu'a batan endak kaba, supayau kaba jangan ninggalka Aku. Mangku amun kaba la ngulang ngikut Aku, kaba mesti nguatka kantin-kantin kaba.”

³³Pitrus nimbal, “Tuhan, aku sukau masuak jil lagi mati serempak ngan Dighi.”

³⁴“Percayaula, Pitrus,” katau Yesus, “Malam ini antak ka ayam bekukuak, kaba la tigau kali ngiciakka nidau keruan Aku.”

³⁵Udim itu Yesus ngiciak ngan anak-buaHau, katauNyau, “Senitu, masau Aku ngajung kamu pegi nidau mbatak dumpit, unjut ngan terumpa, tuapau kamu kurangan?” “Nidau!” katau ughangtu.

³⁶“Mbak kini,” katau Yesus, “Amun adau unjut, batakla, pedang pulau. Amun nidau bediau, jualkala baju mangku beli pedang.

³⁷Percayaula, katau Injil ini mesti digenapi, ‘Diau dikiciakka jemau ja'at’, karnau katau Injil ceritau Aku dang digenapi.”

³⁸“Tuhan,” katau anak-buaHau, “Ini duau bila pedang.” “Udimla.” katau Yesus.

³⁹Udim itu Yesus pegi jak di kuta, mangku luak idang malam Diau pegi ke Bukit Saitun. Anak-buaHau pegi pulau ngan Diau.

⁴⁰La sampai di situ, Yesus bekatau ngan ughangtu, “Bedu'ala, mangku kamu jangan bedusau, amun dicubaui.”

⁴¹Diau pegi sughang njawua dikit jak di anak-buaHau, kekirau sejawua batu digutukka, mangku Diau nunduak ngan bedu'a, katauNyau,

⁴²“Bak, amun pacak, jawuakala sengsarau itu jak di Aku. Anyautu jangan nurut kendakKu, tapitu kendak Dighi ajau.”

⁴³Mangku sughang malaikat datang jak di sergau nguatka Diau.

⁴⁴Yesus penakut nian, mangku tamba bedu'a nian. Pelua luak dagha titi'an ke tana.

⁴⁵La udim bedu'a Diau ngulang guak anak-buaHau, ditemuiNyau ughangtu dang tiduak, karnau madak ngan sial nian.

⁴⁶Mangku Yesus ngiciak ngan ughangtu, katauNyau, “Ngapau kamu tiduak? Bangunla, bedu'ala, supayau kamu jangan bedusau, amun dicubaui.”

⁴⁷Penarau Yesus gi ngiciak, adau serumbungan jemau datang. Ughangtu dibata'i Yudas, sughang jak di anak-bua Yesus. Yudastu masighi Yesus endak nciumAu.

⁴⁸Yesus bekatau, “Ui, Yudas, apu ngan ciuman ini kaba endak nyeraka Anak Manusiau?”

⁴⁹Satu anak-buaHau diau serempak ngan Yesus nginak, tuapau diau ka tejadi, ughangtu bekatau, “Tuhan, kami kapak ajau ngan pedang?”

⁵⁰Mangku sughang jak di ughangtu ngapak anak-bua Imam Besak ngan pedang, mangku putus telingau kananau.

⁵¹Anyautu Yesus bekatau, “Udimla.” Mangku Diau ngecakka telingau tadi, dighadukaNyau.

⁵²Udim itu Yesus ngiciak ngan imam-imam bepangkat tinggi, kepalak penjagau Ghuma Allah ngan tuau-tuau jemau Yahudi diau la datang ke situ endak nangkap Yesus, katauNyau, “Apu Akuni jemau ja'at, mangku kapu dighi datang mbatak pedang, mbatak pemaduk endak nangkap Aku?

⁵³Idang aghi Aku adau guak kapu dighi di Ghuma Allah. Kapu dighi nidau nangkap Aku. Na, mbak kini masaunyau kapu dighi pacak ngerjaukanyau, masau iblis bekuasau.”

⁵⁴Mangku Yesus ditangkap, dibata'i ke ghuma imam besak. Pitrus ngikut jak di jawua.

⁵⁵Di tengalaman jemau maghakka api, bediang ngelilingi apitu. Mangku Pitrus pegi bediang pulau di situ.

⁵⁶Adau sughang budak tinau diau ngina'i Pitrus duduak di guak apitu. Tinautu ngengina'i Pitrus mangku bekatau, “Jemau ini pulau tadi serempak ngan Yesus.”

⁵⁷Pitrus nidau ngaku'iNyau, kataunyau, “Ukan, aku endiak keruan Jemau itu.”

⁵⁸Lum lamau udim itu, adau jemau lain nginak Pitrus ngan bekatau, “Kaba pulau sughang jak di ughangtu.” Pitrus nimbal, “Ukan, ukan aku!”

⁵⁹Kekirau sepenanak udim itu, adau jemau lain agi bekatau rengak, “Nyela nian, jemau ini pulau anak-bua Yesus, karnau diau jemau Galilia pulau.”

⁶⁰Anyautu Pitrus nimbal, “Aku endiak terti kici'an dighi.” Masau itu pulau, penarau Pitrus gi ngiciak, ayam bekukuak.

⁶¹Tuhan nulia ngina'i Pitrus. Mangku diau teghingat kici'an Tuhan tadi, “Antak ka ayam bekukuak malam ini, kaba la tigau kali nidau ngaku'i Aku.”

⁶²Mangku Pitrus ngeluagh jak di situ ngan nangis sesedanan.

⁶³Jemau diau njagaui Yesus musiakkaNyau ngan mbadukiNyau.

⁶⁴Ughangtu nukup matauNyau ngan betanyau, “Ui, Nabi, cubau kiciakka, sapau mbaduki kaba?”

⁶⁵Banyak agi kici'an ughangtu nggelakka Diau.

⁶⁶Aghitu la siang, tuau-tuau jemau Yahudi ngan imam-imam bepangkat tinggi ngan guru-guru ukum Taurat betunggal, mangku Yesus dibata'i ngadap pengadilan agamau.

⁶⁷Katau ughangtu, “Amun kaba Mesias, Rajau Penyelamattu, kiciakkala ngan kami!” Yesus nimbal, “Amun Aku ngiciakkanyau, kapu dighi nidau ka percayau.

⁶⁸Amun Aku betanyau, kapu dighi nidau nimbal.

⁶⁹Mulai mbak kini Anak Manusiau ka duduak di sebela kanan Allah diau Mahakuasau.”

⁷⁰Ughangtu bekatau galau, “Amun luak itu, Kabani Anak Allah?” Yesus nimbal, “Nyela, kapu dighi nian la ngiciakkanyau. Akuni Anak Allah.”

⁷¹Mangku katau ughangtu, “Nidau nanti dikiciakka jemau lain agi. Kitau la ndengagh Diau inila ngiciakkanyau.”