Read Central Malay LUKAS 23 Bible Online

LUKAS 23 - Central Malay bible

LUKAS 23

¹Udim itu gegalau pengadilan itu betegak mbatak Yesus ngadap Pilatus.

²Di situ ughangtu mulai mburuakka Diau. Ughangtu bekatau, “Jemau ini nyesatka bangsau kami, nidau ngajung mbayighi cuki ngan Kaisar, ngan ngiciakka diriAu Keristus, sughang Rajau.”

³Mangku Pilatus nanyaui Yesus, “Nyela, Kaba rajau jemau Yahudi?” Yesus nimbal, “Au, luak katau dighitu.”

⁴Mangku Pilatus ngiciak ngan imam-imam bepangkat tinggi ngan gegalau jemau banyak di situ, kataunyau, “Aku nidau nemuka sutiak kia sala di Jemau ini.”

⁵Anyautu ughangtu tamba nyalakaNyau, kataunyau, “Ngan ajaghanNyau Diautu ngacauka jemau di gegalau Yudia. Empai penembai di Galilia, mbak kini la sampai pulau di sini.”

⁶Ndengagh titu, Pilatus betanyau, “Apu Jemau ini jemau Galilia?”

⁷La udim dikiciakka, bansau Yesus asalau jak di Galilia, daira diau dikuasaui rajau Herudis, diau ngajung Yesus ngadap Herudis. Masau itu diau di Yerusalim pulau.

⁸Herudis riang nian nginak Yesus, karnau la lamau diau ndengagh ceritau Yesus, mangku endak ngina'Au, lagi ngaghapka pacak nginak Yesus mbuat tandau nyelia.

⁹Diau banyak betanyau ngan Yesus, anyautu sepata katau kia Yesus nidau nimbal.

¹⁰Imam-imam bepangkat tinggi ngan guru-guru ukum Taurat adau pulau di situ, maju mburuakkaNyau nian.

¹¹Herudis ngan tenterahau musiakka, nggelakka Yesus ngan nyurumiNyau ngan baju rajau. Udim itu Herudis ngajung Diau ngulang ngadap Pilatus.

¹²Mangku aghi itu pulau Herudis ngan Pilatus njadi sekantin, sebelumau ughang duautu bemusuan.

¹³Udim itu Pilatus nunggalka imam-imam bepangkat tinggi, pengulu-pengulu ngan masarakat,

¹⁴mangku bekatau ngan ughangtu, “Kapu dighi mbatak Jemau ini njenguak aku ngan ngiciakka, bansau Diauni nyesatka jemau banyak. Kapu dighi la nginak aku merisauNyau, mangku buru'an kapu dighi diau nyalaka Diau dikit kia nidau kudapati di Diau.

¹⁵Luak itu pulau Herudis, karnau diau la ngajung Jemau ini ngulang njenguak kami. Ngenian, Jemau ini nidau ngerjauka dikit kia diau pantas diukum mati.

¹⁶Itula sebapau aku ka ngajung Diau dibaduki, mangku dibibaska.” [

¹⁷Idang taun masau aghi rerayau Paska Pilatus mesti mbibaska sughang kawalan nurut kendak masarakat.]

¹⁸Anyautu gegalau jemau tegauk, kataunyau, “Bunuala Diau. Bibaskala Barabas batan endak kami!”

¹⁹Barabastu dikawalka, karnau kekacauan di kuta melawan pemerinta ngan pembunuan.

²⁰Pilatus endak mbibaska Yesus, mangku diau ngulang ngiciak bebias ngan ughangtu.

²¹Anyautu ughangtu tegauk, kataunyau, “Pakuka Diau di kayu salip! Pakukala Diau!”

²²Ketigau kaliau Pilatus bekatau ngan ughangtu, “Tuapau salaHau Jemau ini? Nidau dikit kia salaHau kudapatka di Diau diau pantas diukum mati. Aku ka mbaduki Diau mangku dibibaska.”

²³Anyautu ughangtu maju tegauk sekuat tenaga mintak Yesus dipakuka di kayu salip. Ughangtu menang, karnau suarau bias.

²⁴Mangku Yesus diukum mati nurut kendak jemau banyaktu.

²⁵Mangku jemau diau ughangtu pintak dibibaska, jemau diau dikawalka karnau kekacauan ngan pembunuan tadi. Udim itu Yesus diserakanyau endak dibuati sekendak ughangtu.

²⁶Mangku Yesus dibatak ughangtu. Di tenga jalan ughangtu betemu ngan Simun jemau Kirini. Diau empai endak masuak kuta, mangku dipasau mikul salip itu ngikutka Yesus.

²⁷Banyak jemau ngikut bejalan ngan Yesus. Adau pulau tinau diau nangis berandaian nangisi Yesus.

²⁸Yesus nulia ughangtu ngan bekatau, “Ui, tinau-tinau Yerusalim, jangan nangisi Aku. Tangisila diri kapu dighi ngan anak-anak kapu dighi.

²⁹Keruanila, ka sampai masaunyau, jemau ka bekatau, ‘Alaka untungau tinau diau endiak bediau anak ngan nidau kekela melahirka ngan nidau kekela minumi ana'au.’

³⁰Mangku jemau ka mulai bekatau ngan gunung-gunung, ‘Tinggangla kami!’ ngan bukit-bukit, ‘Timbusila kami!’

³¹Amun kayu diau gi idup jemau la mbuati luak ini, tuapau pulau ka dibuat ughangtu ngan kayu mati?”

³²Adau pulau duau ughang lain. Ughang duautu bandit. Diau dibata'i endak diukum mati serempak ngan Yesus.

³³Ughangtu la sampai di bada diau dikiciakka Kerungkang Palak. Di situ Yesus dipakuka di kayu salip ngan duau ughang bandit tadi, diau sughang di sebela kananAu, diau sughang di sebela kidauNyau.

³⁴Yesus bekatau, “Bapak, ampunila ughangni, karnau ughangni nidau keruan tuapau diau dikerjaukanyautu.” Baju Yesus diagiaka ughangtu ngan disuntinkanyau.

³⁵Jemau banyak betegak di situ sampai nginak gegalaunyautu. Tuau-tuau jemau Yahudi nggelakka Yesus ngan bekatau, “Jemau lain diselamatkaNyau. Cubaula mbak kini Diau nyelamatka diriAu, amun Diau ngenian Mesias, Rajau Penyelamat, diau dipilia Allahtu.”

³⁶Tentera-tentera pulau nggelakka Diau. Ughangtu ngenjuakka anggur masam ngan Diau

³⁷ngan bekatau, “Amun Kaba rajau jemau Yahudi, selamatkala nyawau Kaba!”

³⁸Di pucuak kayu salip Yesus adau dituliska luak ini, “Inila rajau jemau Yahudi.”

³⁹Sughang jak di bandit diau disalipkatu nggelakka Yesus pulau, kataunyau, “Kaba Rajau Penyelamat. Selamatkala Kaba ngan kami pulau!”

⁴⁰Bandit diau sughangtu nengul kantinau, kataunyau, “Apu kaba endiak takut ngan Allah? Kaba semegi diukum mati ngan Diau.

⁴¹Nyela, kitau ughang duauni pantas diukum sesuai ngan perembak kitau. Anyautu Diauni dikit kia nidau besala.”

⁴²Mangku diau bekatau ngan Yesus, “Yesus, ingatkala aku, amun Dighi datang njadi Rajau.”

⁴³“Percayaula,” katau Yesus, “Saghini kaba ka adau ngan Aku di sergau.”

⁴⁴Kekirau tengaghi daira itu keleman galau selamau tigau jam,

⁴⁵karnau matau-aghi nidau besinagh. Tabir di Ghuma Allah caghiak bela duau.

⁴⁶Mangku Yesus tegauk, katauNyau, “Bak, Aku nyeraka nyawauKu ngan Dighi.” Udim ngiciak luak itu, nyawauNyau putus.

⁴⁷Kumandan tentera nginak gegalau diau tejadi, mangku ngagungka Allah ngan bekatau, “Nyela nian, Diauni jemau benagh.”

⁴⁸Jemau banyak diau datang ke situ endak nginak tuapau diau tejadi tadi, baliak galau ngan peghasauan nyesal.

⁴⁹Gegalau kantin Yesus, temasuak jemau tinau diau ngikut Diau jak di Galilia, betegak jak di jawua nginak gegalaunyautu.

⁵⁰Adau sughang diau benamau Yusup, asalau jak di Arimatia di daira Yudia. Diautu jemau iluak ngan diregaui jemau. Diau pulau nantika masaunyau Allah mulai merinta njadi rajau. Empuak diau temasuak rumbungan pengadilan agamau, diau nidau tetuju ngan rencanau ngan keputusan pengadilan itu.

⁵¹

⁵²Yusuptu pegi ngadap Pilatus mintak mayat Yesus.

⁵³Mangku diau nughunka mayat Yesustu jak di kayu salip, dibalutau ngan kain putia. Udim itu ditepiakkanyau dalam kuburan diau dibuat dalam bukit batu. Kuburan itu lum kekela dipakai.

⁵⁴Aghitu aghi Jumat, aghi bedandan, ngan aghi Sabat laka mulai.

⁵⁵Tinau-tinau diau datang serempak ngan Yesus jak di Galilia ngikut Yusup nginak kuburannyautu. Tinautu nginak pulau, luak manau mayat Yesus ditepiakka dalam kuburan.

⁵⁶Udim itu ughangtu baliak nyediauka rerempahan ngan minyak ghum endak minya'i Yesus. Masau aghi Sabat ughangtu gheghadu endak na'ati ukum Taurat.