Read Central Malay LUKAS 3 Bible Online

LUKAS 3 - Central Malay bible

LUKAS 3

¹Masau Kaisar Tiberius la merinta limau belas taun, Puntius Pilatus la njadi gubernur di Yudia. Masau itu Herudis merinta di daira Galilia. Pilipus, kaka'au, merinta di daira Ituria ngan Terakunitis. Lisanias merinta di Abilini.

²Hanas ngan Kayapas njadi imam besak. Masau itula Yuhanis, anak Sakaria itu, ndengagh kici'an Allah di padang bungin.

³Mangku Yuhanis pegi ngidari sekitar ayiak Yurdan sampai bekatau, “Ubaila perembak ngan dusau-dusau kamu, ngan mintak dibaptis, mangku Allah ka ngabisi dusau kamu.”

⁴Itu la ditulis dalam kitab nabi Yesaya, muniau luak ini, “Adau suarau jemau di padang bungin, ‘Sediaukala jalan batan endak Tuhan. Lughuskala jalan batan endak Diau.

⁵Bilang lembak ka ditimbusi, bilang gunung ngan bukit ka didataghka. Diau beliku-liku ka dilughuska, diau ngelup-ngelup ka didataghka.

⁶Mangku gegalau jemau di deniau ka nginak Allah nyelamatka manusiau!’ ”

⁷Banyak jemau datang mintak dibaptiska, mangku Yuhanis ngiciak ngan ughangtu, kataunyau, “Ui, kamuni jemau ja'at luak ulagh! Sapau ngiciak ngan kamu pacak ngilakka jak di ukuman Allah nanti?

⁸Nyataukala ngan perembak kamu, bansau kamu la ngubai jak di dusau-dusau kamu. Jangan berupuak dalam ati, kamu ka selamat, karnau Abraham bak kamu. Keruanila, jak di batu-batu inila Allah pacak mbuat pengadau Abraham!

⁹Kamuni luak sebatang kayu. Kapak la adau di akaghau, mangku bilang kayu diau nidau ngasilka bua diau iluak ka ditebang, mangku dicapakka dalam api.”

¹⁰“Amun luak itu,” katau jemau banyak itu, “Tuapau diau mesti kami kerjauka?”

¹¹Katau Yuhanis, “Jemau diau adau duau lambagh baju enjuakkala selambagh ngan jemau diau nidau bediau, mangku jemau diau adau makanan enjuakka pulau luak itu.”

¹²Adau pulau tukang tagia cuki datang endak dibaptis. Ughangtu betanyau, “Pak, tuapau diau mesti kami kerjauka?”

¹³Timbalau, “Jangan kamu nagia lebia banyak jak di diau la ditetapka ngan kamu.”

¹⁴Adau pulau tentera diau betanyau ngan diau, “Luak manau ngan kami? Tuapau diau mesti kami kerjauka?” Katau Yuhanis, “Jangan meregangi, jangan nekani ngan buruakka jemau. Cukupka ajau ngan gaji kamu.”

¹⁵Masau itu jemau banyak nantika Rajau Penyelamat, mangku betanyau-tanyau dalam ati, apu Yuhanis diau dinantika itu.

¹⁶Mangku Yuhanis bekiciak ngan ughangtu, kataunyau, “Aku mbaptis kamu ngan ayiak. Nanti ka datang Jemau diau lebia bekuasau jak di aku. Melegha'i tali sepatuAu aku nidau pantas. Jemautu ka mbaptis kamu ngan Rua Allah ngan api.

¹⁷Di tanganAu la adau nighu endak nampi ighi'anNyau, endak nunggalka padiAu dalam tengkiang. Ghumanau ngan ampaunyau ka disilap ngan api diau nidau ka padam.”

¹⁸Ngan carau luak itula Yuhanis ngajagh nian jemau banyak sampai ngiciakka ceritau iluak.

¹⁹Yuhanis pulau negughi rajau Herudis, karnau diau nika ngan Herudias, bunting dangau, ngan gegalau perembak ja'at lainau diau dikerjaukanyau.

²⁰Mangku Herudis tamba ja'at agi ngan masuakka Yuhanis dalam jil.

²¹Masau jemau banyak itu dibaptis, Yesus dibaptis pulau. Diau dang bedu'a, langit tebukak.

²²Mangku Rua Allah tughun luluak burung darau inggap di Diau, mangku adau suarau jak di langit, “Kabanila AnakKu diau Kusayangi. Kaba melemakka atiKu.”

²³Masau Yesus mulai ngajagh, umurAu kekirau tigau pulua taun. Nurut pendapat jemau Yesustu anak Yusup anak Eli,

²⁴anak Matat, anak Liwi, anak Malki, anak Yanai, anak Yusup,

²⁵anak Matica, anak Amus, anak Nahum, anak Hesli, anak Nagai,

²⁶anak Maat, anak Matica, anak Simai, anak Yusik, anak Yuda,

²⁷anak Yuhanan, anak Resa, anak Serubabil, anak Sialtil, anak Neri,

²⁸anak Malki, anak Adi, anak Kusam, anak Elmadam, anak Ir,

²⁹anak Yesua, anak Eliisir, anak Yurim, anak Matat, anak Liwi,

³⁰anak Simiun, anak Yehuda, anak Yusup, anak Yunam, anak Elyakim,

³¹anak Melia, anak Mina, anak Matata, anak Natan, anak Daud,

³²anak Isai, anak Ubid, anak Buas, anak Salmun, anak Nahasun,

³³anak Aminadab, anak Arni, anak Hesrun, anak Peris, anak Yehuda,

³⁴anak Yakub, anak Isak, anak Abraham, anak Tera, anak Nahur,

³⁵anak Serug, anak Rehu, anak Pelig, anak Ibir, anak Salmun,

³⁶anak Kenan, anak Arpaksad, anak Sim, anak Nua, anak Lamik,

³⁷anak Metusala, anak Hinuk, anak Yarid, anak Mahalalil, anak Kenan,

³⁸anak Inus, anak Sit, anak Adam, diau dijadika Allah.