Read Central Malay LUKAS 6 Bible Online

LUKAS 6 - Central Malay bible

LUKAS 6

¹Masau aghi Sabat Yesus lalu di umau. Anak-buaHau ngambiak padi, dipinsalau di tanganau, dimakanau.

²Adau jemau Parisi ngiciak, kataunyau, “Ngapau kamu ngerjauka setu diau nidau bulia dikerjauka aghi Sabat?”

³Mangku Yesus nimbali ughangtu, “Cengki kapu dighi la mbacau setu diau dikerjauka Daud, masau diau ngan anak-buahau lapagh.

⁴Diautu masuak ke dalam Ghuma Allah, ngambiak ruti pesembahan, dimakanau, mangku dienjuakkanyau ngan anak-buahau pulau, awuak ruti itu nidau bulia dimakan, amun ukan imam.”

⁵Mangku Yesus bekatau agi, “Anak Manusiau nguasaui aghi Sabat pulau.”

⁶Aghi Sabat lainau Yesus pegi ngajagh di ghuma sembayang. Di situ adau jemau diau mati tangan kananau.

⁷Guru-guru ukum Taurat ngan jemau Parisi ndalak sala Yesus endak ngadukaNyau, mangku diperatikanyau, apu Diau ka meghadui jemau itu masau aghi Sabat.

⁸Yesus keruan rupu'an ughangtu, mangku ngiciak ngan jemau diau mati sebela tanganau, katauNyau, “Mela, betegak di sini.” Jemautu betegak di situ.

⁹Mangku Yesus ngiciak ngan ughangtu, katauNyau, “Aku betanyau ngan kapu dighi, nurut agamau kitau tuapau diau bulia dikerjauka masau aghi Sabat, kerjau iluak apu kerjau ja'at, nyelamatka jemau apu ncelakaukanyau?”

¹⁰Udim itu Yesus ngina'i ughangtu galau, mangku ngiciak ngan jemau buidapan tadi, katauNyau, “Surungkala tangan kaba!” Jemau itu nyurungkanyau, mangku tanganau ghadu.

¹¹Mangku guru-guru ukum Taurat ngan jemau Parisi tadi mara kematila mulai buijau ka diapauka Yesus.

¹²Masau itu Yesus pegi nayiak bukit endak bedu'a. Di situ Diau bedu'a nyemba Allah semalam getau.

¹³Aghi la siang dipantauNyau anak-buaHau, dipiliHau duau belas jak di ughangtu, diau dikiciakkaNyau pulau rasul.

¹⁴Diau itu Simun diau pulau dinamaukaNyau Pitrus ngan Anderias adingau Simuntu, Yakubus ngan Yuhanis, Pilipus ngan Bartulumius,

¹⁵Matius ngan Tumas, Yakubus anak Alpius, ngan Simun diau dikiciakka jemau Silut,

¹⁶Yudas anak Yakubus, ngan Yudas Iskariut diau itula ka njualka Yesus.

¹⁷Mangku Yesus tughun jak di bukit tadi, diikuti anak-buaHau mangku gheghadu di bada diau datagh. Di situ banyak jak di anak-buaHau ngan banyak jemau lain betunggal ngan Diau. Ughangtu asalau jak di dusun-dusun di Yudia, jak di Yerusalim, jak di daira tepi pantai Tirus ngan Sidun pulau.

¹⁸Ughangtu datang endak ndengaghka Yesus, endak dighadui idapannyau. Jemau diau diarung rua-rua ja'at dighaduiNyau pulau.

¹⁹Gegalau jemau banyaktu ncubau ngecakkaNyau, karnau adau kuasau ngeluagh jak di Diau, mangku gegalau ughangtu dighadukaNyau galau.

²⁰Mangku Yesus ngina'i anak-buaHau ngan bekatau, “Riangla kamu jemau serik, karnau Allah njadi rajau kamu.

²¹Riangla kamu diau lapagh mbak kini, karnau kamu ka dikenyangka. Riangla kamu diau nangis mbak kini, karnau kamu ka tetawau.

²²Riangla kamu, amun kamu diluatka, ditulak, digelakka ngan diburuakka jemau karnau Anak Manusiau.

²³Nabi-nabi timpau senitu pulau la dibuati luak itu. Amun itu tejadi, injiakla kamu sampai nari ngan riang, karnau ngenian upa kamu besak di sergau.

²⁴Tapitu celakaula kamu diau kayau mbak kini, karnau kamu la meghasauka lemak.

²⁵Celakaula kamu diau kenyang mbak kini, karnau kamu ka lapagh. Celakaula kamu diau tetawau mbak kini, karnau kamu ka nangis berandaian.

²⁶Celakaula kamu, amun gegalau jemau muji kamu, karnau luak itu pulau niniak puyang ughangtu muji-muji cak nabi senitu.”

²⁷“Ngan kamu diau ndengaghka Aku, Aku bekatau: Sayangila musua kamu, kerjaukala diau iluak ngan jemau diau luat ngan kamu.

²⁸Mintak selamat batan endak jemau diau ndawaika kamu. Bedu'ala batan endak jemau diau nggelakka kamu.

²⁹Amun jemau nampagh kebual kamu diau sebela, ajung pulau nampagh kebual sebela lagi. Amun jemau ngambiak kain kamu, nengkela diau ngambiak baju kamu pulau.

³⁰Enju'ila bilang jemau diau mintak ngan kamu. Jangan mintak baliakka ngan jemau diau ngambiak barang kamu.

³¹Mangku carau luak manau kamu endak jemau bebuat ngan kamu, luak itula pulau kamu bebuat ngan ughangtu.

³²Amun kamu nyayangi ajau jemau diau sayang ngan kamu, nidau bediau jasa batan endak kamu. Jemau bedusau pulau nyayangi jemau diau sayang ngan ughangtu.

³³Amun kamu iluak ajau ngan jemau diau iluak ngan kamu, nidau bediau jasa batan endak kamu. Jemau bedusau pulau iluak luak itu.

³⁴Mangku amun kamu minjamka ajau tanci ngan jemau diau pacak mbaliakkanyau, nidau bediau jasa batan endak kamu. Jemau bedusau pulau minjamka ngan jemau bedusau, mangku mintak itu dibaliakkanyau.

³⁵Anyautu kamu, sayangila musua kamu, iluakla ngan ughangtu. Pinjamkala ngan jangan ngaghapka dibaliakkanyau. Amun luak itu, upa kamu ka besak, mangku kamu ka njadi anak-anak Allah diau Mahatinggi. Karnau Allah iluak ngan jemau diau nidau tau beterimau-kasia, ngan jemau diau ja'at pulau.

³⁶Semestiau kamu iluak ati, luak Bapak kamu iluak atiAu.”

³⁷“Jangan kamu ngadili jemau, mangku kamu nidau diadili. Jangan kamu ngukum, mangku kamu nidau diukum. Ampunila jemau, mangku kamu diampuni.

³⁸Enjuakkala mangku kamu ka dienju'i. Takaran diau iluak diau la ditakari lenat lagi penua ka dienjuakka ngan kamu. Takaran diau kamu pakai ngan jemau ka dipakai pulau batan endak kamu.”

³⁹Yesus ngiciakka umpamau ini pulau ngan ughangtu, “Apu jemau butau pacak mbata'i jemau butau? Cengki ughang duautu ka telabua masuak siring.

⁴⁰Anak murip nidau lebia jak di guruau. Anyautu amun diau la tamat pelajaghannyau, diau ka semegi ngan guruau.

⁴¹Ngapau kamu nginak kempenan di matau kantin kamu, anyautu baluk di matau kamu nidau kamu keruani?

⁴²Luak manau kamu pacak ngiciak ngan kantin kamu, ‘Ui kaba, nengkela aku ngeluaghka kempenan diau di matau kaba.’, anyautu baluk di matau kamu nidau kamu kina'i? Kamu cak iluak! Keluaghkala kudai baluk jak di matau kamu, mangku pengina'an kamu terang endak ngeluaghka kempenan tadi jak di matau kantin kamu.”

⁴³“Nidau bediau batang kayu diau iluak diau ngasilka bua nidau iluak, ngan pulau nidau bediau batang kayu diau nidau iluak ngasilka bua diau iluak.

⁴⁴Bilang batang kayu dikeruani jak di buahau. Di kayu bedughi nidau bediau bua aghau, di ghumput bedughi nidau bediau bua anggur.

⁴⁵Jemau iluak ngerjauka setu diau iluak, karnau atiau iluak nian. Jemau ja'at ngerjauka setu diau ja'at, karnau atiau ja'at nian. Tuapau diau dikiciakka mulut itula diau keluagh jak di atiau.”

⁴⁶“Ngapau kamu mantau aku, ‘Tuhan, Tuhan!’, anyautu nidau ngerjauka setu diau Kukiciakka ngan kamu?

⁴⁷Ngan sapau pacak kitau samauka jemau diau datang njenguak Aku ngan ndengagh kici'anKu mangku dikerjaukanyau? Mela, Aku nunjuakka ngan kamu.

⁴⁸Jemau itu diumpamauka ngan jemau diau negakka ghuma. Jemautu nggali dedalam, masuakka batu batan pelapiak. Amun ghuma itu ditempur ayiak rawang, nidau ka rubua karnau tegua.

⁴⁹Tapitu jemau diau ndengagh kici'anKu, anyautu nidau dikerjaukanyau, diau diumpamauka jemau diau negakka ghuma nidau bepelapiak. Amun ditempur ayiak rawang, ghuma itu muda rubua, mangku banyak nian rusa'au.”