Read Central Malay LUKAS 7 Bible Online

LUKAS 7 - Central Malay bible

LUKAS 7

¹Udim Yesus ngiciakka ajaghanNyau itu ngan jemau banyak tadi, Diau pegi masuak Kapernaum.

²Di situ adau sughang kepalak tentera Rum diau adau sughang budak belian diau disayanginyau nian. Budak itu dang buidapan laka mati.

³Kepalak tentera tadi ndengagh ceritau Yesus, mangku ngajung pengulu-pengulu jemau Yahudi njenguak Yesus, mintak Diau datang meghadui buda'autu.

⁴Ughangtu datang njenguak Yesus mintak tulung nian,

⁵kataunyau, “Jemau itu pantas Kaba tulung, karnau diau sayang ngan bangsau kitau. Diautu negakka ghuma sembayang batan endak kami.”

⁶Mangku Yesus pegi serempak ngan ughangtu. La pasigh ngan ghumahau, kepalak tenteratu ngajung kantin-kantinau endak ngiciakka ngan Yesus luak ini, “Pak, nidau nanti kekerian, karnau aku nidau pantas nerimau Dighi di ghumaku.

⁷Itu pulau sebapau aku nidau beghani njenguak Dighi. Kiciakka ajau sepata katau, mangku budakkutu ka ghadu.

⁸Aku pulau sughang bawahan, mangku di bawa aku adau pulau tentera-tentera. Amun aku ngajung ngan sughang tentera ‘Pegi!’, mangku diau pegi, ngan sughang agi, ‘Ke sini!’, mangku diau datang, lagi ngan budakku, ‘Kerjaukala ini!’, mangku dikerjaukanyau.”

⁹Ndengagh kici'annyautu, Yesus kemangan nian, mangku Diau nulia ke jemau banyak diau ngikut Diau sampai bekatau, “Ngenian, di guak jemau Israil lum kekela Aku betemu jemau diau percayau nian luak jemau ini.”

¹⁰Jemau diau diajung kepalak tentera tadi la baliak ke ghumahau, ditemuinyau budak itu la ghadu.

¹¹Nidau lamau udim itu Yesus pegi ke kuta Nain. Anak-buaHau pegi serempak ngan Diau ngan pulau jemau banyak bererumbungan.

¹²Yesus la di mukau lawang kuta tadi, adau jemau mati diau dijagang keluagh kuta. Jemau diau matitu anak sughang randau diau gi sikuak itula. Banyak jemau jak di kuta itu ngikutka randau itu.

¹³Satu Tuhan nginak randau itu, Diau sial ngina'au, mangku Diau bekiciak, katauNyau, “Jangan Dighi nangis agi.”

¹⁴Udim itu dipasighiNyau, dikecakkaNyau penjagangautu, mangku jemau diau njagangau mendam. Udim itu Yesus bekatau, “Ui, budak bujang, Aku ngajung kaba bangun, bangunla!”

¹⁵Budak itu bangun, duduak ngan mulai ngiciak, mangku diseraka Yesus ngan endu'au.

¹⁶Gegalau jemau ketakutan galau, mangku muji-muji Allah, kataunyau, “Sughang Nabi besak la datang di guak kitau. Allah la datang nulung umatAu.”

¹⁷Mangku ceritau Yesus dikiciakka di gegalau Yudia ngan di ngepungannyau.

¹⁸Gegalaunyautu dikiciakka anak-buahau ngan Yuhanis,

¹⁹mangku diau ngajung duau ughang jak di anak-buahau njenguak Tuhan ngan betanyau, “Apu Dighi jemau diau ka datangtu? Apu kami mesti nantika jemau lain?”

²⁰Ughang duautu sampai guak Yesus ngan bekatau, “Yuhanis Pembaptis ngajung kami betanyau ngan Dighi, ‘Apu Dighi jemau diau ka datangtu, apu kami mesti nantika jemau lain?’ ”

²¹Masau itu Yesus meghadui banyak jemau buidapan, ngisitka rua-rua ja'at, ngan ngenjuak pengina'an ngan banyak jemau butau.

²²Mangku katau Yesus, “Baliakla, kiciakkala ngan Yuhanis setu diau kamu kinak ngan dengagh: Jemau butau nginak, jemau lumpua bejalan, jemau buidapan ja'at ghadu, jemau tuli ndengagh, jemau mati ngulang idup, ngan ceritau iluak dikiciakka ngan jemau serik.

²³Mangku riangla jemau diau nidau keciwau ngan nidau nulak Aku.”

²⁴Ajungan Yuhanis la pegi, Yesus mulai ngiciakka ceritau Yuhanis ngan jemau banyak itu, katauNyau, “Ngapau kamu pegi ke padang bungin? Apu kamu endak nginak ghumput diau digugak angin? Cengki nidau!

²⁵Ngapau kamu pegi? Endak nginak jemau bebaju alap? Jemau diau bebaju alap ngan idup kayau adau di istana rajau.

²⁶Mangku ngapau kamu pegi? Endak nginak sughang nabi? Nyela, lebia jak di nabi diautu.

²⁷Ceritau Yuhanis la ditulis di Injil: ‘Katau Allah, keruanila Aku ka ngajung ajunganKu ndului Kaba, diau ka mbukak jalan batan endak Kaba.’

²⁸Keruanila, nidau bediau jemau di deniau ini lebia besak jak di Yuhanis, anyautu jemau diau keciak sekali di bada Allah merinta, besakla jemautu sangkan Yuhanis.”

²⁹Gegalau jemau banyak diau ndengagh kici'an Yuhanis senitu ngan tukang tagia cuki pulau ngaku'i Allah itu benagh, mangku mintak dibaptiska.

³⁰Anyautu jemau Parisi ngan guru-guru ukum Taurat nidau nerimau kendak Allah batan endak diau. Ughangtu enggup dibaptiska Yuhanis.

³¹Katau Yesus pulau, “Ngan tuapau jemau mbak kini diumpamauka? Luak manau ughangtu?

³²Ughangtu umpamau budak keciak diau duduak di tengalaman libagh, ngiciak sughang ngan diau lain, ‘Kami nabua kelintang, anyautu kamu enggup nari. Kami berandaian, anyautu kamu enggup nangis.’

³³Yuhanis Pembaptis datang, diau nidau makan ruti ngan nidau minum anggur, mangku kamu kiciakka, ‘Diau diarung iblis.’

³⁴Anak Manusiau datang, Diau minum-makan, mangku kamu kiciakka, ‘Kina'ila, Jemau itu selak, pemabuak, kantin penagia cuki ngan kantin jemau bedusau.’

³⁵Empuak luak itu, kepintaran dibenaghka jemau diau nerimaunyau.”

³⁶Adau sughang jemau Parisi, namaunyau Simun. Diautu mantau Yesus makan di ghumahau. Yesus pegi ke ghumahau mangku makan.

³⁷Di kuta itu adau jemau tinau diau tekenal jemau jedit. Tinau itu ndengagh, bansau Yesus dang makan di ghuma jemau Parisi tadi, mangku diau datang mbatak kacau buisi minyak ghum.

³⁸Diau betegak pasigh keting Yesus ngan nangis sampai mbasuhi ketingAu ngan ayiak mataunyau, digusurinyau ngan gumba'au, mangku diciuminyau ngan diminyak-ghuminyau.

³⁹Jemau Parisi diau ngajak Yesus tadi nginak titu, mangku berupuak, “Amun Jemau ini nabi, cengki Diau keruan sapau jemau tinau itu diau ngecakka ketingAu. Cengki Diau keruan tinautu jemau jedit.”

⁴⁰Mangku Yesus ngiciak ngan diau, “Simun, adau diau endak Kukiciakka ngan kaba.” Timbal Simun, “Kiciakkala, Guru!”

⁴¹Katau Yesus, “Adau jemau diau minjamka tanci. Mangku adau duau ughang diau beghutang ngan jemautu. Diau sughang beghutang limau ratus ribu, diau sughangtu limau pulua ribu.

⁴²Ughang duau itu nidau pacak mbayighi utangau, mangku gegalau utangtu diabiska jemau diau minjamka tanci tadi. Sapau jak di ughang duautu ka sayang nian ngan jemau itu tadi?”

⁴³Katau Simun, “Asauku jemau diau banyak sekali diabiska utangau.” Katau Yesus, “Nyela, pendapat kaba benagh.”

⁴⁴Mangku Yesus ngina'i tinau tadi sampai ngiciak ngan Simun, “Kaba nginak tinau ini? Aku datang ke ghuma kaba, kaba nidau nyediauka ayiak batan endak mbasua ketingKu. Tinau ini mbasuhi ketingKu ngan ayiak mataunyau, digusurinyau ngan gumba'au.

⁴⁵Kaba nidau nyambut Aku ngan ciuman, tinau ini nidau mandak-mandak nciumi ketingKu jak Aku datang ke sini.

⁴⁶Kaba nidau minya'i palakKu, tinau ini minya'i ketingKu ngan minyak ghum.

⁴⁷Keruanila, dusaunyau diau banyak itu la diabiska. Kitau keruan, karnau diau la banyak ngerjauka setu diau iluak. Anyautu jemau diau diabiska dikit dusaunyau, dikit pulau diau ngerjauka setu diau iluak.”

⁴⁸Mangku Diau bekatau ngan tinau tadi, “Dusau kaba la diabiska.”

⁴⁹Mangku jemau lain diau makan serempak ngan Yesus mulai berupuak, “Sapau Diau ini, sampai pacak ngabiska dusau?”

⁵⁰Anyautu Yesus ngiciakka ngan tinau itu, “Kaba diselamatka, karnau kaba percayau. Pegila ngan selamat.”