Read Central Malay LUKAS 8 Bible Online

LUKAS 8 - Central Malay bible

LUKAS 8

¹Nidau lamau udim itu, Yesus pegi ke kuta-kuta ke dusun-dusun ngiciakka ceritau iluak, bansau Allah laka merinta. Duau belas anak-buaHau ngikut serempak ngan Diau.

²Luak itu pulau bebeghapau tinau diau la dighaduka jak di rua ja'at ngan idapan, diautu Maria Magdalina, tujua rua ja'at la dikeluaghka jak di diau,

³Yuhana, bunting Kusa, pegawai Herudis, Susana ngan banyak tinau lain. Tinau itu nulung Yesus ngan anak-buaHau pakai retaunyau sendighi.

⁴Jemau banyak datang bererumbungan jak di dusun-dusun njenguak Yesus. Jemau la banyak betunggal, Yesus nceritauka ngan ughangtu umpamau ini.

⁵“Adau jemau tani diau pegi endak ngamburka benia. Diau dang ngamburka benia, adau diau tumban di jalan. Separau tepijak ngan jemau, separau dimakan burung enggut abis.

⁶Adau pulau benia diau tumban di tana bebatu-batu. Diau la tumbua mangku njadi keghing, karnau nidau buayiak.

⁷Adau pulau benia diau tumban di pugan ghumput bedughi. Ghumputtu tumbua serempak ngan benia itu, mangku diincitkanyau enggut mati.

⁸Adau pulau benia diau tumban di tana iluak, diau tumbua mangku ngasilka bua seratus kali.” Udim nceritauka umpamau itu, Yesus ngiciak agi, “Amun betelingau, ndengaghla!”

⁹Anak-bua Yesus nanyauka ngan Diau, tuapau retiau umpamau tadi.

¹⁰Katau Yesus, “Ngan kamu la dinyatauka resiau ngeruani Allah njadi rajau ngan kekuasauanNyau. Anyautu ngan jemau lain dikiciakka ngan umpamau, mangku ughangtu nginak anyautu nidau kina'an, ughangtu ndengagh anyautu nidau terti.

¹¹Inila retiau umpamau tadi: Benia ibarat kici'an Allah.

¹²Benia diau tumban di jalan ibarat jemau diau ndengagh kici'an itu, anyautu iblis datang merebutinyau jak di atiau, supayau diau jangan percayau ngan jangan diselamatka.

¹³Benia diau tumban di tana bebatu-batu itu ibarat jemau diau ndengagh kici'antu, nerimaunyau ngan riang, anyautu ceritautu nidau mendam di atiau. Ughangtu percayau jerang ajau, mangku amun diuji, diau ngelipat agi.

¹⁴Benia diau tumban di pugan ghumput bedughi ibarat jemau diau ndengagh kici'an itu. Anyautu diau ghegak ngan idupau, endak idup lemak ngan riang ajau di deniau ini. Mangku kici'an Allah nidau pacak mendam di atiau, mangku nidau ngasilka bua diau iluak.

¹⁵Benia diau tumban di tana diau iluak ibarat jemau diau ndengagh ceritau itu, mangku dimasuakkanyau dalam atiau diau iluak. Diautu buasil karnau ta'an uji.”

¹⁶“Amun jemau maghakka lampu, apu ditukupinyau ngan capa, apu ditepiakka di bawa katil? Cengki nidau! Anyautu ditepiakka di bada lampu, mangku jemau diau masuak pacak nginak terangau.

¹⁷Gegalaunyau diau tebuni ka kina'an ngan gegalau resiau ka dikeruani.

¹⁸Karnau itu peratikala iluak-iluak setu diau kamu dengagh. Karnau jemau diau buadau ka dienju'i agi, anyautu jemau diau nidau buadau, setu diau sangkau adau di diau ka diambiak pulau.”

¹⁹Mak Yesus ngan adingAu datang njenguak Yesus. Anyautu ughangtu endiak pacak sampai guak Diau, karnau jemau banyak nianan.

²⁰Mangku adau jemau ngiciakka ngan Diau, kataunyau, “Mak Kaba ngan ading-beghading Kaba adau di luagh endak betemu ngan Kaba.”

²¹Yesus nimbali ughangtu, katauNyau, “Jemau diau ndengaghka kici'an Allah ngan na'atinyau, ughang itula makKu ngan ading-beghadingKu.”

²²Adau saghi Yesus ngan anak-buaHau nayiak perawu. Katau Yesus, “Mela, kitau pegi ke beghang sanau.”

²³Mangku ughangtu belayar. Ughangtu dang belayar, Yesus tekelap. Mangku adau angin nyaghu, ngan ayiak masuak dalam perawu. Ughangtu dalam bayau laka tebenak.

²⁴Anak-buahau pegi mbangunka Yesus, kataunyau, “Guru, Guru, kitau laka tebenak!” Yesus bangun mbentak angin ngan umbak besak itu, mangku angin ngan umbaktu mandak, danau itu diam.

²⁵Udim itu Yesus ngiciak ngan ughangtu, “Ngapau kamu nidau percayau?” Ughangtu kemangan ngan penakut, mangku ngiciak sughang ngan diau lain, “Sapau sebenaghau Jemau ini? Diau merintaka angin ngan umbak, mangku diau ghedam.”

²⁶Mangku Yesus ngan anak-buaHau sampai di daira jemau Gerasa diau di beghang danau Galilia.

²⁷Yesus la ndaghat, Diau didatangi sughang jemau lanang jak di kuta itu diau diarung iblis. Jemautu la lamau endiak bebaju. Diau enggup di ghuma, diau mendam di kuburan ajau.

²⁸Satu nginak Yesus, diau tegauk sampai terubua guak keting Yesus mangku ngiciak ngan suarau bias, “Endak tuapau ngan aku, ui Yesus, Anak Allah diau Mahatinggi. Aku mintak, jangan Dighi nyaraui aku.”

²⁹Diau ngiciak luak itu, karnau Yesus ngajung iblis itu ngeluagh jak di diau. Iblis rajin mbanting-bantingka diau. Tanganau dikebat ngan rantai ngan ketingau dighimpus, supayau nidau bejalan. Empuak luak itu, diau masia pacak pulau mutuska rantaitu, mangku dibata'i iblistu ke bada diau suni.

³⁰Yesus betanyau ngan diau, “Sapau namau kaba?” Timbalau, “Banyak”, karnau diau diarung banyak iblis.

³¹Mangku iblis itu mintak ngan Yesus, supayau jangan diajung masuak nerakau.

³²Pasigh itu banyak kaput ingunan dang ndalak makanan di bukit. Iblis itu mintak ngan Yesus, supayau diau diajung ngarung kaput itu, mangku diajungAu.

³³Iblis itu ngeluagh jak di jemau tadi ngarung kaput. Kaput diau banyak itu belaghi tumban jak di tepi badas masuak ke danau mangku mati tebenak.

³⁴Satu tukang-tukang sayia kaput nginak titu, ughangtu belaghi ngan nyiarka ceritau itu di kuta ngan di dusun-dusun.

³⁵Ughang diau ndengagh ceritau itu ngeluagh endak ngina'au mangku datang njenguak Yesus. Di situ ughangtu nginak jemau diau la ditinggalka iblis dang duduak guak Yesus. Diau la bekain ngan rupu'annyau la waras, mangku ughangtu penakut.

³⁶Ughang diau la nginak itu tadi ngiciakkanyau ngan ughangtu, luak manau jemau diau diarung iblistu la dighaduka.

³⁷Mangku gegalau jemau jak di daira Gerasa mintak Yesus pegi jak di bada itu, karnau takut kematila. Mangku Yesus nayiak perawu endak baliak.

³⁸Jemau diau la dighadui jak di iblistu mintak, supayau diau bulia ngikut. Anyautu Yesus ngajung diau baliak,

³⁹katauNyau, “Baliakla, ceritaukala gegalaunyau diau la Allah buat ngan kaba.” Jemau itu pegi ngiciakka di gegalau kuta setu diau la Yesus buat ngan diau.

⁴⁰Yesus la baliak ke sebeghang, jemau rami nyambut Diau ngan riang, karnau dang nungguka Diau.

⁴¹Adau sughang jemau datang, namaunyau Yairus. Diautu kepalak ghuma sembayang. Sampai nunduak di adapan Yesus, diau mintak Yesus datang ke ghumahau,

⁴²karnau ana'au diau gi sikuak itula laka mati. Diautu la gadis, umurau kekirau duau belas taun. Yesus dang bejalan ke ghuma Yairus, jemau banyak bererincitan datang.

⁴³Adau sughang tinau diau buidapan bedagha la duau belas taun lamaunyau. Nidau bediau sughang kia diau pacak meghaduinyau.

⁴⁴Tinau itu masigh guak belakang Yesus, mangku mbibit bajuAu. Masau itu pulau daghahau mandak melilia.

⁴⁵Mangku Yesus betanyau, katauNyau, “Sapau mbibit Aku?” Anyautu nidau bediau jemau diau ngaku'inyau. Karnau itu Pitrus bekatau, “Jemau banyak di guak Dighi ngincitka Dighi.”

⁴⁶Katau Yesus, “Tapitu adau jemau diau mbibit Aku. Aku keruan, karnau adau kuasau ngeluagh jak di Aku.”

⁴⁷Mangku tinau tadi keruan, bansau peremba'autu la dikeruani. Itula sebapau diau datang sampai gemetagh, mangku nunduak di adapan Yesus, diceritaukanyau ngan jemau banyaktu, tuapau sebapau diau mbibit Yesus, mangku masau itula pulau idapannyau ghadu.

⁴⁸Mangku Yesus bekatau ngan diau, “Kaba dighadui, karnau kaba percayau. Baliakla ngan selamat.”

⁴⁹Yesus gi ngiciak, adau jemau jak di ghuma Yairus datang ngiciak ngan Yairus, “Anak dighi la mati. Nidau nanti ngeriaka Guru agi.”

⁵⁰Yesus ndengagh titu, mangku ngiciak ngan Yairus, “Nidau endak takut. Percayaula ajau. Anak dighi ka ghadu.”

⁵¹La sampai di ghuma Yairus, Yesus nidau ngajung sughang kia masuak serempak ngan diau lain jak di Pitrus, Yuhanis, Yakubus ngan enduak-bapak budak gadistu.

⁵²Gegalau jemau nangis berandaian nangisi budak gadis itu. Anyautu Yesus bekatau, “Jangan nangis,” katauNyau, “Budak gadis ini nidau mati. Diauni cuman tiduak.”

⁵³Ughangtu nawauka Yesus, karnau la keruan, bansau budak itu la mati.

⁵⁴Yesus ngecakka tangan budak gadis itu ngan bekatau, “Ui, bangunla kaba!”

⁵⁵Nyawaunyau ngulang adau agi. Masau itula pulau budak gadistu bangun ngan betegak. La udim itu, Yesus ngajung ughangtu ngenju'i budak itu makan.

⁵⁶Enduak-bapa'au kemangan. Anyautu Yesus nidau ngajung ughang duautu ngiciakka ceritau itu ngan sapau kila.