Read Central Malay LUKAS 9 Bible Online

LUKAS 9 - Central Malay bible

LUKAS 9

¹Yesus mantau duau belas anak-buaHau, dienjuakkaNyau kuasau batan endak ngisitka iblis ngan meghadui idapan.

²Mangku diajungAu pegi ngiciakka ceritau Allah merinta luak rajau ngan diajung meghadui jemau buidapan,

³sampai bekatau ngan ughangtu, “Jangan mbatak tuapau-apau, amun endak bejalan. Batak tungkat jangan, minggangan jangan, makanan jangan, tanci jangan, baju duau jangan.

⁴Amun kamu la diterimau di ghuma jemau, mendamla di situ, enggut kamu melajuka pejalanan.

⁵Amun endiak bediau jemau diau nerimau kamu, pegila jak di kuta itu, mangku kepaskala debu jak di keting kamu njadi peringatan batan endak ughangtu.”

⁶Mangku anak-bua Yesus pegi ke dusun-dusun endak ngiciakka ceritau iluak itu ngan meghadui jemau buidapan di manau-manau.

⁷Herudis, rajau daira itu, ndengagh gegalaunyau diau dikerjauka Yesus. Diau bingung, karnau adau jemau ngiciakka, Yuhanis la idup agi.

⁸Adau pulau diau ngiciakka, Elia la nimbul agi. Adau pulau diau ngiciakka, sughang jak di nabi senitu la idup agi.

⁹Herudis bekatau, “Amun Yuhanis, aku diau ngajung mancung liaghau. Sapau Diau ini?” Mangku Herudis ncubau endak nginak Yesus.

¹⁰Rasul-rasul itu baliak nceritauka ngan Yesus gegalaunyau diau dikerjauka ughangtu. Mangku Yesus ngajak ughangtu pegi serempak ngan Diau ngasing guak kuta Betsaida.

¹¹Anyautu jemau banyak la keruan ceritau itu, mangku ngikut pulau. Yesus nyambut ughangtu ngiciakka ceritau Allah merinta luak rajau mangku meghaduka jemau buidapan.

¹²Aghitu la petang, duau belas anak-buaHau njenguak Yesus, ngan bekatau, “Ajungla jemau banyak ini pegi ke dusun-dusun pasigh ini ndalak makanan ngan bada temalam, karnau di sini suni.”

¹³Yesus nimbal, “Kamunila ngenju'i ughang ini makan.” Anak-buaHau bekatau, “Diau adau di kami cuman limau bua ruti ngan duau ikuak ikan. Apu kami arus pegi mbeli makanan batan endak gegalau jemau ini?”

¹⁴Di situ kekirau limau ribu jemau lanang. Mangku Yesus bekatau ngan anak-buaHau, “Ajungla jemau banyak ini duduak bereruguak, limau pulua ughang seruguak.”

¹⁵Anak-buaHau nurutiNyau, mangku ngajung jemau banyaktu duduak.

¹⁶Udim itu Yesus ngambiak limau bua ruti ngan duau ikuak ikan tadi, mangku ncungak ke langit sampai bedu'a beterimau-kasia, dipiyak-piya'au rutitu, dienjuakkaNyau ngan anak-buaHau, supayau diagiaka ngan jemau banyak itu.

¹⁷Ughangtu makan galau enggut kenyang, mangku ditunggalkanyau tigha ruti tadi, duau belas kinjagh banya'au.

¹⁸Yesus dang bedu'a sughang, anak-buaHau njenguak Diau. Yesus betanyau ngan ughangtu, “Katau jemau, sapau Akuni?”

¹⁹Ughangtu nimbal, “Yuhanis Pembaptis. Adau diau ngiciakka, Elia. Adau pulau diau bekatau, sala sughang nabi timpau senitu diau idup agi.”

²⁰Mangku Yesus betanyau, “Pendapat kamutu, sapau akuni?” Pitrus nimbal, “Dighila Almasih, Rajau Penyelamat, diau dijanjika Allah.”

²¹Mangku Yesus nidau ngajung nian ughangtu ngiciakka ceritau itu ngan sapau kila.

²²Yesus bekatau, “Anak Manusiau mesti banyak nanggungka sengsarau. Diau nidau ka diterimau pengulu-pengulu, imam-imam bepangkat tinggi ngan guru-guru ukum Taurat. Diau ka dibunua, mangku la duau malam Diau ka idup agi.”

²³Mangku Yesus ngiciak ngan jemau banyak, katauNyau, “Jemau diau endak ngikut Aku jangan ndalak jalan idup batan endak diau sughang. Diau mesti mikul salipau idang aghi, mangku maju ngikut Aku.

²⁴Karnau jemau diau endak ngilakka nyawaunyau ka kelengitan nyawaunyau. Jemau diau kelengitan nyawaunyau karnau Aku ka selamat.

²⁵Tuapau untungau, amun jemau bulia gegalau deniau njadi retaunyau, anyautu diau ka benasau karnau diriau sendighi?

²⁶Karnau amun jemau maluan ngaku'i Aku ngan ajaghanKu, Anak Manusiau pulau ka maluan ngaku'i jemau itu, masau Diau ka datang agi nanti ngan kuasauNyau ngan kuasau Bapa'Au ngan malaikat-malaikat suci.

²⁷Keruanila, jak di kamuni adau diau nidau ka mati, amun lum nginak Allah merinta luak rajau.”

²⁸La seminggu udim Yesus ngiciakka gegalau kici'anNyau tadi, Diau mbata'i Pitrus, Yuhanis ngan Yakubus ndaki gunung endak bedu'a.

²⁹Yesus dang bedu'a di situ, dayiAu beghuba ngan bajuAu njadi putia besinagh.

³⁰Mangku kina'an ughang duau ngan sinagh jak di sergau, diautu Musa ngan Elia. Ughang duautu ngiciak ngan Yesus ngiciakka kematianNyau diau ka dialamiNyau di Yerusalim.

³¹

³²Penarau itu Pitrus ngan kantinau tekantuak, mangku ughang tigau itu tebangun nginak Yesus besinagh ngan ughang duau tadi betegak guak Diau.

³³Ughang duau itu laka pegi, Pitrus ngiciak ngan Yesus, kataunyau, “Guru, lemak nian kitau di sini, ajungla kami negakka tigau bua punduk di sini, sebua batan endak Dighi, sebua batan endak Musa, sebua batan endak Elia.” Pitrus ngiciak luak itu, endiak keruan retiau diau dikiciakkanyautu.

³⁴Diau dang ngiciak luak itu, adau aban mbayangi ughangtu, mangku ughang duau tadi masuak dalam aban itu, mangku anak-buaHau penakut.

³⁵Adau suarau jak di dalam aban diau bekatau, “Inila AnakKu diau la Kupilia. Dengaghkala Diau itu.”

³⁶Suarau itu la diam, Yesus sughang agi kina'an. Masau itu anak-buaHau diam, nidau ngiciakka setu diau la dikinak ngan sughang kia.

³⁷Pagi di aghiau Yesus ngan anak-buaHau ughang tigautu tughun jak di gunung, mangku jemau banyak njenguak Yesus.

³⁸Sughang jak di jemau banyaktu ngiciak ngan bias, kataunyau, “Guru, aku mintak tulung kina'i anakku, karnau anakku gi sikuak inila.

³⁹Kekadangan diau kenau gilau bangkai, mangku diarung iblis. Diau tepekiak-pekiak. Iblis itu ngguliak-guliakkanyau, mangku mulutau bebuwia. Iblis itu maju nyaraui diau, segau ninggalkanyau.

⁴⁰Aku la mintak anak-bua Dighi ngisitka iblis itu, anyautu nidau pacak.”

⁴¹Katau Yesus, “Ui, kamuni jemau nidau percayau lagi sesat. Lamau beghapau agi Aku mesti guak kamu ngan ngaligh ngan kamu? Batakla anak itu ke sini!”

⁴²Budak keciak itu dang bejalan njenguak Yesus, iblis itu mbanting-bantingka diau ke tana, mangku diguliakkanyau. Yesus mbentak iblis itu sampai meghadui budak keciak tadi, mangku diserakaNyau ngan ba'au.

⁴³Jemau kemangan galau nginak kuasau Allah diau besak itu. Jemau banyak itu maju kemangan karnau gegalaunyau diau dikerjaukaNyautu, Yesus ngiciak ngan anak-buaHau, katauNyau,

⁴⁴“Dengaghkala iluak-iluak katauKu ini: Anak Manusiau ka diseraka di tangan manusiau.”

⁴⁵Anak-buaHau endiak terti kici'anNyautu, karnau retiau nidau keruan ngan ughangtu, mangku ughangtu nidau terti kici'anNyautu. Ughangtu nidau beghani nanyauka retiau kici'anNyau tadi.

⁴⁶Mangku anak-bua Yesus bebala mbalaka, sapau jak di ughangtu diau penting sekali.

⁴⁷Yesus keruan rupu'an ughangtu, mangku Diau ngambiak sughang budak keciak, diajungAu betegak di peridinganNyau,

⁴⁸mangku Diau bekatau, “Jemau diau nerimau sughang budak keciak luak diauni karnau Aku diau nerimau Aku. Mangku jemau diau nerimau Aku nerimau pulau Allah diau ngajung Aku. Karnau jemau diau nidau penting jak di kamu, diaula penting sekali.”

⁴⁹Yuhanis bekatau, “Guru, kami nginak jemau ngisitka iblis pakai namau Dighi, mangku kami negahi diau, karnau diau ukan anak-bua Dighi.”

⁵⁰Mangku katau Yesus, “Jangan kamu negahi diau, karnau jemau diau nidau melawan kamu, diaula kawan kamu.”

⁵¹Mangku masaunyau laka sampai Yesus tuangkat ke sergau, Diau mutuska endak pegi ke Yerusalim.

⁵²Yesus ngajung jemau ndului Diau. Jemau diau diajungAutu pegi masuak dusun di Samaria endak nyediauka bada Yesus.

⁵³Anyautu jemau dusun itu enggup nerimau Yesus, karnau Diau dang ngancamka Yerusalim.

⁵⁴Yuhanis ngan Yakubus, anak-bua Yesustu, ndengagh ceritau itu mangku bekatau, “Cengki Dighi tetuju, amun kami ngajung api tughun jak di langit endak benasauka ughangtu.”

⁵⁵Anyautu Yesus nulia marai ughang duautu.

⁵⁶Mangku Yesus ngan anak-buaHau pegi ke dusun lain.

⁵⁷Yesus ngan anak-buaHau dang melajuka pejalananNyau, adau sughang ngiciak ngan Yesus, kataunyau, “Aku endak ngikut Dighi, ke manau kila Dighi pegi.”

⁵⁸Katau Yesus, “Landak adau lubangau, burung adau saghangau, anyautu Anak Manusiau endiak bediau badaHau.”

⁵⁹Mangku Yesus ngiciak ngan jemau lain, katauNyau, “Mela, ngikut Aku!” Jemau itu bekatau, “Ajungla Aku baliak kudai endak nguburka bak kami.”

⁶⁰Yesus nimbal, “Nengkela jemau mati nguburka jemau mati, anyautu kaba pegila ngiciakka di manau-manau ceritau Allah la mulai merinta.”

⁶¹Adau agi jemau lain bekatau, “Aku endak ngikut Dighi, anyautu ajungla aku baliak kudai endak pamit.”

⁶²Anyautu Yesus bekatau ngan jemautu, “Jemau diau dang manca sampai nulia ke belakang, jemautu nidau pantas njadi umat Allah.”