Read Central Malay YUHANIS 1 Bible Online

YUHANIS 1 - Central Malay bible

YUHANIS 1

¹Empai penembai adau Pirman. Pirmantu setunggal ngan Allah, mangku Pirmantu Allah.

²Empai penembai Diau setunggal ngan Allah.

³Gegalaunyau dijadikaNyau, mangku amun ukan Diau, sutiak kia nidau njadi.

⁴Pirman itu ngenjuakka idup, mangku iduptu ngenjuakka terang ngan manusiau.

⁵Terang itu besinagh di keleman, nidau pacak dipadamka kelemantu.

⁶Adau sughang jemau diau diajung Allah, namaunyau Yuhanis.

⁷Yuhanistu datang ngiciakka terang tadi, supayau gegalau jemau percayau, karnau kici'annyautu.

⁸Yuhanis ukanau terang itu, tapitu diau endak ngiciakkanyau.

⁹Terang diau sebenaghautu datang ke deniau nerangi gegalau manusiau.

¹⁰Diau la adau di deniau. Deniau ini dijadikaNyau, anyautu deniauni nidau keruan Diau.

¹¹Diau datang ke nenggeriAu, anyautu jemau di nenggeriAutu nidau nerimauNyau.

¹²Mangku bilang jemau diau nerimauNyau ngan percayau ngan Diau, dienjuakkaNyau hak njadi anak Allah.

¹³Ughangtu njadi anak Allah ukan ngan carau manusiau, ukan pulau karnau dikenda'i sughang jemau lanang, anyautu idup itu asalau jak di Allah.

¹⁴Pirman itu la njadi manusiau diau iluak nian ngan kitau. Di Diau kitau nginak diau benagh ceritau Allah. Diau mendam ngan kitau. Kitau la nginak keagunganNyau, keagungan diau dienjuakka ngan Diau, karnau Diautu Anak Bapak diau sughang itula.

¹⁵Yuhanis ngiciakka Diau, kataunyau, “Inila Jemau diau kukiciakka: Diau ka datang la udim aku. Bekuasaula Diau sangkan aku, karnau antak ka aku adau, Diau la adau.”

¹⁶Keilu'anNyau la banyak tegalau. Kitau maju meghasaukanyau.

¹⁷Allah ngenjuakka ukum Taurat ngan Musa, anyautu keilu'anNyau ngan kebenaghanNyau diancakkaNyau di Yesus Keristus.

¹⁸Nidau sughang kia kekela nginak Allah lain jak di Anak Allah diau gi sughang itula ngan maju seghundak ngan Bapak. Diau itula nyatauka Bapak ngan kitau.

¹⁹Tuau-tuau jemau Yahudi di Yerusalim ngajung imam-imam ngan jemau pengadau Liwi pegi njenguak Yuhanis ngan nanyaui diau, “Sapau kabani?”

²⁰Yuhanis ngaku'i ngan sebenaghau, diau nidau mbu'ung, kataunyau, “Akuni ukanau Mesias, Rajau Penyelamattu.”

²¹“Amun luak itu”, katau ughangtu, “Sapau kabani? Apu kaba Elia?” “Ukanau”, katau Yuhanis. Mangku ditanyaui agi, “Apu kaba nabi diau ka datangtu?” “Ukanau pulau”, katau Yuhanis.

²²“Amun luak itu”, katau ughangtu, “Kiciakkala ngan kami sapau kabani, mangku kami pacak nimbali jemau diau ngajung kami. Katau kaba, sapau kabani?”

²³Mangku Yuhanis nimbal, kataunyau, “Akunila diau dikiciakka nabi Yesaya, ‘Suarau jemau di padang bungin diau ngiciak ngan suarau bias: Lughuskala jalan batan endak Tuhan!’ ”

²⁴Jak di rumbungan jemau diau diajungtu adau jemau Parisi.

²⁵Ughangtu betanyau, kataunyau, “Amun kabani ukan Mesias, ukan Elia ngan pulau ukan nabi diau ka datangtu, ngapau kabani mbaptiska jemau?”

²⁶Yuhanis nimbal, kataunyau, “Akuni mbaptis ngan ayiak, anyautu di guak kapu dighi adau Jemau diau nidau kecinauan ngan kapu dighi.

²⁷Diautu ka datang udim aku. Melegha'i tali sepatuAu aku nidau pantas.”

²⁸Gegalau kici'an tadi nyatau tejadi di Betania di sebela matau-aghi idup ayiak Yurdan. Di situla Yuhanis mbaptiska jemau.

²⁹Pagi di aghiau Yuhanis nginak Yesus datang njenguak diau, mangku Yuhanis bekatau, “Kina'ila, itu Anak Bebiri diau disediauka Allah endak ngabiska dusau deniau.

³⁰Diautu Jemau diau kukiciakka, Diau ka datang udim aku. Anyautu bekuasaula Diau sangkan aku, karnau Diau la adau antak ka aku adau.

³¹Senitu aku lum keruan, sapau Diautu, mangku aku datang mbaptis ngan ayiak, supayau jemau Israil keruan, sapau Diau.”

³²Yuhanis ngiciakka luak ini pulau, kataunyau, “Aku nginak Rua Allah tughun jak di langit luak sikuak burung darau diau inggap di Yesus.

³³Senitu aku lum keruan sapau Diau. Anyautu Allah diau ngajung aku mbaptis ngan ayiak la ngiciak ngan aku: ‘Amun kaba nginak Rua Allah tughun, mangku nginggapi sughang jemau, Diautu jemau diau ka mbaptis ngan Rua Allah.’

³⁴Aku la ngina'au nian,” katau Yuhanis, “Mangku aku ngaku'i, Diautu Anak Allah.”

³⁵Pagi di aghiau Yuhanis adau agi di badahau tadi serempak ngan duau anak-buahau.

³⁶Satu nginak Yesus lalu, diau bekatau, “Kina'ila, inila Anak Bebiri diau disediauka Allah!”

³⁷Anak-buahau ndengagh kici'annyautu, mangku ngikut Yesus.

³⁸Yesus nulia ke belakang endak nginak duau ughangtu ngikut Diau, mangku betanyau, “Tuapau kamu dala'i?” “Rabi,” katau ughang duautu, retiau guru, “Di manau bada Dighi?”

³⁹“Mela, kina'ila!” katau Yesus. Mangku ughang duautu pegi ngan Yesus endak nginak badaHau. Aghitu la petang, mangku ughangtu betunggal ngan Yesus.

⁴⁰Sala sughang jak di duau anak-bua Yuhanis tadi diau la ndengagh kici'annyautu ngan ngikut Yesus itu Anderias, ading Simun Pitrus.

⁴¹Dulu sekali diau betemu ngan dangau Simun ngan bekatau, “Kami la betemu ngan Mesias.” Mesias semegi ngan Keristus, retiau Rajau Penyelamat.

⁴²Anderias ngantat Simun guak Yesus. Yesus ngina'i Simun, mangku bekatau ngan diau, “Kabani Simun, anak Yuna. Kaba ka dinamauka Kepas.” Kepas semegi ngan Pitrus basau Yunani, retiau batu batan pelapiak.

⁴³Pagi di aghiau Yesus mutuska endak pegi ke Galilia. Di situ Diau betemu ngan Pilipus, mangku ngaja'inyau, “Mela, ngikut Aku!”

⁴⁴Asal Pilipus jak di Betsaida, bada Anderias ngan Pitrus.

⁴⁵Pilipus betemu ngan Natanail, mangku bekatau, “Kami la betemu ngan jemau diau dikiciakka Musa dalam buku Taurat ngan buku nabi-nabi. NamauNyau Yesus, anak Yusup, jak di Nasarit.”

⁴⁶Natanail nimbal, kataunyau, “Asauku nidau ka adau setu diau iluak jak di Nasarit.” “Mela, kina'ila ngan kaba!” katau Pilipus.

⁴⁷Yesus nginak Natanail datang, mangku ngiciakka diau, katauNyau, “Kina'ila, diautu jemau Israil nian, diau nidau kekela nipu!”

⁴⁸Natanail betanyau, “Kebilau Dighi keruan aku?” Yesus nimbal, katauNyau, “Antak ka Pilipus mantau kaba, Aku la nginak kaba di bawa batang aghau.”

⁴⁹“Guru,” katau Natanail, “Dighitu Anak Allah! Rajau jemau Israil!”

⁵⁰Yesus bekatau, “Kaba percayau, karnau Aku la ngiciakka, bansau Aku la nginak kaba di bawa batang aghau tadi? Kaba ka nginak setu diau lebia besak agi jak di itu tadi!”

⁵¹Mangku Yesus bekatau agi, “Percayaula nian ngan katauKu ini: Kaba ka nginak langit tebukak ngan malaikat-malaikat Allah nayiak tughun ke Anak Manusiau.”