Read Central Malay YUHANIS 10 Bible Online

YUHANIS 10 - Central Malay bible

YUHANIS 10

¹“KatauKu ini benagh: Jemau diau masuak sangkaran bebiri nidau jalan duaghau, anyautu nayiak kandang, jemautu pemaling ngan perampuk.

²Jemau diau masuak jalan duaghau diautu tukang sayia bebiri.

³Penunggu sangkaran mbukakka duaghau, mangku tukang sayia masuak. Bebiri ka ndengagh suaraunyau, dipantaunyau bebiriau ngan namaunyau sikuak-sikuak, mangku dibata'inyau keluagh.

⁴La udim bebiriautu dibata'i keluagh galau, diau bejalan di mukaunyau, mangku bebiri itu ngikut diau, karnau bebiritu kecinauan suaraunyau.

⁵Jemau lain cetau nidau diikutkanyau. Diau ka larat jak di jemautu, karnau suaraunyau nidau kecinauan ngan diau.”

⁶Yesus ngiciakka cuntau ceritau ini, anyautu jemau Yahudi nidau terti tuapau retiau Diau ngiciakka luak itu.

⁷Mangku Yesus ngiciak agi, katauNyau, “Keruanila ini: Akuni umpamau duaghau masuak sangkaran bebiri itu.

⁸Gegalau jemau lain diau datang antak ka Aku, jemautu pemaling ngan perampuk. Bebiri nidau ndengaghka ughangtu.

⁹Akuni umpamau duaghau. Jemau diau masuak jalan Aku ka selamat, diau masuak ngeluagh mangku bulia makanan.

¹⁰Risau datang endak maling, endak mbunua, endak merusak. Akuni datang, supayau kapu dighi bulia idup, idup sempernau ngan gegalaunyau adau.

¹¹Akunila tukang sayia bebiri diau iluak lagi ngarap. Tukang sayia bebiri diau iluak ngenjuakka nyawaunyau batan endak bebiriau.

¹²Jemau upahan diau ukan tukang sayia ngan ukan ngempu bebiritu nginak setuau datang, ditinggalkanyau bebiritu, mangku larat. Mangku setuautu nerengkam sampai nceghaika bebiritu.

¹³Jemau tadi larat, karnau diau jemau upahan, nidau nyanauka bebiritu.

¹⁴Akunila tukang sayia bebiri diau iluak lagi ngarap. Aku keruan bebiriKu, bebiriKu keruan Aku.

¹⁵Semegi luak Bapak keruan Aku, Aku keruan Bapak. Mangku Aku ngenjuakka nyawauKu batan endak bebiriKu.

¹⁶Masia adau agi bebiri lain ngan Aku diau nidau masuak sangkaran ini. Bebiri itu mesti Kubatak pulau, mangku bebiritu ka ndengaghka suarauKu. Gegalau bebiritu ka njadi seghundak ngan sughang tukang sayia.

¹⁷Bapak nyayangi Aku, karnau Aku ngenjuakka nyawauKu, mangku Aku ka nerimaunyau agi.

¹⁸Sughang kia nidau pacak ngambi'au jak di Aku. Aku ngenjuakkanyau ngan kesukauan atiKu. Aku bekuasau ngenjuakkanyau ngan bekuasau ngambi'au agi. Kuasau itu Kuterimau jak di BapakKu.”

¹⁹Mangku jemau Yahudi mulai bebala, karnau kici'an Yesus itu.

²⁰Banyak jemau ngiciakka, “Diauni diarung iblis, Diau gilau. Ngapau kamu ndengaghka Diau?”

²¹Adau pulau diau lain ngiciakka, “Itu ukanau kici'an jemau gilau. Iblis nidau pacak meghadui jemau butau!”

²²Nidau lamau udim itu jemau Yahudi meringati aghi rerayau nyemak Ghuma Allah. Masau itu pangkau dingin.

²³Yesus ngenginak di berendau Suliman di Ghuma Allah.

²⁴Mangku jemau Yahudi nyeghundak guak Yesus ngan bekatau, “Lamau beghapau agi Kaba ngenangka kami asau-asauan. Amun Kabani Mesias, Rajau Penyelamat itu, kiciakkala ngan sebenaghau.”

²⁵Katau Yesus, “La Kukiciakka ngan kapu dighi, anyautu kapu dighi enggup percayau. Kerjau diau Kukerjauka atas namau BapakKu mbuktika sapau Aku.

²⁶Kapu dighini nidau percayau, karnau kapu dighi nidau temasuak bilangan bebiriKu.

²⁷Gegalau bebiriKu ndengaghka suarauKu. Aku keruan diau, mangku gegalaunyau ngikut Aku.

²⁸Aku ngenju'i diau idup selelamaunyau, mangku bebiritu nidau ka benasau enggut selelamaunyau. Nidau bediau sughang kia diau ka merebuti diau jak di sayianKu.

²⁹BapakKu la ngenjuakkanyau ngan Aku. Bekuasaula Diautu sangkan sapau kila. Mangku sughang kia nidau pacak merebutinyau jak di tangan BapakKu.

³⁰Aku ngan Bapak gi sughang.”

³¹Mangku jemau Yahudi ngambiak batu agi endak nyipati Yesus.

³²Yesus ngiciak ngan ughangtu, katauNyau, “La banyak kerjau iluak jak di BapakKu diau Kukinakka ngan kapu dighi, mangku karnau perembak manau kapu dighi endak nyipati Aku?”

³³Jemau Yahudi itu nimbal, “Ukan karnau perembak kaba diau iluak itu kami endak nyipati kaba ngan batu, tapitu karnau kaba nggelakka Allah. Kabani sughang jemau endak njadika diri Kaba Allah.”

³⁴Katau Yesus, “Ukanau ditulis dalam Kitab Taurat kapu dighi, ‘Allah bekatau: Kamula allah’?

³⁵Kitau keruan, setu diau ditulis dalam Injil nidau pacak diurungka. Amun Allah ngenjuakka namau allah ngan jemau diau nerimau kici'anNyau tadi,

³⁶ngapau kapu dighi ngiciakka Aku nggelakka Allah, karnau Aku ngiciakka, Akuni Anak Allah, awuak Aku dipilia Bapak ngan diajungAu ke deniauni?

³⁷Amun Akuni nidau ngerjauka gegalau kerjau BapakKu, kapu dighi jangan percayau ngan Aku.

³⁸Anyautu amun Aku ngerjaukanyau, percayaula ngan kerjauKu, empuak kapu dighi nidau percayau ngan Aku. Mangku kapu dighi keruan ngan ngerti, bansau Bapak adau di dalam Aku, Aku di dalam BapakKu.”

³⁹Mangku jemau Yahudi itu ncubau agi nangkap Yesus, anyautu Yesus luput jak di tangan ughangtu.

⁴⁰La udim itu Yesus pegi ke beghang ayiak Yurdan, bada Yuhanis mbaptis senitu, mangku Diau mendam di situ.

⁴¹Banyak jemau datang njenguak Diau. Ughangtu bekatau, “Yuhanis nidau ngerjauka tandau sutiak kia, anyautu gegalaunyau diau dikiciakka Yuhanis ceritau Jemau ini benagh.”

⁴²Mangku jemau di situ banyak percayau ngan Yesus.