Read Central Malay YUHANIS 12 Bible Online

YUHANIS 12 - Central Malay bible

YUHANIS 12

¹Enam aghi antak ka aghi rerayau Paska Yesus pegi ke Betania, bada Lasarus diidupka jak di mati.

²Di situ Yesus dijamu jemau dusun itu. Marta nepi'iNyau ngan Lasarus ngikut makan ngan Diau.

³Mangku Maria mbatak minyak ghum segudu keciak diau besak nianan regaunyau, mangku diau minya'i keting Yesus, dikusu'inyau ngan gumba'au. Ghumatu ghum galau ngan minyak itu.

⁴Mangku Yudas Iskariut, sughang jak di anak-bua Yesus diau njualkaNyau bekatau,

⁵“Ngapau minyak ghum ini nidau dijual ngan regau tigau ratus tanci pirak, mangku dienjuakka ngan jemau serik?”

⁶Yudas ngiciak luak itu, ukan karnau diau nyanauka jemau serik, anyautu karnau diau pemaling ngan maju ngambiak tanci ughangtu diau diimpaninyau.

⁷Mangku katau Yesus, “Nengkela diauni! Diau ngerjauka ini batan endak aghi penguburanKu.

⁸Jemau serik maju guak kamu, anyautu Aku nidau maju guak kamu.”

⁹Banyak jemau Yahudi ndengagh Yesus adau di Betania, mangku pegi ke situ. Ughangtu pegi ke situ ukan ajau endak nginak Yesus, tapitu karnau endak nginak Lasarus pulau diau la diidupka Yesus jak di mati.

¹⁰Mangku imam-imam bepangkat tinggi merencanauka endak mbunua Lasarus pulau,

¹¹karnau banyak jemau Yahudi ninggalka ughangtu karnau Lasarus, mangku percayau ngan Yesus.

¹²Jemau banyak la datang endak merayauka Paska. Pagi aghiau ughangtu ndengagh, bansau Yesus dang bejalan ngancamka Yerusalim.

¹³Ughangtu ngambiak daun paku bindu, mangku pegi ngampak Yesus ngan besurak-surak, kataunyau, “Husana! Tepujila Jemau diau datang atas namau Tuhan. Tepujila Rajau Israil.”

¹⁴Yesus dapat sikuak keledai mudau, dinayi'iNyau, mangku ditepati setu diau ditulis dalam Injil,

¹⁵“Nidau nanti takut, ui jemau Yerusalim. Kina'ila Rajau kamu datang nayiak sikuak anak keledai.”

¹⁶Masau itu anak-bua Yesus lum ngerti gegalaunyau itu. Anyautu la udim Yesus ngulang idup ngan diagungka, anak-buaHau teghingat, bansau setu diau dikerjauka ughangtu ngan Diau la ditulis dalam Injil.

¹⁷Jemau banyak diau la nginak Yesus ngajung Lasarus ngeluagh jak di kuburan diidupkaNyau jak di mati maju ngiciakka kejadian itu.

¹⁸Itula sebapau jemau banyak pegi ndepatka Yesus di jalan, karnau ughangtu la ndengagh, bansau Diautu ngerjauka tandau nyelia itu.

¹⁹Mangku jemau Parisi ngiciak sughang ngan diau lain, kataunyau, “Na, kamu la nginak, kitau nidau pacak mbuat tuapau-apau. Gegalau jemau deniauni datang ngikut Diau.”

²⁰Di antarau jemau diau datang ke Yerusalim endak sembayang masau aghi rerayau itu adau pulau jemau Yunani.

²¹Ughangtu pegi njenguak Pilipus diau asalau jak di Betsaida di Galilia mangku bekatau, “Amun pacak, kami endak betemu ngan Yesus.”

²²Pilipus ngiciakkanyau ngan Anderias, mangku ughang duautu ngiciak ngan Yesus.

²³Katau Yesus ngan ughangtu, “Masaunyau la sampai Anak Manusiau diagungka.

²⁴Ngenian katauKu ini: Amun semughak padi nidau ditugalka ke tana, mangku nidau busuak, diau ka maju semughak itula. Anyautu amun mughaktu busuak karnau tumbua, mangku ka banyak asilau.

²⁵Jemau diau nyayangi nyawaunyau ka kelengitan nyawaunyau, mangku jemau diau nidau nyayangi nyawaunyau ka bulia idup empai selelamaunyau.

²⁶Jemau diau endak bekerjau batan endak Aku, diau mesti ngikut Aku, mangku anak-buaKu adau guak Aku di badaKu. Mangku jemau diau bekerjau batan endak Aku diregaui BapakKu.”

²⁷“Aku temas. Tuapau diau mesti Kukiciakka mbak kini? Bak, selamatkala Aku jak di sengsarau ini? Nidau, karnau batan endak itula Aku datang.

²⁸Bak, agungka namau Dighi!” Mangku tedengagh suarau jak di sergau diau ngiciakka, “Aku la ngagungkanyau, mangku Aku ka ngagungkanyau agi.”

²⁹Jemau banyak diau di situ ndengagh suarau itu bekatau, “Itu gurua!” Adau pulau diau ngiciakka, “Ukanau, malaikat ngiciak ngan Diau.”

³⁰Yesus bekatau ngan ughangtu, “Suarau itu ukan batan endak Aku, tapitu batan endak kapu dighi.

³¹Mbak kini la masaunyau deniau diukum, mbak kini penguasau deniau ka dicapakka keluagh.

³²Amun Aku la dinayiakka jak di deniau, Aku ka ngajak gegalau jemau njenguak Aku.”

³³Yesus ngiciakka luak itu endak nyatauka carau Diau ka mati.

³⁴Jemau banyak itu ngiciak ngan Diau, kataunyau, “Kami la keruan jak di ukum Taurat, bansau Mesias, Rajau Penyelamattu, ka idup selelamaunyau. Luak manau Kaba pacak ngiciak, Anak Manusiau mesti dinayiakka. Sapau Anak Manusiau itu?”

³⁵Katau Yesus agi ngan ughangtu, “Nidau ka lamau agi terang adau guak kapu dighi. Bejalanla empungan terang gi adau di kamu, mangku kapu dighi nidau bejalan di keleman. Jemau diau bejalan di keleman nidau keruan ke manau diau pegi.

³⁶Percayaula ngan terang itu, empungan terang itu gi adau di kapu dighi, mangku kapu dighi njadi jemau diau idup dalam terang.” Udim ngiciak luak itu Yesus pegi nyemuni, mangku nidau kina'an agi.

³⁷La banyak tandau nyelia dikerjauka Yesus di mukau ughangtu. Empuak luak itu ughangtu nidau kila percayau ngan Diau.

³⁸Mangku setu diau la dikiciakka nabi Yesaya la ditepati, “Tuhan, sapau ka percayau ngan ceritau kami? Ngan sapau kuasau Tuhan dinyatauka?”

³⁹Itula sebapau ughangtu nidau pacak percayau, karnau Yesaya la bekatau pulau, “Katau Allah,

⁴⁰‘Aku la mbutauka matau ughangtu ngan mbuat ughangtu keghas ati, supayau matau ughangtu jangan nginak ngan rupu'an ughangtu jangan terti, mangku ughangtu jangan ngulang njenguak Aku, mangku Aku jangan meghadui ughangtu.’ ”

⁴¹Yesaya la ngiciak luak itu, karnau la nginak kuasau Yesus, mangku dikiciakkanyau.

⁴²Empuak luak itu banyak pulau jemau jak di pengulu jemau Yahudi percayau ngan Diau. Anyautu ughangtu nidau beghani ngaku'iNyau ngan terang-terangan, karnau takut, kalu jemau Parisi nidau ngajung ughangtu agi masuak ghuma sembayang.

⁴³Ughangtu galakla dipuji manusiau sangkan dipuji Allah.

⁴⁴Mangku Yesus bekatau bias, “Jemau diau percayau ngan Aku, ukan percayau ngan Aku ajau, tapitu percayau pulau ngan Allah diau ngajung Aku.

⁴⁵Mangku jemau diau nginak Aku nginak Allah pulau diau ngajung Aku.

⁴⁶Akuni datang ke deniau ini umpamau terang, mangku bilang jemau diau percayau ngan Aku jangan maju mendam di keleman.

⁴⁷Amun adau jemau diau ndengagh kici'anKu, anyautu nidau nurutinyau, Aku nidau ka ngukumau, karnau Aku datang ukan endak ngukum deniau, tapitu endak nyelamatkanyau.

⁴⁸Jemau diau nidau nerimau Aku ngan nidau nuruti kici'anKu, akimau la adau. Kici'anKu diau la Kukiciakka, itula diau ka ngukumau masau aghi kiamat.

⁴⁹Karnau Aku nidau ngiciak nurut rupu'anKunila, tapitu Bapak diau ngajung Aku Diautu ngajung Aku ngiciakka setu diau mesti Kukiciakka.

⁵⁰Aku keruan perintaHau itu ngenjuakka idup empai selelamaunyau. Mangku setu diau Kukiciakka, Aku ngiciakka luak la dikiciakka Bapak ngan Aku.”