Read Central Malay YUHANIS 13 Bible Online

YUHANIS 13 - Central Malay bible

YUHANIS 13

¹Mbak pagi di aghiau aghi rerayau Paska ka lasung, Yesus la keruan, bansau masauNyau la sampai Diau ninggalka deniau ini njenguak Bapa'Au. Yesus la nyayangi anak-buaHau, mangku Diau maju nyayangi ughangtu enggut pengabisanNyau.

²Yesus ngan anak-buaHau dang makan malam. Iblis la mbisi'i Yudas Iskariut, anak Simun, supayau diau njualka Yesus.

³Yesus keruan, bansau Bapa'Au la ngenjuakka gegalaunyau ngan Diau. Diau pulau keruan Diau asalau jak di Allah ngan baliak agi ke Allah.

⁴Mangku Yesus betegak ngelucungka bajuAu. Diau ngambiak anduk, dikainkanyau.

⁵La udim itu Diau ncughuaka ayiak dalam capa mangku mulai mbasua keting anak-buaHau, dikusu'iNyau ngan anduk diau dikainkatu.

⁶Mangku Diau sampai di Simun Pitrus. Pitrustu bekatau, “Tuhan, baghia Dighi mbasua ketingku.”

⁷Katau Yesus, “Mbak kini kaba lum ngerti setu diau Kukerjauka ini, nanti kaba ka terti.”

⁸“Jangan, Tuhan,” Katau Pitrus, “Jangan Dighi gheghapati mbasua ketingku.” Katau Yesus, “Amun Aku nidau mbasua kaba, kaba nidau agi njadi anak-buaKu.”

⁹Katau Simun Pitrus, “Amun luak itu, Tuhan, jangan keting ajau, tapitu tangan ngan palakku pulau.”

¹⁰“Jemau diau la udim mandi la beresia gegalaunyau.” Katau Yesus. “Diau nidau nanti diberesiaka agi lain jak di ketingau. Kamu la beresia, anyautu nidau gegalau kamu.”

¹¹Yesus la keruan sapau ka njualkaNyau. Itula sebapau Diau ngiciakka, “Kamuni la beresia, anyautu nidau gegalau kamu.”

¹²La udim Yesus mbasua keting anak-buaHautu, Diau nyurumka bajuAu agi, mangku duduak sampai ngiciak ngan anak-buaHautu, katauNyau, “Apu kamu terti setu diau empai Kukerjauka ngan kamuni?

¹³Kamu betutugh ngan Aku Guru ngan Tuhan. Nyela nian, kamutu benagh, karnau Akula Diau.

¹⁴Amun Aku mbasua keting kamu, Akuni diau njadi Tuhan ngan Guru kamu, mangku kamu pulau sepantasau sangi mbasuhi keting.

¹⁵Aku la mbuat penauan batan endak kamu, supayau kamu mbuat semegi luak aku buat ngan kamu.

¹⁶Nyela nian katauKu ini: Sughang budak nidau lebia bekuasau jak di tuanau, mangku jemau diau diajung nidau lebia penting jak di jemau diau ngajungau.

¹⁷Kamu la keruan gegalaunyauni. Riang kamu, amun dikerjauka.

¹⁸Setu diau Kukiciakka, ukanau ngiciakka kamu gegalaunyau. Aku keruan, sapau-sapau diau la Kupilia. Anyautu setu diau ditulis di Injil mesti tejadi: ‘Jemau diau la makan ngan Aku ka melawan Aku.’

¹⁹Aku ngiciakkanyau ngan kamu mbak kini antak ka tejadi, supayau amun titu tejadi kelau, kamu percayau, bansau Akunila Diau.

²⁰Ngenian katauKu ini: Jemau diau nerimau jemau diau Kuajung, nerimau Aku. Mangku jemau diau nerimau Aku nerimau Allah diau ngajung Aku.”

²¹La udim Yesus ngiciakka luak itu, peghasauanNyau madak nian, mangku Diau bekatau, “KatauKuni benagh nian: Sughang jak di kamuni ka njualka Aku.”

²²Anak-buaHau sangi kina'i ngan kemangan, karnau nidau keruan, sapau diau dikiciakkaNyautu.

²³Anak-bua diau disayangiNyau duduak di guak sebela kananAu.

²⁴Simun Pitrus ngenjuakka tandau ngan jemautu ngajungau betanyau ngan Yesus, sapau diau dikiciakkaNyautu.

²⁵Jemau diau duduak pasigh Yesustu nyelinga'iNyau sampai betanyau, “Sapau, Tuhan?”

²⁶Mangku katau Yesus, “Jemau diau Kuenju'i ruti diau Kuceculka dalam pan, diautu jemaunyau.” Mangku Yesus ngambiak setepil ruti, diceculkaNyau dalam pan, dienjuakka ngan Yudas Iskariut, anak Simun.

²⁷La udim Yudas nerimau rutitu, iblis masuak dalam ati Yudas, mangku Yesus ngiciak ngan diau, katauNyau, “Setu diau endak kaba kerjauka, kerjaukala gegancang.”

²⁸Nidau sughang kia jak di ughangtu diau duduak makan di situ terti, ngapau Yesus ngiciak luak itu ngan Yudas.

²⁹Adau diau nyangkau Yesus ngajung Yudas mbeli setu diau digunauka batan aghi rerayau, ngan ngenjuakka tanci ngan jemau serik, karnau Yudas tukang nyimpani tanci ughangtu.

³⁰La udim Yudas ngambiak ruti tadi, diau gegasip ngeluagh. Aghitu la malam.

³¹La udim Yudas pegi, Yesus bekatau, “Mbak kini Anak Manusiau diagungka, mangku Allah pulau diagungka karnau Diau.

³²Amun Allah diagungka karnau Diau, Allah ka ngagungka Diau pulau karnau diriAu. Nyela, Allah ka cepat ngagungkaNyau.

³³Ai, anak-buaKu, tigha jerang agi Aku adau guak kamu. Kamu ka ndala'i Aku. Luak Aku la ngiciak ngan jemau Yahudi, Aku ngiciak pulau ngan kamu mbak kini, ‘Ke bada Aku pegi kamu nidau pacak datang.’

³⁴Aku ngiciakka perinta empai ngan kamu: Kamu sangi sayangila sughang ngan diau lain. Aku la nyayangi kamu. Luak itula pulau kamu mesti sangi sayangi.

³⁵Amun kamu sangi sayangi, gegalau jemau ka keruan, bansau kamu anak-buaKu.”

³⁶Mangku Simun Pitrus betanyau, “Tuhan, Dighi endak pegi ke manau?” Katau Yesus, “Ke bada Aku pegi, kaba nidau pacak ngikut Aku mbak kini, anyautu nanti kaba ka ngikut Aku.”

³⁷Pitrus betanyau agi, “Tuhan, ngapau Aku nidau pacak ngikut Dighi mbak kini? Aku endak ngenjuakka nyawauku batan endak Dighi!”

³⁸Katau Yesus, “Luak manau kaba endak ngenjuakka nyawau kaba batan endak Aku? Aku bekatau sebenaghau: Antak ka ayam bekukuak, kaba la tigau kali nidau ngaku'i Aku.”