Read Central Malay YUHANIS 15 Bible Online

YUHANIS 15 - Central Malay bible

YUHANIS 15

¹“Akuni umpamau batang anggur diau asli, mangku BapakKu tukang sayiau.

²Bilang cangka di Aku diau nidau bebua diteta'Au, mangku bilang cangka diau bebua diberesiaka, supayau buahau tamba lebat.

³Kamu la diberesiaka karnau kici'anKu diau la Kukiciakka ngan kamu.

⁴Mendamla kamu di Aku, mangku Aku mendam di kamu. Cangka nidau pacak bebua, amun nidau maju di batang anggur. Luak itula pulau kamu nidau pacak bebua, amun nidau mendam di Aku.

⁵Akunila batang anggur, kamunila cangka-cangkahau. Jemau diau mendam di Aku ngan Aku di diau, jemautu ka banyak buahau. Amun Aku nidau nulung, kamu nidau pacak mbuat tuapau-apau.

⁶Jemau diau nidau mendam di Aku dicapakka keluagh luak cangka, mangku njadi keghing. La udim ditunggalka jemau, dicapakka ke dalam api, mangku mutung.

⁷Amun kamu maju mendam di Aku ngan kici'anKu maju di ati kamu, pintakla tuapau kila kamu endak, mangku kamu ka dienju'i.

⁸Amun kamu bebua banyak, kamu njadi anak-buaKu nian. Ngan carau luak itu BapakKu diagungka.”

⁹“Aku sayang ngan kamu luak Bapak sayang ngan Aku. Jangan nyimpang jak di sayangKu.

¹⁰Amun kamu nuruti perintaKu, Aku maju sayang ngan kamu. Itu semegi ngan Aku nuruti perinta BapakKu, mangku Bapak maju sayang ngan Aku.

¹¹Gegalaunyau Kukiciakka ngan kamu, supayau keinji'anKu adau di ati kamu, mangku kamu injiak nianan.

¹²Inila perintaKu: Kamu mesti sangi sayangi, luak Aku la nyayangi kamu.

¹³Jemau diau sayang nianan ngan kantinau, jemau itu nyeraka nyawaunyau batan endak kantinau.

¹⁴Kamuni kantinKu, amun kamu ngerjauka tuapau diau Kuperintaka ngan kamu.

¹⁵Kamu nidau agi Kukiciakka budak, karnau budak nidau keruan, setu diau dikerjauka tuanau. Kamu Kukiciakka kantin, karnau gegalaunyau diau Kudengagh jak di Bapak la Kukiciakka ngan kamu.

¹⁶Ukan kamuni diau milia Aku. Aku diau milia kamu. Aku ngajung kamu pegi ngan bebua banyak, bua diau ka ta'an. Mangku setu diau kamu pintak atas namauKu dienjuakka Bapak ngan kamu.

¹⁷Inila perintaKu ngan kamu: Sangi sayangila kamu.”

¹⁸“Amun deniau luat ngan kamu, keruanila, Aku jak di senitu la diluatka deniau.

¹⁹Misalau kamu semegi ngan jemau di deniau, cengki deniau ka nyayangi kamu, karnau kamu semegi ngan deniau. Anyautu karnau Aku la milia kamu jak di deniauni, kamu ukan semegi ngan deniau. Itula sebapau deniau luat ngan kamu.

²⁰Ingatkala setu diau la Kukiciakka ngan kamu: Sughang budak nidau lebia bekuasau jak di tuanau. Amun ughangtu la nganiayau Aku, ughangtu ka nganiayau kamu pulau. Amun ughangtu la nuruti kici'anKu, ughangtu ka nuruti kici'an kamu pulau.

²¹Gegalaunyau ka dikerjauka ughangtu ngan kamu, karnau kamu anak-buaKu, karnau ughangtu nidau keruan Allah diau ngajung Aku.

²²Misalau Aku nidau datang ngan nidau ngiciakka gegalaunyau ngan ughangtu, ughangtu nidau besala. Anyautu mbak kini nidau bediau tapakan agi batan dusau ughangtu.

²³Jemau diau meluatka Aku, meluatka BapakKu pulau.

²⁴Misalau di guak ughangtu Aku nidau ngerjauka setu diau lum kekela dikerjauka jemau, ughangtu nidau besala. Mbak kini ughangtu la nginak gegalaunyau diau Kukerjauka, anyautu ughangtu meluatka Aku ngan BapakKu.

²⁵Nyela, semestiau luak itu, mangku setu diau la ditulis dalam kitab Taurat ughangtu ditepati: ‘Ughangtu meluatka Aku nidau bediau tapakan.’

²⁶Aku ka ngajung Penulung njenguak kamu diau asalau jak di Bapak. Diau ka nyatauka Allah sebenaghau. Amun Diau datang, Diau ka ngiciakka Aku.

²⁷Mangku kamu pulau mesti ngiciakka Aku, karnau kamuni la seghundak ngan Aku jak di senitu.