Read Central Malay YUHANIS 16 Bible Online

YUHANIS 16 - Central Malay bible

YUHANIS 16

¹Gegalaunyautu la Kukiciakka ngan kamu, mangku kamu jangan mandak percayau ngan Aku.

²Kamu ka dikeluaghka jak di ghuma sembayang, mangku ka sampai masaunyau, jemau diau mbunua kamu, nyangkau diau melemakka ati Allah.

³Ughangtu ka ngerjauka gegalaunyautu, karnau ughangtu nidau keruan BapakKu ngan Aku.

⁴Anyautu gegalaunyautu Kukiciakka ngan kamu, mangku amun masaunyau la sampai, kamu teghingat, bansau Aku la ngiciakkanyau ngan kamu.” “Pekarau ini nidau Kukiciakka ngan kamu jak di senitu, karnau Aku masia betunggal ngan kamu.

⁵Mbak kini Aku ka pegi njenguak BapakKu diau ngajung Aku. Nidau sughang kia jak di kamu betanyau ke manau Aku pegi.

⁶Mbak kini ati kamu njadi bingung, karnau Aku ngiciakka titu ngan kamu.

⁷Mangku Kukiciakka diau benagh ngan kamu: Amun Aku pegi, begunau ngan kamu. Misalau Aku nidau pegi, Penulung itu nidau ka datang njenguak kamu. Anyautu amun Aku pegi, Aku ka ngajung Diau njenguak kamu.

⁸Mangku amun Diau datang, Diau ka mbuktika deniau besala. Diau ka nyatauka Akuni benagh ngan Allah cetau ka ngukum deniau.

⁹Diau ka nyatauka ughangtu besala, karnau nidau percayau ngan Aku.

¹⁰Diau ka nyatauka Aku benagh, karnau Aku pegi njenguak Bapak, mangku kamu nidau nginak Aku agi.

¹¹Mangku Diau ka nyatauka pulau Allah la mulai ngukum, karnau penguasau deniauni la diukum.

¹²Gi banyak diau endak Kukiciakka ngan kamu, anyautu mbak kini kamu lum ka ta'an nerimaunyau.

¹³Amun Rua Allah itu datang, Diau nyatauka Allah itu benagh. Kamu ka dibimbingAu ngeruani gegalaunyau diau benagh. Diau nidau ka ngiciak jak di diriAu, anyautu Diau ka ngiciakka setu diau didengaghAu, mangku Diau ka ngiciakka ngan kamu setu diau ka tejadi nanti.

¹⁴Diau ka ngagungka Aku, karnau setu diau dikiciakkaNyau ngan kamu diterimauNyau jak di Aku.

¹⁵Gegalaunyau diau adau di Bapak adau pulau di Aku. Itula sebapau Aku bekatau: Setu diau dikiciakka Rua itu ngan kamu diterimauNyau jak di Aku.”

¹⁶“Tigha jerang ajau kamu nidau nginak Aku agi, lagi pulau tigha jerang agi, kamu ka nginak Aku.”

¹⁷Ndengagh titu anak-bua Yesus adau diau betanyau sughang ngan diau lain, “Tuapau retiau Diau ngiciak ngan kitau, ‘Tigha jerang ajau kamu nidau nginak Aku agi’, lagi pulau, ‘Tigha jerang agi, kamu ka nginak Aku’? Tuapau pulau retiau, ‘Aku pegi njenguak Bapak’?”

¹⁸Mangku katau ughangtu, “Tuapau retiau, ‘Tigha jerang ajau’? Kitau nidau terti Diau ngiciakka tuapau.”

¹⁹Yesus keruan, bansau anak-buaHautu endak betanyau ngan Diau, mangku Diau bekatau, “Apu kamu sangi kiciakka setu diau Kukiciakka tadi, Tigha jerang ajau kamu nidau nginak Aku agi, lagi pulau, Tigha jerang agi, kamu ka nginak Aku?

²⁰Kici'anKu ini benagh nian: Kamu ka nangis berandaian, anyautu deniau ka riang. Kamuni ka temas, anyautu temas kamutu ka beghuba njadi riang.

²¹Amun jemau tinau endak merunggu diau temas, karnau la masaunyau diau kesakitan. Anyautu amun anak la adau, diau nidau teghingat agi kesakitannyautu, karnau riang kupiak la adau.

²²Luak itula pulau ngan kamu: Mbak kini kamu dukau, anyautu Aku ka betemu agi ngan kamu, mangku ati kamu ka riang, mangku nidau sughang kia pacak ngambiak keriangan kamu.

²³Aghi itu kamu nidau ka betanyau tuapau-apau agi ngan Aku. Ngenian katauKu ini: Tuapau kila diau kamu pintak ngan Bapak atas namauKu, titu ka dienjuakka Bapak ngan kamu.

²⁴Enggut mbak kini kamu lum mintak tuapau-apau atas namauKu. Pintakla, mangku kamu ka dienju'i, mangku kamu injiak nian.”

²⁵“Gegalaunyau itu Kukiciakka ngan kamu pakai cuntau. Masaunyau ka sampai Aku nidau pakai cuntau agi, tapitu Aku ka ngiciakka Bapak ngan sebenaghau.

²⁶Masau itu kamu ka mintak ngan Bapak atas namauKu. Aku nidau njanjika mintak ngan Bapak batan endak kamu,

²⁷karnau Bapak pulau nyayangi kamu. Diau nyayangi kamu, karnau kamu nyayangi Aku ngan percayau, asalKu jak di Bapak.

²⁸Nyela, asalKu jak di Bapak, mangku Aku la datang ke deniau. Anyautu mbak kini Aku ninggalka deniauni endak baliak njenguak Bapak.”

²⁹Mangku anak-buaHau ngiciak ngan Yesus, kataunyau, “Mbak kini Dighi ngiciak ngan sebenaghau, nidau agi pakai cuntau.

³⁰Mbak kini kami keruan: Nidau nanti jemau betanyau ngan Dighi, karnau Dighi ngeruani gegalaunyau. Itula sebapau kami percayau asal Dighi jak di Allah.”

³¹Katau Yesus, “Mbak kini kamu percayau?

³²Ingatkala, masaunyau ka sampai mangku la sampai, gegalau kamuni ka larat, ka baliak ke ghuma sesughangan. Kamu ka ninggalka Aku sughang, anyautu Aku nidau sughang, karnau Bapak adau guak Aku.

³³Gegalaunyautu Kukiciakka ngan kamu, mangku kamu tenang sempernau, karnau seghundak ngan Aku. Di deniau kamu ka sengsarau, anyautu beghanikala ati kamu. Aku la ngalaka deniau.”