Read Central Malay YUHANIS 18 Bible Online

YUHANIS 18 - Central Malay bible

YUHANIS 18

¹La udim Yesus bedu'a luak itu, Diau ngeluagh jak di badaHau tadi ngan anak-buaHau pegi ke beghang ayiak Kidrun. Di situ adau kebun, mangku Yesus ngan anak-buaHau masuak ke kebun itu.

²Yudas, jemau diau njualka Yesus itu, keruan badaHau, karnau Yesus rajin betunggal ngan anak-buaHau di situ.

³Mangku Yudas pegi ke situ mbata'i serumbungan tentera jemau Rum ngan penjagau Ghuma Allah diau diajung imam-imam bepangkat tinggi ngan jemau Parisi. Ughangtu mbatak pakaian ngan lampu ngan ubur.

⁴Yesus la keruan gegalaunyau diau ka ditanggungkaNyau, mangku Diau masighi ughangtu ngan betanyau, “Kamutu ndala'i sapau?”

⁵Katau ughangtu, “Yesus, jemau Nasarit!” Katau Yesus, “Akunila Diau.” Yudas, jemau diau njualka Yesustu, betegak pulau di situ ngan ughangtu.

⁶Satu Yesus ngiciak, “Akunila Diau”, ughangtu mundur galau, mangku rubua ke tana.

⁷Yesus betanyau agi ngan ughangtu, “Kamu ndala'i sapau?” Katau ughangtu, “Yesus, jemau Nasarit!”

⁸“La Kukiciakka, Akunila Diau,” katau Yesus. “Amun kamutu ndala'i Aku nian, nengkela ughang ini pegi.”

⁹Luak itu dikiciakkaNyau, mangku ditepati setu diau la dikiciakkaNyau tadi, “Jak di ughangtu diau Dighi enjuakka ngan Aku, nidau sughang kia diau Kuenangka benasau.”

¹⁰Simun Pitrus diau mbatak pedang ncabut pedangautu, dikapakkanyau ngan budak Imam Besak mangku kutung telingau kananau. Namau budak itu Malkus.

¹¹Mangku Yesus bekatau ngan Pitrus, “Berangkaukala pedangtu! Apu kaba terupuak, Aku nidau mesti nanggung sengsarau diau la ditetapka Bapak ngan Aku?”

¹²Mangku tentera-tentera Rum ngan kumandanau ngan penjagau-penjagau diau diajung jemau Yahudi tadi nangkap Yesus ngan dikebat tanganAu.

¹³La udim itu Yesus dibata'i ngadap Hanas, karnau diau mentuau Kayapas diau njadi Imam Besak taun itu.

¹⁴Kayapas itula diau senitu ngici'i pengulu jemau Yahudi, “Iluakla sughang mati batan endak gegalau jemau.”

¹⁵Simun Pitrus ngan sughang kantinau ngikut Yesus. Anak-bua itu la kecinauan ngan Imam Besak, mangku diau ngikut Yesus masuak ke tengalaman ghuma Imam Besak tadi.

¹⁶Anyautu Pitrus di luagh pasigh mukau lawang, mangku kantinau tadi diau kecinauan ngan Imam Besak itu pegi keluagh ngiciak ngan tinau diau nunggui mukau lawangtu, mangku mbatak Pitrus masuak.

¹⁷Jemau tinau diau nunggui mukau lawangtu ngiciak ngan Pitrus, “Ukan kaba pulau anak-bua Jemau itu?” “Ukan!” Katau Pitrus.

¹⁸Karnau malam itu dingin, budak-budak ngan penjagau-penjagau Ghuma Allah ningguakka api, mangku ughangtu bediang guak api itu. Pitrus bediang pulau guak ughangtu.

¹⁹Mangku Imam Besak mulai nanyaui Yesus ceritau anak-buaHau ngan ajaghanNyau.

²⁰Yesus nimbal, katauNyau, “Aku maju ngiciak ngan terang-terangan di mukau jemau banyak. Aku maju ngajagh di ghuma sembayang ngan di Ghuma Allah pulau, bada jemau Yahudi betunggal. Nidau kekela Aku mbunika kici'anKu.

²¹Ngapau dighi nanyaui Aku? Tanyauila ughang diau la ndengagh Aku ngajagh. Cengki ughangtu keruan setu diau Kukiciakka.”

²²Yesus ngiciak luak itu, mangku sughang penjagau diau betegak di situ nampagh dayiAu ngan bekatau, “Beghani nian Kaba ngiciak luak itu ngan Imam Besak!”

²³Yesus nimbal, “Amun Aku ngiciakka setu diau sala, kiciakkala tuapau salahau. Anyautu amun diau Kukiciakka itu benagh, ngapau kaba nampagh Aku?”

²⁴Mangku Hanas ngajung jemau mbatak Yesus diau dikebat tanganAu ke Imam Besak Kayapas.

²⁵Simun Pitrus gi bediang di situ. Adau jemau diau ngiciak ngan diau, “Ukan kaba pulau anak-bua Jemau itu?” Pitrus nidau ngaku'i Yesus, “Ukan!” kataunyau.

²⁶Mangku sughang budak Imam Besak diau masia busuran ngan jemau diau telingaunyau dikapak Pitrus tadi bekatau, “Asauku aku nginak kaba di kebun tadi seghundak ngan Diau.”

²⁷Pitrus ngulang nidau ngaku'i Yesus, “Ukan!” kataunyau. Mangku masau itula pulau ayam bekukuak.

²⁸Gi akap nian Yesus dibatak jak di ghuma Kayapas ke bada gubernur. Jemau Yahudi nidau masuak ke bada gubernur itu, mangku nidau aram, karnau ughangtu endak ngikut makan Paska.

²⁹Karnau itu Pilatus ngeluagh njenguak ughangtu ngan betanyau, “Tuapau sala Jemau ini ngan kapu dighi?”

³⁰Ughangtu nimbal, “Amun Jemau ini nidau besala, nidau kami bata'i njenguak dighi.”

³¹Pilatus bekatau ngan ughangtu, “Batakla Diauni, adilila nurut ukum Taurat kapu dighi!” Jemau Yahudi itu nimbal, “Kami nidau bulia ngukum jemau ngan ukuman mati.”

³²Mangku luak itula kici'an Yesus ditepati ngiciakka caraunyau Diau ka mati.

³³La udim itu Pilatus masuak agi ke bada gubernur. Diau mantau Yesus mangku betanyau, “Kabani Rajau jemau Yahudi?”

³⁴Yesus nimbal, “Apu kici'an dighitu nurut rupu'an dighi, apu jemau lain ngiciakka ngan dighi ceritau Aku?”

³⁵Katau Pilatus, “Apu akuni jemau Yahudi? Bangsau Kabatula ngan imam-imam bepangkat tinggi diau nyeraka Kaba ngan aku. Tuapau perembak Kaba?”

³⁶Katau Yesus, “KekuasauanKu ukan jak di deniau ini. Misalau kekuasauanKu jak di deniauni, cetau anak-buaKu ka beusaha, supayau Aku jangan diseraka ngan pengulu jemau Yahudi. Tapitu kekuasauanKu ukan jak di deniau ini.”

³⁷Mangku Pilatus betanyau agi ngan Diau, “Amun luak itu, Kaba rajau?” Timbal Yesus, “Nyela, katau dighi Akunila rajau. Aku lahir ngan datang ke deniau ini batan endak ngiciakka diau benagh. Bilang jemau diau asalau jak di diau benagh ndengaghka kici'anKu.”

³⁸Pilatus betanyau agi ngan Diau, “Tuapau retiau diau benagh itu?” Mangku Pilatus ngeluagh agi ngan ngiciak ngan jemau Yahudi tadi, “Nidau bediau semecam kia salaHau di Diau.

³⁹Anyautu nurut kebiasauan kapu dighi idang taun masau aghi Paska aku mbibaska sughang kawalan. Kapu dighi tetuju aku mbibaska Rajau jemau Yahudi batan endak kapu dighi?”

⁴⁰Ughangtu nimbal ngan tegauk-gauk, “Nidau! Jangan Diau! Barabas ajau!” Barabastu sughang bandit.