Read Central Malay YUHANIS 4 Bible Online

YUHANIS 4 - Central Malay bible

YUHANIS 4

¹Jemau Parisi ndengagh, banyakla Yesus bulia anak-bua sangkan Yuhanis, mangku dibaptiskaNyau.

²Sebenaghau Yesus nidau mbaptis, anak-buaHau ajau diau mbaptis.

³Jak Yesus keruan, bansau jemau Parisi ndengagh ceritau itu, Diau pegi jak di Yudia baliak ke Galilia.

⁵Mangku Yesus sampai di sebua kuta di Samaria, namaunyau Sikar. Kutatu pasigh tana diau dienjuakka Yakub senitu ngan Yusup ana'au.

⁶Di guak itu adau pawuak Yakub. Yesus kekerian, karnau la jawua bejalan, mangku Diau duduak di tepi pawuak. Aghi la tengaghi.

⁷Anak-buaHau pegi masuak kuta endak mbeli makanan. Mangku sughang tinau Samaria datang endak ngambiak ayiak. Yesus bekatau, “Aku mintak minum.”

⁸

⁹Katau tinau Samaria itu, “Dighi jemau Yahudi, aku jemau Samaria. Ngapau Dighi mintak minum ngan aku?” Karnau jemau Yahudi nidau seilu'an ngan jemau Samaria.

¹⁰Timbal Yesus, “Amun kaba keruan, tuapau diau dienjuakka Allah, ngan sapau diau mintak minum ngan kaba, cengki kaba mintak ngan Diau, mangku Diau ka ngenju'i kaba ayiak diau ngenjuakka idup.”

¹¹Katau jemau tinautu, “Dighi nidau bediau timbau, lagi pulau pawuak ini dalam nianan. Jak di manau Dighi bulia ayiak diau ngenjuakka idup itu?

¹²Yakub, niniak puyang kami, ninggali kami pawuak ini. Diau ngambiak ayiak minum jak di sini, luak itu pulau anak-ana'au ngan benatang ingunannyau. Apu Dighi kirau, besakla Dighi sangkan Yakub?”

¹³Timbal Yesus, “Jemau diau minum ayiak ini ka aus agi.

¹⁴Jemau diau minum ayiak diau ka Kuenjuakka nidau ka aus agi selelamaunyau. Ayiak diau Kuenjuakkatu ka njadi matau-ayiak dalam idupau diau maju mancagh, mangku ngenjuakka idup selelamaunyau ngan jemau itu.”

¹⁵Katau tinautu, “Enju'ila aku ayiak itu, mangku aku nidau aus agi ngan nidau nanti ngulang ke sini endak ngambiak ayiak.”

¹⁶Mangku katau Yesus, “Pegila, jenguakla laki kaba, mangku ngulang ke sini batak laki kaba.”

¹⁷Tinautu nimbal, “Akuni nidau bediau laki.” “Awu, nyela nian,” katau Yesus,

¹⁸“Kaba la limau ikuak laki, mangku laki kaba mbak kini ukanau laki kaba. Nyela nian, kaba nidau bediau laki.”

¹⁹“Mbak kini aku keruan Dighi sughang nabi”, katau tinautu.

²⁰“Niniak puyang kami nyemba Allah di bukit ini, anyautu jemau kapu dighi ngiciakka, di Yerusalim ajau bada jemau nyemba Allah.”

²¹“Percayaula,” katau Yesus, “Masaunyau ka sampai jemau ka nyemba Bapak ukan di bukit ini, ukan pulau di Yerusalim.

²²Kamu jemau Samaria nyemba setu diau nidau keruan ngan kamu. Anyautu kami jemau Yahudi nyemba Allah diau keruan ngan kami, karnau keselamatan asalau jak di jemau Yahudi.

²³Masaunyau ka sampai, mangku la sampai mbak kini, jemau ka nyemba Bapak ngan kuasau Rua Allah luak Diau nyatauka diriAu. karnau Bapak endak disemba luak itu.

²⁴Allah itu Rua, mangku jemau diau nyemba Allah mesti nyemba Diau ngan rua luak Diau nyatauka diriAu.”

²⁵Tinautu nimbal, kataunyau, “Aku keruan Rajau Penyelamat diau pulau dikiciakka Keristus ka datang. Amun Diau datang, Diau ka ngiciakka gegalaunyau ngan kitau.”

²⁶Katau Yesus, “Akunila Diau, diau dang ngiciak ngan kaba.”

²⁷Masau itu anak-bua Yesus datang, mangku ughangtu kemangan nginak Yesus ngiciak ngan jemau tinau. Anyautu nidau bediau sughang kia diau betanyau ngan tinautu, “Kaba endak tuapau?” ngan nidau bediau diau betanyau ngan Yesus, “Ngapau Dighi ngiciak ngan tinautu?”

²⁸Mangku tinautu ninggalka guciau di situ pegi ke kuta mangku ngiciak ngan jemau di kutatu, kataunyau,

²⁹“Mela, nginak jemau diau ngiciakka ngan aku gegalaunyau diau la kukerjauka. Asauku Diau itula Keristus!”

³⁰Mangku ughangtu keluagh kuta pegi njenguak Yesus.

³¹Penarau itu anak-buaHau ngajak Yesus makan, “Mela, makan”, katau ughangtu.

³²Yesus bekatau, “Aku adau makanan diau lum keruan ngan kamu.”

³³Mangku anak-buaHautu sangi tanyaui, “Apu adau jemau mbatak makanan batan endak Diau?”

³⁴Katau Yesus, “MakananKu ngerjauka kendak Allah diau ngajung Aku, mangku ngudimi kerjau diau diserakaNyau ngan Aku.

³⁵Katau jemau: ‘Empat bulan agi pangkau ngetam’, anyautu Aku bekatau ngan kamu: Kina'ila di sekitar kamu padi la nguning, la masak, la iluak diketam.

³⁶Mbak kini jemau diau ngetam la nerimau upahau, diau melungguakka asilau batan endak idup empai selelamaunyau, mangku jemau diau nanam ngan jemau diau ngetam semegi riangau.

³⁷Rimbayan ini benagh nian: ‘Diau sughang nanam, diau lain ngetam.’

³⁸Akuni ngajung kamu ngetam di umau diau nidau kamu kerjauka. Jemau lain ngerjaukanyau, mangku kamu datang ngetam asil kerjau ughangtu.”

³⁹Banyak jemau Samaria jak di kuta itu percayau ngan Yesus, karnau kici'an tinau tadi, “Diau ngiciakka ngan aku gegalau perembak diau la kukerjauka itu.”

⁴⁰Jemau Samaria itu betemu ngan Yesus, mintak nian Diau mendam guak ughangtu. Mangku Diau temalam di situ duau malam.

⁴¹Mangku banyak agi jemau diau percayau, karnau kici'an Yesus.

⁴²Ughangtu ngiciak ngan tinautu, kataunyau: “Mbak kini kami percayau, ukanau karnau kici'an kaba ajau, anyautu karnau kami la ndengagh ngan la keruan, Diau inila nian Penyelamat deniau.”

⁴³La udim duau malam Yesus pegi jak di situ ke Galilia.

⁴⁴Diau la ngiciak, bansau sughang nabi nidau diregaui di badahau sendighi.

⁴⁵Mangku la sampai di Galilia, jemau Galilia pulau nyambut Diau, karnau ughangtu la nginak gegalaunyau diau dikerjaukaNyau di Yerusalim masau aghi rerayau Paskatu, karnau ughangtu pulau adau di situ.

⁴⁶Mangku Yesus ngulang ke Kana di Galilia. Di situ Diau senitu nguba ayiak njadi anggur. Di Kapernaum adau sughang pekerjau rajau, ana'au dang buidapan.

⁴⁷Diau la ndengagh, Yesus la sampai jak di Yudia ke Galilia. Diau pegi njenguak Yesus, mangku ngenda'i Diau datang meghadui ana'au, karnau ana'autu laka mati.

⁴⁸Yesus ngiciak ngan diau, katauNyau, “Nidau bediau jemau di sini diau endak percayau, amun nidau nginak tandau buktiau diau nyelia.”

⁴⁹Pekerjau rajautu bekatau, “Mela ke ghumaku, empungan anakku lum mati!”

⁵⁰Katau Yesus, “Baliakla, anak dighitu la ghadu!” Jemautu percayau nian ngan kici'an Yesus diau dikiciakkaNyautu, mangku baliak.

⁵¹Diau gi adau di tenga jalan, mangku betemu ngan anak-buahau mbatak kebar, mbak bansau ana'au la adau jugau.

⁵²Mangku diau betanyau, kebilau diau adau jugau. Katau ughangtu, “Lingsir tengaghi kemaghi demamau ghadu.”

⁵³Mangku bapa'autu teghingat, bansau masau itula Yesus bekatau ngan diau, “Anak dighi la ghadu.” Mangku percayau diau. Diau seghuma percayau galau.

⁵⁴Inila tandau keduau diau dikerjauka Yesus, masau diau baliak ke Galilia jak di Yudia.