Read Central Malay YUHANIS 5 Bible Online

YUHANIS 5 - Central Malay bible

YUHANIS 5

¹La udim itu adau aghi rerayau jemau Yahudi, mangku Yesus pegi ke Yerusalim.

²Di Yerusalim guak mukau lawang Bebiri adau sutiak kulam, namaunyau Betesda dalam basau Ibrani. Di situ adau limau anggung-anggung.

³Di anggung itu jemau banyak tebadai karnau buidapan. Adau jemau butau, jemau kincut, jemau lumpua pulau diau dang nungguka ayiak kulam tadi belimbang,

⁴karnau kekadangan malaikat Tuhan tughun ke kulamtu melimbangka ayiaktu. Mangku jemau buidapan diau dulu sekali masuak, la udim ayiak kulamtu dilimbangka, jemautu dighadui jak di gegalau idapannyau.

⁵Di situ adau sughang jemau diau buidapan la tigau pulua delapan taun.

⁶Yesus nginak jemautu tebadai di situ. Diau keruan, bansau jemau itu la lamau buidapan, mangku betanyau, “Apu dighi endak ghadu?”

⁷Jemau buidapan itu nimbal, kataunyau, “Nidau bediau jemau diau masuakka aku ke kulamtu, amun ayiak itu dang belimbang. Mangku penarau aku nuju kulamtu, jemau lain la ndului masuak.”

⁸Katau Yesus, “Betegakla dighi, ambiakla tikagh dighi mangku bejalanla!”

⁹Masau itula pulau jemautu ghadu, Diau ngambiak tikaghau mangku bejalan. Aghitu aghi Sabat.

¹⁰Karnau itu tuau-tuau jemau Yahudi ngiciak ngan jemau diau empai dighaduitu, kataunyau, “Aghi ini aghi Sabat. Nidau bulia kaba ngatangka tikagh.”

¹¹Katau jemau diau empai dighadui, “Jemau diau meghadui aku bekatau ngan aku: ‘Ambiakla tikagh mangku bejalanla.’ ”

¹²Ughangtu betanyau, “Sapau diau ngajung kaba ngambiak tikagh ngan bejalan?”

¹³Anyautu jemau diau empai dighaduitu nidau keruan sapau jemautu, karnau Yesus la lengit di pugan jemau banyak diau adau di situ.

¹⁴La udim itu Yesus betemu ngan jemau tadi di Ghuma Allah ngan bekatau ngan diau, “Mbak kini dighi la ghadu. Jangan dighi mbuat dusau agi, supayau dighi jangan ngalami setu diau lebia pansan.”

¹⁵Mangku jemautu pegi nceritauka ngan tuau-tuau jemau Yahudi, bansau jemau diau meghaduinyautu Yesus.

¹⁶Itula sebapau tuau-tuau jemau Yahudi mulai meluatka Yesus, karnau Diau meghadui jemau masau aghi Sabat.

¹⁷Yesus ngiciak ngan ughangtu, katauNyau, “BapakKu maju nulung jemau enggut mbak kini, mangku Aku pulau nulungi jemau.”

¹⁸Karnau kici'anNyautu tuau-tuau jemau Yahudi tamba beusaha endak mbunua Yesus. Ughangtu endak mbunua Yesus ukan ajau, karnau Diau melanggar adat lembagau aghi Sabat, anyautu pulau karnau Diau ngiciakka, bansau Allah itu Bapa'Au. Amun luak itu, Diau nyamauka diriAu ngan Allah.

¹⁹Mangku Yesus ngiciak agi ngan ughangtu, katauNyau, “Nyela nian kici'anKu ini: Anak nidau pacak ngerjauka tuapau-apau ngan kenda'Au sendighi. Diau ngerjauka ajau setu diau dikina'Au diau dikerjauka Bapak, karnau setu diau dikerjauka Bapak, itula pulau dikerjauka Ana'Au.

²⁰Bapak nyayangi Ana'Au. Karnau itu Diau nunjuakka ngan Diau gegalaunyau diau dikerjaukaNyau. Diau ka nunjuakka ngan Diau agi kerjau diau lebia penting, mangku kapu dighi kemangan.

²¹Karnau luak Bapak ngidupka jemau mati, mangku dienjuakkaNyau idup empai, luak itula pulau Anak ngenjuakka idup ngan jemau diau endak Anak enjuakka idup.

²²Bapak nidau ngadili sughang kia. Kuasau ngadili la dienjuakkaNyau galau ngan Ana'Au,

²³mangku Anak diregaui gegalau jemau luak Bapak diregaui. Jemau diau nidau meregaui Anak itu, jemautu pulau nidau meregaui Bapak diau ngajung Ana'Au.

²⁴Kici'anKu ini benagh: Jemau diau ndengagh ngan nuruti kici'anKu, mangku percayau ngan Allah diau ngajung Aku, jemautu la ngempu idup empai selelamaunyau. Diau nidau ka diukum. Diau la ngalia jak di mati ke idup.

²⁵Percayaula, masaunyau ka sampai, mbak kini la sampai, jemau mati ka ndengagh suarau Anak Allah, mangku jemau diau ndengaghkanyau ka idup.

²⁶Karnau luak Bapak adau kuasau ngidupka, luak itula pulau Diau ngenjuakka ngan Ana'Au kuasau ngidupka.

²⁷Mangku Diau pulau la ngenjuakka ngan Diau kuasau ngadili, karnau Diautu Anak Manusiau.

²⁸Jangan kapu dighi kepagauan ngan kici'anKu tadi. Masaunyau ka sampai gegalau jemau mati ka ndengaghka suarauNyau,

²⁹mangku ngeluagh jak di kuburan. Jemau diau la bebuat iluak ka ngeluagh, mangku bulia idup empai. Anyautu jemau diau bebuat ja'at ka ngeluagh nerimau ukuman.”

³⁰“Akuni nidau pacak ngerjauka tuapau-apau nurut kendakKu sendighi. Aku ngadili nurut setu diau la Kudengagh. Mangku keputusanKu benagh, karnau Aku nidau nuruti kendakKu sendighi, tapitu kendak Allah diau ngajung Aku.

³¹Amun Aku ngiciakka diri Aku, kici'an itu nidau bediau buktiau.

³²Adau jemau lain diau ngiciakka Aku. Aku keruan kici'annyautu benagh.

³³Kapu dighi la ngajung jemau njenguak Yuhanis, mangku Yuhanis la ngiciakka Aku setu diau benagh.

³⁴Aku ngiciakka titu, ukan karnau Akuni endak tandau jak di jemau, anyautu supayau kapu dighi diselamatka.

³⁵Yuhanis luak lampu diau maghak ngan besinagh, anyautu kapu dighi riang ngan cayautu jerang ajau.

³⁶Anyautu Akuni adau tandau bukti lain pulau, pentingla diau sangkan kici'an Yuhanistu. Setu diau la dienjuakka Bapak ngan setu diau Kukerjauka mbak kini nyatauka Aku diajung Bapak.

³⁷Bapak la ngajung Aku. Diautu pulau nceritauka sapau Akuni. Kapu dighi lum kekela ndengaghka suarauNyau, lum pulau kekela nginak rupauNyau,

³⁸mangku kici'anNyau nidau netap di ati kapu dighi, karnau kapu dighi nidau percayau ngan Ana'Au diau diajungAu.

³⁹Kapu dighi melajaghi Kitab Injil, sangkauan kapu dighi carau inila bulia idup empai selelamaunyau. Injiltu nceritauka Aku,

⁴⁰anyautu kapu dighi enggup datang njenguak Aku, mangku bulia idup itu.

⁴¹Aku ukan ndalak puji ngan jemau.

⁴²Aku keruan kapu dighi, Aku keruan kapu dighi nidau nyayangi Allah dalam ati.

⁴³Akuni datang dalam namau BapakKu, mangku kapu dighi enggup nerimau Aku. Amun adau jemau lain datang dalam namaunyau sendighi, kapu dighi endak nerimaunyau.

⁴⁴Kapu dighi ndalak puji jak di sughang ngan diau lain, nidau beusaha ndalak puji jak di Allah diau Esa. Luak manau kapu dighi pacak percayau?

⁴⁵Jangan kapu dighi sangkau Aku ka nyalaka kapu dighi di adapan Bapak. Diau nyalaka kapu dighi itu Musa diau kapu dighi aghapka.

⁴⁶Amun kapu dighi percayau nian ngan Musa, cengki kapu dighi percayau pulau ngan Aku, karnau diau ngiciakka Aku.

⁴⁷Kapu dighi nidau percayau ngan setu diau ditulisau, luak manau kapu dighi endak percayau ngan setu diau Kukiciakka?”