Read Central Malay YUHANIS 7 Bible Online

YUHANIS 7 - Central Malay bible

YUHANIS 7

¹La udim itu Yesus pegi ngidari Galilia. Diau enggup ke Yudia, karnau tuau-tuau jemau Yahudi di situ merencanauka endak mbunua Diau.

²Masau itu laka masau aghi rerayau Punduk, aghi rerayau jemau Yahudi.

³Mangku ading-beghadingAu ngiciak ngan Yesus, kataunyau, “Pegila jak di sini ke Yudia, mangku pengikut Dighi di situ nginak pulau setu diau Dighi kerjauka.

⁴Karnau nidau bediau jemau diau mbunika setu diau dikerjaukanyau, amun diau endak, supayau jemau keruan sapau diau. Amun Dighi ngerjauka kerjau luak itu, gegalau deniau mesti keruan.”

⁵Karnau ading-beghadingAu ajau nidau percayau ngan Diau.

⁶Katau Yesus ngan ughangtu, “MasauKu lum sampai. Amun kamu pacak kebilau ajau.

⁷Jemau di deniauni nidau ka adau meluatka kamu. Anyautu Aku diau diluatka jemau, karnau Aku maju ngiciakka ngan jemau, bansau peremba'au ja'at.

⁸Pegila kamu ajau ke reramian itu. Akuni lum pegi, karnau lum masaunyau batan endak Aku.”

⁹Luak itula kici'an Yesus ngan ading-beghadingAu, mangku Diau mendam di Galilia.

¹⁰Ading-beghadingAu la bejalan ke jamuan aghi rerayau. Mangku ngan diam-diam Yesus pegi pulau ke situ, nidau keruan ngan jemau.

¹¹Selamau aghi rerayautu tuau-tuau jemau Yahudi ndala'i Yesus ngan betanyau, “Di manau jemau itu?”

¹²Mangku banyak jemau bebisi'an. Adau diau ngiciakka, “Diautu jemau iluak.” Adau pulau diau ngiciakka, “Nidau, Diautu nyesatka jemau banyak.”

¹³Anyautu nidau bediau jemau diau beghani ngiciakka Diau ngan teterangan, karnau takut ngan tuau-tuau jemau Yahudi.

¹⁴La mbelahan masau aghi rerayautu, Yesus masuak ke Ghuma Allah, mangku mulai ngajagh.

¹⁵Tuau-tuau jemau Yahudi kemangan ngan bekatau, “Luak manau jemau ini pacak ngeruani Kitab Suci awuak endiak sekul?”

¹⁶Yesus nimbal, “Diau Kuajaghkani ukanau ajaghanKu, anyautu ajaghan Allah diau ngajung Aku.

¹⁷Jemau diau endak nuruti kendak Allah ka keruan, apu ajaghanKuni asalau jak di Allah, apu jak di Aku.

¹⁸Jemau diau ngajaghka ajaghannyau sendighi mintak diregaui batan endak diriau sendighi, anyautu jemau diau ndalak pujian batan endak jemau diau ngajungau diautu benagh, nidau endak nian mbu'ung.

¹⁹Ukanau Musa la ngenjuakka ukum Taurat ngan kapu dighi? Anyautu nidau bediau sughang kia diau nuruti ukum Taurat itu. Ngapau kapu dighi endak mbunua Aku?”

²⁰Ughang banyaktu bekatau, “Kaba gilau. Sapau endak mbunua Kaba?”

²¹Mangku Yesus nimbal, katauNyau, “Empai semecam ajau diau Kukerjauka aghi Sabat, kapu dighi la kemangan galau.

²²Musa netapka peraturan besunat, mangku kapu dighi nyunatka anak aghi Sabat. Sebenaghau sunattu ukan asalau jak di Musa, tapitu jak di niniak puyang antak ka Musa.

²³Kapu dighi nyunatka masau aghi Sabat, mangku jangan melanggar ukum Musa. Amun luak itu, ngapau kapu dighi mara ngan Aku, karnau Aku meghadui gegalau badan sughang jemau masau aghi Sabat?

²⁴Janganla ngadili nurut setu diau kina'an, tapitu adilila ngan carau diau benagh.”

²⁵Adau jemau Yerusalim diau betanyau, kataunyau, “Ukanau Diaunila jemau diau didala'i endak dibunua?

²⁶Na, itu Diau. Diau ngiciak ngan sekenda'Au ajau di mukau jemau banyak, nidau bediau jemau diau ngiciakka tuapau-apau ngan Diau. Apu tuau-tuau kitau la nyadari, bansau Diaunila Keristus, Rajau Penyelamat?

²⁷Amun Keristus datang, nidau bediau jemau diau keruan jak di manau asalau, anyautu kitau keruan jak di manau asal jemau ini.”

²⁸Masau Yesus ngajagh di Ghuma Allah, Diau ngiciak ngan suarau bias, katauNyau, “Nyela, kapu dighi keruan sapau Akuni ngan jak di manau asalKu. Aku ukan datang ngan kendak Akunila. Aku diajung Allah diau benagh. Anyautu kapu dighi nidau keruan Diau.

²⁹Akuni keruan Diau, karnau asalKu jak di Allah, Diautu ngajung Aku.”

³⁰Masau itu ughangtu endak nangkap Yesus, anyautu nidau bediau jemau diau beghani ngecakka Diau, karnau lum masauNyau.

³¹Jak di jemau banyaktu banyak diau percayau ngan Diau. Ughangtu bekatau, “Amun Keristus datang, cengki nidau ka banyak tandau diau dikerjaukaNyau jak di diau dikerjauka jemau ini.”

³²Jemau jak di rumbungan jemau Parisi ndengagh jemau banyaktu mbisiakka Yesus luak itu. Karnau itu ughangtu ngan imam-imam bepangkat tinggi ngajung penjagau Ghuma Allah pegi nangkap Yesus.

³³Yesus ngiciak ngan jemau banyak di Ghuma Allah, katauNyau, “Tigha jerang agi Aku di guak kapu dighi. Udim itu Aku ka pegi njenguak diau ngajung Aku.

³⁴Kapu dighi ka ndala'i Aku, anyautu nidau ka betemu ngan Aku, karnau kapu dighi nidau pacak pegi ke bada di manau Aku adau.”

³⁵Mangku tuau-tuau jemau Yahudi sangi tanyaui, kataunyau, “Jemau ini endak pegi ke manau, mangku kitau nidau pacak betemu ngan Diau? Apu Diau endak pegi njenguak jemau diau merantau bada jemau Yunani endak ngajagh jemau Yunani?

³⁶Tuapau retiau kici'anNyauni: ‘Kapu dighi ka ndala'i Aku, anyautu nidau ka betemu ngan Aku,’ lagi pulau: ‘Kapu dighi nidau pacak pegi ke bada di manau Aku adau’?”

³⁷Aghi pengabisan masau rerayautu, aghi diau penting sekali, Yesus betegak dalam Ghuma Allah mangku ngiciak ngan suarau bias, katauNyau, “Jemau diau aus, jenguakla Aku mangku minumla!

³⁸Jemau diau percayau ngan Aku dikiciakka dalam Injil luak ini: Jak di dalam atiau ka adau matau-ayiak melilia diau ka ngenjuakka idup.”

³⁹Kici'an Yesus tadi ngiciakka Rua Allah diau ka dienjuakkaNyau ngan jemau diau percayau ngan Diau. Masau itu Rua Allah lum dienjuakka, karnau Yesus lum dinayiakka ngan diagungka.

⁴⁰Jemau banyaktu ndengagh kici'an Yesustu, mangku adau diau ngiciak, “Jemau ini cetau Nabi diau ka datang.”

⁴¹Diau lain bekatau, “Diauni Keristus, Rajau Penyelamattu.” Anyautu adau pulau diau bekatau, “Baghia Keristus datang jak di Galilia!

⁴²Dalam Injil ditulis, bansau Keristustu pengadau Rajau Daud, asalau jak di Betlihim, dusun Daud senitu.”

⁴³Mangku jemau banyaktu mulai bebala karnau Yesus.

⁴⁴Adau jemau diau endak nangkap Diau, anyautu nidau sughang kia beghani ngecakkaNyau.

⁴⁵Mangku penjagau Ghuma Allah diau diajung nangkap Yesus ngelipat agi. Imam-imam bepangkat tinggi ngan jemau Parisitu betanyau ngan ughangtu, kataunyau, “Ngapau kamu nidau mbata'i Diau ke sini?”

⁴⁶Katau penjagautu, “Ui, lum kekela adau jemau ngiciak luak Diautu!”

⁴⁷“Apu kamu pulau la disesatka jemau itu?” katau jemau Parisi tadi.

⁴⁸“Apu adau jak di tuau-tuau kitau ngan jemau Parisi diau percayau ngan Diau?

⁴⁹Jemau banyaktu nidau keruan ukum Taurat. Ughangtu la meghakau!”

⁵⁰Nikudimus, sughang jak di jemau Parisi tadi diau senitu njenguak Yesus, ngiciak ngan jemau Parisi lainau, kataunyau,

⁵¹“Nurut ukum Taurat kitau sughang jemau nidau bulia diukum, amun pekaraunyau lum keruan ngan peremba'au lum diperisau.”

⁵²“Apu kaba pulau jak di Galilia?” katau ughangtu. “Perisau ajaula Injil. Kaba ka keruan, nidau bediau nabi diau asalau jak di Galilia.”

⁵³Udim itu ughangtu baliak galau.