Read Central Malay YUHANIS 8 Bible Online

YUHANIS 8 - Central Malay bible

YUHANIS 8

²Pagi di aghiau akap nian Yesus pegi ke Ghuma Allah, banyak jemau datang njenguak Diau. Yesus duduak mangku mulai ngajagh.

³Masau itu guru-guru ukum Taurat ngan jemau Parisi njenguak Yesus mbatak sughang jemau tinau diau kedapatan menaugawia. Ughangtu ngajung jemau tinautu betegak di tetengaan,

⁴mangku bekatau ngan Yesus, “Pak Guru, jemau tinau ini kedapatan dang bebuat ja'at.

⁵Dalam ukum Taurat Musa ngiciakka, jemau tinau luak ini mesti disipati ngan batu enggut mati. Luak apau pendapat kaba?”

⁶Ughangtu betanyau luak ini endak ncubau nyalaka Yesus, mangku ughangtu pacak nyalakaNyau. Anyautu Yesus nunduak ajau ngan nuliska jaghiAu ke tana.

⁷Karnau ughangtu maju betanyau, Yesus betegak sampai bekatau, “Jemau diau nidau bedusau jak di kapu dighi, gila diau dulu sekali nyipatka batu ke tinau ini.”

⁸Mangku Yesus nunduak ngulang nulis agi di tana.

⁹La udim ndengagh Yesus ngiciak luak itu, ughangtu pegi ninggalka bada itu sejagh sughang mulai ngan diau tuau. Udim-udimau tigha Yesus sughang di situ ngan jemau tinau tadi diau masia betegak di badahau.

¹⁰Yesus betegak ngiciak ngan tinautu, “Ui, kaba, di manau gegalau jemau tadi? Nidau bediau diau ngukum kaba?”

¹¹“Nidau.” katau tinautu, “Iluakla,” katau Yesus, “Aku pulau nidau ngukum kaba. Mbak kini pegila, jangan mbuat dusau agi.”

¹²Mangku Yesus bekiciak agi ngan jemau banyaktu, katauNyau, “Akunila terang deniau. Jemau diau ngikut Aku, nidau ka bejalan di keleman, anyautu diau la bulia terang diau ngenjuakka idup.”

¹³Katau jemau Parisi, “Kabani ngiciakka Kaba itula. Kici'an Kaba nidau benagh.”

¹⁴Yesus nimbal, “Empuak Aku ngiciakka diri Aku, kici'anKu itu benagh, karnau Aku keruan asalKu jak di manau ngan tujuanKu ke manau. Kapu dighi nidau keruan asalKu jak di manau ngan tujuanKu ke manau.

¹⁵Kapu dighi ngadili jemau ngan carau manusiau, Akuni nidau ngadili sughang kia.

¹⁶Anyautu misalau Aku ngadili jemau, keputusanKutu benagh, karnau Aku ukan sughang. Bapak diau ngajung Aku adau guak Aku.

¹⁷Dalam ukum Taurat ditulis luak ini: Kici'an diau benagh kici'an jak di duau ughang.

¹⁸Akuni ngiciakka diri Aku, mangku Bapak diau ngajung Aku ngiciakka Aku pulau.”

¹⁹“Bak Kaba di manau?” katau ughangtu. Yesus nimbal, “Kapu dighi nidau nian keruan sapau Aku ngan BapakKu. Amun kapu dighi keruan sapau Aku, cengki kapu dighi keruan pulau sapau BapakKu.”

²⁰Gegalaunyautu dikiciakka Yesus, masau Diau ngajagh di Ghuma Allah pasigh kas pesembahan. Anyautu nidau bediau sughang kia diau nangkap Yesus, karnau masauNyau lum sampai.

²¹Mangku Yesus ngiciak agi ngan jemau banyak, katauNyau, “Aku ka pegi. Kapu dighi ka ndala'i Aku, anyautu kapu dighi ka mati dalam dusau. Ke bada Aku pegi kapu dighi nidau pacak datang.”

²²Katau jemau Yahuditu, “Diau bekatau, kami nidau pacak datang ke manau Diau pegi. Apu Diau endak mbunua diriAu?”

²³Yesus bekatau agi ngan ughangtu, “Asal kapu dighi itu jak di bawa, asal Akuni jak di atas. Kapu dighi jak di deniauni, Akuni ukan jak di deniauni.

²⁴Itula sebapau Aku bekatau ngan kapu dighi, bansau kapu dighi ka mati dalam dusau kapu dighi. Cetau kapu dighi ka mati dalam dusau kapu dighi, amun nidau percayau, Akunila Diau.”

²⁵Mangku ughangtu betanyau, “Kabani sapau?” “Tuapau gunaunyau agi Aku ngiciak ngan kapu dighitu?” katau Yesus.

²⁶“Gi banyak diau endak Kukiciakka ngan ngadili kapu dighi. Diau ngajung Aku pacak dipercayaui, mangku setu diau Kudengagh jak di Diau, itula diau Kukiciakka ngan deniau.”

²⁷Ughangtu nidau terti, bansau Yesus dang ngiciakka Bapak ngan ughangtu.

²⁸Itula sebapau Yesus bekatau agi, “Amun kapu dighi la nayiakka Anak Manusiau, mangku kapu dighi ka keruan, bansau Akunila Diautu, nidau ngerjauka tuapau-apau jak di diriKu, anyautu Aku ngiciakka ajau setu diau diajaghka Bapak ngan Aku.

²⁹Diau ngajung Aku nyertaui Aku. Diau nidau kekela ngenangka Aku sughang, karnau Aku maju ngerjauka setu diau melemakka atiAu.”

³⁰La udim Yesus ngiciakka gegalaunyautu, banyak jemau percayau ngan Diau.

³¹Mangku Yesus ngiciak ngan jemau Yahudi diau la percayau ngan Diau, katauNyau, “Amun kapu dighi idup nuruti ajaghanKu, kapu dighi njadi anak-buaKu nian.

³²Kapu dighi ka ngeruani Allah diau benagh, mangku Diau ka mbibaska kapu dighi.”

³³“Kamini pengadau Abraham,” katau ughangtu, “Lum kekela kami njadi budak belian ngan jemau. Ngapau Kaba ngiciakka, kapu dighi ka dibibaska?”

³⁴Yesus bekatau ngan ughangtu, “Percayaula katauKu ini: Jemau diau bebuat dusau jemautu budak dusau.

³⁵Sughang budak nidau mendam di ghuma selelamaunyau, anyautu anak maju mendam di ghuma.

³⁶Mangku, amun Anak itu mbibaska kapu dighi, kapu dighi bibas nian.”

³⁷“Nyela, Aku keruan, kapu dighini pengadau Abraham. Anyautu kapu dighi endak mbunua Aku, karnau kapu dighi enggup nerimau ajaghanKu.

³⁸Aku ini ngiciakka setu diau la Kukinak di BapakKu. Kapu dighi pulau ngerjauka setu diau la kapu dighi dengaghka jak di bak kapu dighi.”

³⁹Ughangtu nimbal, “Bak kami Abraham.” Katau Yesus, “Misalau kapu dighi ngenian anak Abraham, cetau kapu dighi ngerjauka setu diau dikerjauka Abrahamtu.

⁴⁰Akuni ngiciakka ngan kapu dighi setu diau benagh diau Kudengagh jak di Allah, anyautu kapu dighi endak mbunua Aku. Perembak luak itu nidau dikerjauka Abraham.

⁴¹Kapu dighi ngerjauka setu diau dikerjauka bak kapu dighitu.” Ughangtu nimbal, “Kamini ukanau anak kampang. Bak kami gi sughang, diautu Allah.”

⁴²Mangku Yesus bekatau ngan ughangtu, “Amun Allahtu bak kapu dighi, kapu dighi ka nyayangi Aku, karnau asalKu jak di Allah. Aku datang ukan karnau kendakKunila, tapitu Allah ngajung Aku.

⁴³Tuapau sebapau kapu dighi nidau ngerti setu diau Kukiciakka? Karnau kapu dighi enggup nerimau kici'anKu.

⁴⁴Bak kapu dighi Iblis, mangku kapu dighi endak nuruti kendak bak kapu dighi. Iblistu pembunua manusiau jak di senitu. Diau nidau kekela idup benagh, karnau nidau bediau setu diau benagh di diau. Amun diau mbu'ung, itu biasau, karnau luak itula caraunyau, karnau diau pembu'ung ngan bak gegalau pembu'ung.

⁴⁵Empuak Akuni ngiciakka setu diau benagh ngan kapu dighi, kapu dighi nidau percayau ngan Aku.

⁴⁶Sapau jak di kapu dighi beghani ngiciakka Aku bedusau? Mangku amun Aku ngiciakka setu diau benagh, ngapau kapu dighi nidau percayau ngan Aku?

⁴⁷Jemau diau asalau jak di Allah ndengaghka kici'an Allah, anyautu asal kapu dighi ukan jak di Allah. Itula sebapau kapu dighi enggup ndengaghiNyau.”

⁴⁸Jemau Yahuditu nimbali Yesus, kataunyau, “Nyela katau kami, kaba jemau Samaria diau diarung iblis.”

⁴⁹Yesus nimbal, “Aku nidau diarung iblis. Aku meregaui BapakKu, anyautu kapu dighi nidau meregaui Aku.

⁵⁰Aku nidau ndalak puji batan endak Aku. Adau Sughang diau beusaha, mangku Aku diregaui. Diau pulau ngadili ngan benagh.

⁵¹Ngenian katauKu ini: Jemau diau nuruti kici'anKu nidau ka mati selelamaunyau.”

⁵²Jemau Yahuditu bekiciak agi, “Mbak kini kami keruan Kabani diarung iblis nian. Abraham la mati, luak itu pulau gegalau nabi, anyautu Kaba ngiciakka, ‘Jemau diau nuruti kici'anKu nidau ka mati selelamaunyau.’

⁵³Amun bak kami Abraham la mati ngan nabi la mati galau, Kabani sapau? Baghia besakla Kaba sangkan Abraham?”

⁵⁴Yesus nimbal, “Misalau Aku muji diriKu, dikit kiala nidau bediau gunaunyau. Diau muji Aku Bapak diau kapu dighi kiciakka Allah kapu dighi.

⁵⁵Anyautu kapu dighi nidau keruan Diau, tapitu Aku keruan Diau. Misalau Aku ngiciak, bansau Aku nidau keruan Diau, Aku semegi ngan kapu dighi jemau pembu'ung. Aku keruan Diau, mangku Aku nuruti kici'anNyau.

⁵⁶Abraham, bak kapu dighi, injiak nianan ka nginak aghi Aku datang, mangku la ngina'au, diau injiak.”

⁵⁷Jemau Yahudi tadi ngiciak ngan Yesus, “Umur Kaba lum bulia limau pulua taun. Baghia Kaba la nginak Abraham?”

⁵⁸Yesus nimbal, katauNyau, “KatauKu ini benagh: Antak ka Abraham adau, Aku la adau.”

⁵⁹Mangku jemau Yahuditu ngambiak batu endak nyipati Yesus. Anyautu Yesus melengit ninggalka Ghuma Allah.