Read Central Malay RASUL 11 Bible Online

RASUL 11 - Central Malay bible

RASUL 11

¹Rasul-rasul ngan jemau percayau di gegalau Yudia ndengagh, mbak bansau jemau diau ukan Yahudi nerimau pulau katau Allah.

²Mangku Pitrus la sampai di Yerusalim, jemau jak di rumbungan besunat bebala ngan Pitrus.

³Katau ughangtu, “Ngapau kaba masuak ghuma jemau diau nidau besunat, lagi makan ngan ughangtu?”

⁴Mangku Pitrus nceritauka ngan ughangtu gegalaunyau diau la tejadi jak di penembai, kataunyau,

⁵“Aku dang bedu'a di kuta Yupi, mangku aku nginak pengina'an. Adau setu luak kain libagh tughun jak di langit tegerintung di empat jughuau, mangku mandak guak aku.

⁶Aku ngina'inyau, mangku di kaintu aku nginak serbau mecam benatang diau jinak ngan diau belia, benatang njalagh ngan pulau burung.

⁷Mangku aku ndengagh suarau bekatau ngan aku, ‘Ui, Pitrus. Mela, sembeliala mangku makanla!’

⁸Tapitu aku nimbal, ‘Nidau, Tuhan. Lum kekela aku makan makanan aram ngan najis.’

⁹Anyautu suarau itu ngiciak agi jak di langit, kataunyau, ‘Setu diau la dinyatauka Allah alal, jangan kaba kiciakka aram!’

¹⁰Titu tejadi tigau kali. Udim itu gegalaunyau tuangkat ke langit.

¹¹Masau itu pulau adau tigau ughang jak di Kaisaria la sampai di mukau ghuma, bada kami temalam. Ughangtu diajung njenguak aku.

¹²Mangku Rua Allah ngajung aku pegi serempak ngan ughangtu ngan nidau asau-asau. Ughang enam ini ngantini aku ke Kaisaria, mangku kami masuak ghuma Kurnilius.

¹³Kurniliustu nceritauka ngan kami, luak manau diau nginak sughang malaikat betegak di ghumahau ngan bekatau, ‘Ajungla jemau ke Yupi njenguak Simun Pitrus.

¹⁴Diautu ka ngiciakka ngan kaba ceritau diau ka nyelamatka kaba ngan jemau di ghuma kaba.’

¹⁵Penarau aku dang ngiciak, Rua Allah tughun nguasaui ughangtu semegi luak diau nguasaui kitau senitu.

¹⁶Mangku aku teghingat ngan kici'an Tuhan, ‘Yuhanis mbaptiska ngan ayiak, tapitu kamu ka dibaptiska ngan Rua Allah.’

¹⁷Jadi, amun Allah la ngenjuakka pulau ngan jemau ukan Yahudi setu diau semegi luak dienjuakka ngan kitau, masau kitau empai percayau ngan Yesus Keristus, mangku manau ka adau aku negahi Allah?”

¹⁸La udim ndengagh kici'annyautu, ughangtu mandak bebala, mangku ngagungka Allah kataunyau, “Amun luak itu, jemau ukan Yahudi pulau dienjuakka Allah masau ngubai jak di dusaunyau mangku bulia idup.”

¹⁹La udim Setipanus mati dibunua, jemau diau percayau ngan Yesus mulai meghasauka sengsarau, mangku ughangtu teceghai-beghai ke manau-manau. Adau diau belaghi sampai ke Penisia, adau diau sampai ke Siprus ngan Antiukia. Ughangtu ngiciakka ceritau iluak jak di Allah cuman ngan jemau Yahudi ajau.

²⁰Anyautu jak di ughangtu adau pulau jemau Siprus ngan jemau Kirini diau pegi sampai ke Antiukia ngiciakka ceritau iluak ngan jemau diau ukan jemau Yahudi, bangsau Yesus itula Tuhan.

²¹Kuasau Tuhan adau di ughangtu, mangku banyak jemau njadi percayau ngan ta'at ngan Tuhan.

²²Ceritau jemau Antiukia itu pulau sampai di Yerusalim, didengagh jemau percayau di situ, mangku Barnabas diajung pegi ke Antiukia.

²³Barnabas la sampai di Antiukia, diau nginak Allah iluak ngan ughangtu, mangku diau riang nian. Diau ngajung, supayau ughangtu maju ta'at ngan Tuhan ngan setia.

²⁴Barnabastu jemau iluak atiau, lagi dikuasaui Rua Allah ngan percayau nian ngan Tuhan, mangku banyak jemau ngikut Tuhan.

²⁵La udim itu Barnabas pegi ke Tarsus ndala'i Saulus. La betemu dibata'inyau ke Antiukia.

²⁶Ughang duautu nyeghundak ngan jemau percayau di Antiukia setaun lamaunyau, sampai ngajagh banyak jemau. Di Antiukia itula jemau percayau dulu sekali dinamauka jemau Keristen.

²⁷Masau itula adau bebeghapau nabi diau datang jak di Yerusalim pegi ke Antiukia.

²⁸Jak di ughangtu adau sughang benamau Agabus. Diautu diajung Rua Allah ngiciakka, mbak bansau di gegalau deniau ka adau kelapaghan diau pansan. Titu tejadi masau Kaisar Kelaudius merinta.

²⁹Mangku jemau Keristen sepakat endak ngumpulka tanci nurut kerilaan sesughangan, endak dikighimka ke jemau percayau diau adau di Yudia.

³⁰Titu pulau dikerjauka, mangku Barnabas ngan Paulus diajung ngantatka tancitu ngan pengulu-pengulu jemau Keristen.