Read Central Malay RASUL 12 Bible Online

RASUL 12 - Central Malay bible

RASUL 12

¹Timpau itu pulau rajau Herudis mulai nganiayau bebeghapau jak di jemau percayau.

²Diau ngajung mbunua Yakubus, dang Yuhanis, pakai pedang.

³Satu diau nginak, bansau kerjaunyautu meriangka ati jemau Yahudi, diau tamba ja'at ngan ngajung nangkap Pitrus pulau. Masau itu aghi rerayau Ruti Nidau Beghagi.

⁴La udim ditangkap, diau dimasuakka dalam jil, dijagaui empat rumbungan tentera dalam serumbungan empat ughang. Rencanaunyau la udim Paska diadili di mukau jemau banyak.

⁵Luak itula Pitrus dijilka. Anyautu jemau percayau maju ndu'akanyau ngan ngenian.

⁶Malam antak ka Herudis endak ngadapkanyau ngan jemau banyak, Pitrus tiduak di antarau duau tentera, dikebat ngan duau rantai. Di duaghau jil adau pulau tentera lain diau njagauinyau.

⁷Mangku adau malaikat Tuhan betegak di guak Pitrus mangku adau cayau di badahautu. Malaikattu nggugak Pitrus enggut bangun sampai bekatau, “Ui, bangunla cepat!” Mangku rantai di tangan Pitrustu pacul.

⁸Udim itu malaikattu bekatau, “Bebebatla, surumkala terumpa kaba!” Pitrus nurutinyau. Katau malaikat agi, “Surumkala baju kaba mangku ngikut aku!”

⁹Mangku Pitrus ngikut malaikat itu pegi jak di jil. Anyautu diau nidau keruan, bansau setu diau dang dikerjauka malaikattu tejadi nian. Diau sangkau diau mimpi.

¹⁰Malaikat ngan Pitrus la lalu di bada penjagauan petamau ngan diau keduau, mangku ughang duautu sampai ke mukau lawang besi diau nuju ke kuta. Mukau lawang itu tebukak sendighi. Mangku ughangtu ngeluagh ngan bejalan ke ujung jalan, mangku malaikattu lengit.

¹¹La udim itu, Pitrus jagau, tuapau diau la tejadi di diau, kataunyau, “Mbak kini aku la keruan, Tuhan ngajung malaikatAu endak melepaska aku jak di kuasau Herudis ngan gegalaunyau diau endak dibuat jemau Yahudi ngan aku.”

¹²La jagau, mangku Pitrus pegi ke ghuma Maria, mak Yuhanis diau pulau dinamauka Markus. Di situ banyak jemau dang betunggal ngan bedu'a.

¹³Diautu nggagur duaghau luagh, mangku sughang budak jemau tinau benamau Rudi datang endak ngeruani, sapau diau nggagur duaghau itu.

¹⁴Diau kecinauan suarau Pitrus, mangku karnau diau riang nian diau nidau mbukakka duaghau, tapitu cecepat masuak agi ke tenga endak ngiciakka, mbak bansau Pitrus adau di mukau duaghau.

¹⁵Katau ughangtu, “Kici'an kaba endiak benagh agi.” Anyautu diau maju ngiciakka, bansau nyela nian luak itu. Katau ughangtu, “Titu antuau!”

¹⁶Pitrus maju nggagur duaghau. Satu ughangtu mbukak duaghau ngan nginak Pitrus, ughangtu kemangan nian.

¹⁷Pitrus ngenjuakka tandau ngan tanganau, supayau tenang, mangku diceritaukanyau, luak manau Tuhan mbata'inyau keluagh jak di jil, kataunyau, “Kiciakkala ceritau ini ngan Yakubus ngan kantin kitau lain.” La udim itu, diau pegi ke bada lain.

¹⁸Pagi di aghiautu tentera-tentera ganau ngan bingung nian, karnau setu diau la tejadi ngan Pitrus.

¹⁹Herudis ngajung jemau ndala'i Pitrus, anyautu nidau dapat. Mangku Herudis ngajung, supayau tentera itu ditanyaui mangku dibunua. Udim itu Herudis pegi jak di Yudia mendam di Kaisaria.

²⁰Herudis mara kematila ngan jemau Tirus ngan jemau Sidun. Mangku ughangtu serempak datang ngadap diau. Ughangtu muji Belastus, diau ngeruani istana rajau, mangku diau mihak ughangtu. Ughangtu endak ngadap Herudis endak mintak bedamai, karnau nenggeri ughangtu ngandalka makanan jak di nenggeri rajautu.

²¹Adau saghi diau la ditetapka, Herudis nyurum baju rajau ngan duduak di kerusi rajau mangku mulai pidatau di mukau jemau banyak.

²²Jemau banyak diau dang ndengaghkanyau bekatau, “Itu suarau allah, ukan manusiau.”

²³Masau itula pulau malaikat Tuhan nampagh Herudis, karnau diau nidau ngagungka Allah. Herudis mati dimakan biagh.

²⁴Mangku katau Allah tamba tesiar ngan tamba banyak jemau percayau.

²⁵Barnabas ngan Saulus la ngudimi tugasau di Yerusalim, ughang duautu baliak ngan mbata'i Yuhanis diau pulau dinamauka Markus serempak ngan ughangtu.