Read Central Malay RASUL 14 Bible Online

RASUL 14 - Central Malay bible

RASUL 14

¹Di Ikunium pulau setu diau semegi dighasauka rasul itu. Ughang duautu masuak ghuma sembayang ngan ngajagh ngan carau endak nian, mangku banyak jemau Yahudi ngan jemau Yunani percayau ngan Yesus.

²Anyautu jemau Yahudi diau enggup percayau ngasung jemau bangsau lain, mangku ughangtu mara lagi luat ngan jemau percayautu.

³Karnau itu Paulus ngan Barnabas lamau mendam di situ. Ngan beghani ughang duautu ngiciakka ceritau Tuhan. Mangku Tuhan pulau mbuktika, bansau ceritau iluak itu benagh. Diau ngenjuakka kuasau ngan ughang duautu ngadauka tandau nyelia.

⁴Mangku jemau kuta itu nidau semegi pendapat. Adau diau mihak ngan jemau Yahudi, adau diau mihak ngan rasul tadi.

⁵Mangku jemau Yahudi ngan jemau bangsau lain diau nidau keruan Allah ngan penguluau sepakat endak mbunua rasultu ngan nyipati ughang duautu ngan batu.

⁶Anyautu rasultu ngeruani rencanau itu, mangku nyingkir ke kuta di daira Likaunia, diautu Listera, Derbi ngan daira di sekitarau.

⁷Di situla ughang duautu ngiciakka ceritau iluak.

⁸Di Listera adau sughang jemau lanang diau duduak ajau ngan lum kekela pacak bejalan, karnau ketingau nidau mayau jak di keciak.

⁹Diautu duduak ndengagh Paulus ngiciak. Paulus nginak, bansau jemautu percayau, mangku pacak dighaduka. Diau ngina'i jemautu,

¹⁰bekatau ngan suarau bias, “Betegakla!” Jemau itu melumpat betegak mangku bejalan.

¹¹Satu jemau banyak nginak setu diau dikerjauka Paulus, ughangtu tegauk pakai basau Likaunia, “Diwau-diwau la tughun guak kitau luluak badan manusiau.”

¹²Barnabas dikiciakka diwau Sius, Paulus dikiciakka diwau Hermis, karnau diautu tukang ngiciak.

¹³Mangku imam diwau Sius datang. Keramatau adau di luagh kuta. Imamtu mbatak sapi karai ngan bungau ke mukau lawang kuta endak bekerban nyemba rasul itu serempak ngan jemau banyak tadi.

¹⁴Satu Barnabas ngan Paulus ndengagh setu diau dikerjauka ughangtu, ughang duautu ncebaghka bajuau, karnau nidau tetuju ngan peremba'autu, mangku belaghi ke pugan jemau ramitu sampai tegauk,

¹⁵“Ui, kapu dighi. Ngapau kapu dighi ngerjauka ini? Kamini pulau manusiau luak kapu dighi. Kami ke sini endak ngiciakka ceritau iluak ngan kapu dighi, supayau kapu dighi ninggalka kerjau diau nidau begunau ini, mangku datang njenguak Allah diau idup, diau njadika langit ngan deniau, laut ngan gegalau isiau.

¹⁶Timpau dulu Allah ngenangka gegalau bangsau idup nurut kenda'au ajau.

¹⁷Empuak luak itu, Diau nidau kelingauan mbuktika diriAu ngan kerjau diau iluak. Diautu ngenjuakka ujan jak di langit ngan asil tana padau pangkaunyau. Diau ngenjuakka makanan ngan kapu dighi ngan nyenangka ati kapu dighi.”

¹⁸Empuak ngiciak luak itu, masia segau rasultu negahi ughang banyaktu bekerban batan endak ughang duautu.

¹⁹Adau jemau Yahudi datang jak di Antiukia ngan Ikunium. Ughangtu muji jemau Listera, mangku jemau banyak mihak ngan ughangtu. Ughangtu nyipati Paulus ngan batu, mangku naghiak diau keluagh kuta, karnau disangkau ughang diau la mati.

²⁰Anyautu jemau percayau di situ betegak ngelilingi diau. Diautu bangun masuak agi ke kuta. Pagiau diau pegi ke Derbi serempak ngan Barnabas.

²¹Di Derbi Paulus ngan Barnabas ngiciakka ceritau iluak, mangku banyak jemau percayau ngan Yesus. Udim itu ughang duautu ngulang ke Listera, udim itu ke Ikunium mangku ke Antiukia.

²²Di kuta itu duau rasultu neguaka ati jemau diau percayau ngan Yesus ngan ngajung ughangtu, supayau maju percayau. Rasultu bekatau, “Kitau mesti sengsarau kudai, mangku kitau pacak njadi angguta umat Allah.”

²³Di bilang kumpulan jemau Keristen duau rasultu netapka pengulu-pengulu batan endak ughangtu. Mangku sampai puasau ngan bedu'a rasultu nyeraka pengulutu ngan Tuhan diau ughangtu percayauitu.

²⁴La udim itu Paulus ngan Barnabas melajuka pejalanannyau. Ughang duautu wuan daira Pisidia, mangku sampai di Pampilia,

²⁵dikiciakkanyau katau Allah di Perga, mangku pegi ke Atalia.

²⁶Jak di situ ughang duautu belayar agi ke Antiukia. Kuta itu bada ughang duautu senitu diseraka ngan Allah, supayau ughangtu ngerjauka kerjau diau mbak kini la diudimi.

²⁷La sampai di situ, ughangtu ngajung jemau percayau betunggal, mangku ughang duautu nceritauka gegalaunyau diau la Allah kerjauka ngan ughangtu, luak manau Allah la nyatauka, supayau bangsau lain pulau pacak percayau ngan Allah.

²⁸Rasul itu lamau betunggal ngan jemau percayau di situ.