Read Central Malay RASUL 15 Bible Online

RASUL 15 - Central Malay bible

RASUL 15

¹Adau bebeghapau jemau jak di Yudia datang ke Antiukia ngajagh jemau Keristen di situ, kataunyau, “Amun kapu dighi nidau disunat nurut ukum Musa, kapu dighi nidau pacak diselamatka.”

²Paulus ngan Barnabas melawan nian ngan bebala, mbalahi pendapat ughangtu. Udim-udimau ditetapka, supayau Paulus ngan Barnabas ngan jemau lain jak di Antiukia pegi ke Yerusalim endak ngiciakka sual itu ngan rasul-rasul ngan pengulu-pengulu di situ.

³Jemau Keristen di Antiukia ngantat ughangtu sampai keluagh kuta, mangku ughangtu pegi wuan Penisia ngan Samaria. Di situ ughangtu nceritauka, mbak bansau jemau bangsau lain diau nidau keruan Allah la percayau ngan Allah. Ceritau itu meriangka nian jemau percayau di situ.

⁴La sampai di Yerusalim, ughangtu diterimau ngan iluak ngan jemau Keristen ngan rasul-rasul ngan pengulu-pengulu, mangku diceritauka gegalaunyau diau dikerjauka Allah ngan ughangtu.

⁵Adau jemau jak di rumbungan Parisi diau la percayau betegak ngan bekatau, “Jemau bangsau lain mesti disunat ngan diwajibka nuruti ukum Musa.”

⁶Mangku rasul-rasul ngan pengulu-pengulu betunggal endak ngiciakka sual itu.

⁷Lamau nianan ughangtu buijau. Kesudimannyau Pitrus betegak ngan bekatau, “Ui, kapu dighi. Kapu dighi keruan, bansau jak di senitu Allah milia aku jak di kapu dighi batan endak ngiciakka ceritau iluak ngan jemau bangsau lain, supayau ughangtu pulau ndengagh ngan percayau.

⁸Allah keruan ati manusiau. Diau nunjuakka, mbak bansau Diau nerimau ughangtu ngan ngenjuakka ngan ughangtu Rua Allah, luak dienjuakkaNyau ngan kitau pulau.

⁹Allah nidau nian mbidaka kitau ngan ughangtu. Diau mberesiaka ati ughangtu, karnau ughangtu percayau.

¹⁰Amun luak itu, ngapau kapu dighi endak nguji kesabaran Allah ngan ngajung ngerjauka ukum diau beghat diau nidau pacak kitau turuti ngan niniak puyang kitau pulau nidau pacak.

¹¹Kitau percayau ngan diselamatka karnau keilu'an Tuhan Yesus Keristus. Luak itu pulau ughangtu.”

¹²Jemau diau betunggal di situ diam galau, mangku ndengaghka Paulus ngan Barnabas nceritauka gegalau tandau nyelia diau la Allah kerjauka ngan ughang duautu di guak jemau bangsau lain.

¹³La udim Paulus ngan Barnabas ngiciak, Yakubus bekatau, “Ui, kapu dighi, dengaghkala aku.

¹⁴Empai jerangnila Simun la nceritauka, luak manau Allah penembaian iluak ngan bangsau lain, endak milia jemau jak di ughangtu njadi umatAu.

¹⁵Nabi-nabi senitu la ngiciakka titu di Injil luak ini,

¹⁶‘La udim itu Aku ka datang agi, katau Tuhan. Aku ka negakka agi ghuma Daud diau la rubua itu. Aku ka ngilu'i runtuannyau, mangku negakkanyau agi,

¹⁷supayau gegalau tigha jemau lain ndala'i Tuhan ngan gegalau bangsau lain diau nidau keruan Allah, la Kupilia njadi umatKu. Luak itula katau Tuhan diau ngerjauka gegalaunyautu.’

¹⁸Jak di senitu titu la dikiciakka.

¹⁹Jadi,” katau Yakubus, “Pendapatku, jangan kitau nyusaka jemau jak di bangsau lain diau la percayau ngan Allah.

²⁰Kitau mesti besurat ngan ughangtu, supayau jangan makan makanan diau la disiwauka, jangan menaugawia, jangan makan daging benatang diau ditekiak ngan jangan makan dagha.

²¹Karnau jak di senitu ukum Musa la dikiciakka di bilang kuta ngan dibacauka idang aghi Sabat di ghuma sembayang.”

²²Mangku rasul-rasul ngan pengulu-pengulu jemau Keristen ngan gegalau jemau percayau mutuska endak milia bebeghapau ughang jak di ughangtu diau ka diajung ke Antiukia serempak ngan Paulus ngan Barnabas. Mangku ughangtu milia Silas ngan Yudas diau pulau dikiciakka Barsabas. Ughang duautu diregaui nian di guak jemau percayau di Yerusalim.

²³Ngan ughang duautu diseraka surat muniau luak ini, “Batan endak gegalau jemau percayau diau asalau jak di bangsau lain diau adau di Antiukia ngan Siria ngan Kilikia. Salam jak di rasul-rasul ngan pengulu-pengulu, kantin-kantin kamu.

²⁴Kami la ndengagh ceritaunyau adau jemau jak di kami pegi njenguak kapu dighi ngan ngacauka kapu dighi ngan ajaghannyau. Kami nidau ngajung ughangtu ngerjauka titu.

²⁵Itula sebapau kami la buijau, mangku gegalaunyau tetuju galau endak milia bebeghapau ughang ngajung ughangtu pegi njenguak kapu dighi serempak ngan kantin kitau Paulus ngan Barnabas diau kami sayangi.

²⁶Ughang duautu jemau diau la cakap nyeraka nyawaunyau karnau Tuhan kitau Yesus Keristus.

²⁷Mangku kami la ngajung Yudas ngan Silas njenguak kapu dighi. Ughang duautu ka ngiciakka pulau ngan kapu dighi setu diau ditulis dalam surat ini.

²⁸Rua Allah la netapka mangku kami pulau nyetujuinyau, supayau kapu dighi jangan telampau banyak nanggungka beban lain jak di diau penting ini:

²⁹Jangan kapu dighi makan makanan diau la disiwauka, jangan makan dagha ngan daging benatang diau mati ditekiak ngan jangan menaugawia. Amun kapu dighi njawuaka diri jak di kerjau itu, kapu dighi la bebuat iluak. Inggan ini ajau. Salam kami.”

³⁰La udim pamit, Yudas ngan Silas bejalan ke Antiukia. Di situ ughangtu mantau jemau diau percayau ngajung ughangtu betunggal, mangku surat itu dienjuakka ngan ughangtu.

³¹La udim dibacaukanyau surattu, ughangtu riang nian, karnau isi surat tadi melemakka ati ughangtu.

³²Yudas ngan Silas diau pulau nabi lamau bekiciak ngan jemau percayau, melemakka ngan neguaka ati ughangtu.

³³La lamau jugau ughang duautu di situ, mangku jemau percayau di Antiukia ngajung ughangtu baliak nyampaika salam ngan jemau diau ngajung ughang duautu senitu. [

³⁴Anyautu Silas maju endak mendam di Antiukia.]

³⁵Paulus ngan Barnabas pulau lamau mendam di Antiukia. Di situ ughang duautu ngajagh ngan ngiciakka katau Tuhan ngan banyak jemau lain pulau.

³⁶Nidau lamau udim itu, Paulus ngiciak ngan Barnabas, kataunyau, “Mela kitau ngaruaka kantin-kantin kitau di bilang kuta, bada kitau ngiciakka katau Tuhan senitu, mangku kitau keruan, luak manau ughangtu.”

³⁷Barnabas endak mbata'i Yuhanis Markus.

³⁸Anyautu Paulus meghasau nidau lemak mbatak jemau diau senitu numangka ughang duautu di Pampilia, nidau endak maju bekerjau ngan ughangtu.

³⁹Paulus ngan Barnabas bebala nian, mangku ughang duautu beceghai. Barnabas mbata'i Markus, mangku belayar ke Siprus.

⁴⁰Paulus milia Silas. Ughang duautu didu'aka jemau percayau ngan diseraka ngan keilu'an Tuhan,

⁴¹mangku pegi ngidari Siria ngan Kilikia sampai neguaka ati jemau percayau di situ.