Read Central Malay RASUL 16 Bible Online

RASUL 16 - Central Malay bible

RASUL 16

¹Paulus la pegi sampai di Derbi ngan Listera. Di situ adau sughang percayau, namaunyau Timutius. Endu'au jemau Yahudi diau la percayau pulau. Ba'au jemau Yunani.

²Timutius tekenal iluak di guak jemau percayau di Listera ngan Ikunium.

³Paulus endak mbata'i Timutius, mangku diau nyunatka diau karnau jemau Yahudi di daira itu. Ughangtu keruan galau, bansau ba'au jemau Yunani.

⁴Di bilang kuta diau didatangi Paulus ngan Silas, dikiciakkanyau setu diau la ditetapka rasul-rasul ngan pengulu-pengulu di Yerusalim ngan ngajung ughangtu na'atinyau.

⁵Mangku jemau percayau di situ diteguaka atiau, supayau maju percayau. Idang aghi tamba banyak jemau diau percayau.

⁶Rua Allah nidau ngajung Paulus ngan Silas ngiciakka kici'an Allah di perupinsi Asia, mangku ughangtu melajuka pejalanannyau ke daira Perigia ngan Galatia.

⁷La sampai di Misia ughangtu ncubau masuak ke daira Bitinia, anyautu Rua Yesus nidau ngajung ughangtu ke situ.

⁸Ughangtu wuan Misia mangku sampai di Teruas.

⁹Malamau Paulus adau pengina'an. Diau nginak jemau Makedunia betegak di situ mantau diau, kataunyau, “Mela, nyembeghangla ke sini, mangku tulung kami!”

¹⁰La udim Paulus nginak pengina'antu, kami bedandan endak pegi ke Makedunia, karnau kami la percayau ngan mutuska, bansau Allah ngajung kami ngiciakka ceritau iluak ngan jemau di situ.

¹¹Mangku kami pegi jak di Teruas belayar ke Samuteraki. Pagi aghiau kami sampai di Niapulis.

¹²Jak di situ kami ke Pilipi, kuta di daira petamau Makedunia itu. Itu kuta perantauan jemau Rum. Di situ kami mendam bebeghapau aghi.

¹³Aghi Sabat kami pegi keluagh kuta ke tepi ayiak, karnau kami kirau adau bada sembayang jemau Yahudi di situ. Kami duduak, mangku ngiciak ngan tinau-tinau diau betunggal di situ.

¹⁴Adau sughang jak di tinautu, namaunyau Lidia, asalau jak di Tiatira. Diautu tukang dagang kain ungu diau besak regaunyau. Diautu nyemba Allah. Tuhan mbukakka atiau, mangku diau nerimau kici'an Paulus,

¹⁵mangku diau seghuma dibaptis galau. La udim dibaptis, diau ngajak kami ke ghumahau, kataunyau, “Amun kamu meghasau, aku la percayau nian ngan Tuhan Yesus, mela singga kudai di ghumaku. Aku ngajung temalam nian.” Mangku kami ngikut diau.

¹⁶Adau saghi kami dang pegi ke bada sembayang tadi, mangku kami betemu ngan sughang budak belian jemau tinau. Tinau itu dikuasaui rua sitan, mangku diau pacak meramalka. Ngan meramalka nasib jemau, tuan-tuanau bulia tanci banyak.

¹⁷Tinautu ngikut Paulus ngan kami sampai ngiciak ngan suarau bias, kataunyau, “Ughang ini budak Allah diau Mahabesak. Ughangni ngiciakka ngan kapu dighi, luak manau caraunyau kapu dighi pacak selamat.”

¹⁸Bebeghapau aghi tinautu maju ngiciak luak itu. Mangku Paulus nidau ta'an agi ndengaghau. Diau nulia ngan bekatau ngan rua itu, “Ngan kuasau Yesus Keristus aku ngajung kaba keluagh jak di tinau ini. Keluaghla kaba!” Masau itu pulau rua itu ngeluagh.

¹⁹Satu tuan-tuan tinau tadi nginak, bansau aghapan ka bulia tanci nidau bediau agi, ughangtu nangkap Paulus ngan Silas, ditaghiak ke tengalaman pengadilan endak diadapka ngan penguasau kuta.

²⁰Ughang duautu la dibata'i ngadap pengulu-pengulu kuta, ughang tadi bekatau, “Ughang duau ini jemau Yahudi. Diau ngacau di kuta kitau.

²¹Ughang duautu ngajaghka adat lembagau diau belawanan ngan ukum kitau. Kitau ini jemau Rum. Kitau nidau pacak nerimau ngan nurutinyau.”

²²Jemau banyak pulau ngikut melawan Paulus ngan Silas. Mangku pengulu-pengulu kutatu ngajung ncebaghka baju ngan mbaduki ughang duautu.

²³Ughang duautu la dibaduki enggut jeghia, mangku dimasuakka dalam jil. Kepalak jil diajung njagaui nian ughang duautu.

²⁴Karnau diajung luak itu, kepalak jiltu masuakka ughangtu di bada diau di tetengaan sekali, mangku ughangtu dimasuakka ke belukan.

²⁵Kekirau tenga malam Paulus ngan Silas bedu'a ngan benyanyi ngagungka Tuhan. Jemau lain diau di jil pulau ndengaghi ughang duautu benyanyi.

²⁶Mangku adau gempau diau besak kematila, sampai pendasi jil itu begugak galau. Masau itu pulau tebukak gegalau duaghau jil ngan belukan ngan pasungan pacul galau.

²⁷Kepalak jil tadi tegagau ngan bangun. Diau nginak duaghau jil tebukak galau, mangku diau ncabut pedangau endak mbunua diriau, karnau disangkaunyau anak kawalan la belaghi galau.

²⁸Anyautu Paulus tegauk, kataunyau, “Jangan bunua diri. Kami gi adau galau di sini!”

²⁹Kepalak jiltu ngajung mbatak lampu, mangku belaghi ke dalam. Ngan gemetagh diau nunduak di adapan Paulus ngan Silas.

³⁰La udim itu diau mbata'i ughang duautu keluagh mangku bekatau, “Tuapau diau mesti kukerjauka, mangku aku selamat?”

³¹Ughang duautu nimbal, “Percayaula ngan Tuhan Yesus, mangku dighi selamat, dighi seghuma ka selamat galau.”

³²Mangku Paulus ngan Silas ngiciakka katau Tuhan ngan kepalak jiltu ngan gegalau jemau diau adau di ghumahau.

³³Tenga malamtu pulau kepalak jil itu mbatak ughang duautu mangku ngubati lukaunyau. Mangku jemau seghumatu dibaptis galau.

³⁴La udim dibaptis, Paulus ngan Silas dibata'inyau ke ghumahau, ditepiakka makanan batan endak ughang duautu. Ughang seghuma riang nian, karnau la percayau ngan Allah.

³⁵Pagi di aghiau pengulu-pengulu kuta ngajung pelisi pegi ke kepalak jil ngan ngiciakka, “Lepaskala ughang duau itu!”

³⁶Kepalak jiltu ngiciakkanyau ngan Paulus, kataunyau, “Pengulu-pengulu kuta la ngajung kamu dilepaska. Mbak kini baliakla!”

³⁷Anyautu Paulus ngiciak ngan pelisi tadi, kataunyau, “Kamini jemau behak di nenggeri Rum. Ngan nidau diadili kami la dibaduki di mukau jemau banyak ngan dimasuakka dalam jil. Mbak kini ughangtu ngajung kami pegi, nidau keruan ngan jemau. Kami enggup luak itu! Ajungla pengulu-pengulu kuta ke sini melepaska kami.”

³⁸Pelisi itu ngiciakka gegalaunyautu ngan pengulu-pengulu kuta. Satu ughangtu ndengagh, mbak bansau Paulus ngan Silas jemau behak di nenggeri Rum, ughangtu penakut.

³⁹Mangku ughangtu pegi mintak dima'apka duau rasultu ngan ngantat ughang duautu keluagh jil mangku mintak, supayau ughang duautu pegi jak di kuta itu.

⁴⁰Paulus ngan Silas ninggalka jil tadi pegi ke ghuma Lidia. Di situ ughang duautu betemu ngan jemau percayau ngan neguaka ati ughangtu. La udim itu ughang duautu pegi.