Read Central Malay RASUL 17 Bible Online

RASUL 17 - Central Malay bible

RASUL 17

¹Paulus ngan Silas melajuka pejalanannyau wuan Ampipulis ngan Apulunia mangku sampai di Tesalunika. Di situ pulau adau ghuma sembayang jemau Yahudi.

²Luak biasaunyau Paulus masuak ke ghuma sembayang itu. Tigau aghi Sabat beturut-turut diau ngiciakka isi Injil ngan ughang di situ.

³Diau nerangka ngan mbuktika, mbak bansau Mesias, Rajau Penyelamattu, mesti sengsarau mangku ngulang idup jak di mati, kataunyau, “Inila Mesias, Rajau Penyelamattu, Yesus diau kukiciakka ngan kapu dighi.”

⁴Adau jemau diau percayau mangku ngikut Paulus ngan Silas. Banyak jemau Yunani diau takut ngan Allah ngan banyak jugau tinau diau diregaui diau percayau.

⁵Anyautu jemau Yahudi sengit. Ughangtu mantau jemau ja'at di jalan ngan mbuat rumbungan pengacau, mangku ughangtu ngacau di gegalau kuta itu ngan masu'i ghuma Yasun endak mbata'i Paulus ngan Silas ngadap jemau banyaktu.

⁶Anyautu karnau ughangtu nidau betemu ngan ughang duau itu, ditaghi'au Yasun ngan bebeghapau jemau percayau lainau ke pengulu-pengulu kuta, sampai tegauk, kataunyau, “Jemau diau ngacau di manau-manau la datang ke sini pulau.

⁷Yasun ini nerimau ughangtu di ghumahau. Ughangtu melanggar ukum diau la ditetapka Kaisar. Ughangtu ngiciakka adau rajau lain, diautu Yesus.”

⁸Ndengagh kici'annyautu jemau banyak ngan pengulu-pengulu kutatu ganau.

⁹Mangku Yasun ngan jemau percayau lainau diajung mbayighi tanci penebusau. La udim itu ughangtu dilepaska.

¹⁰Malam itu pulau jemau percayau di situ ngajung Paulus ngan Silas pegi ke Beria. La sampai di situ ughang duautu pegi ke ghuma sembayang jemau Yahudi.

¹¹Jemau Yahudi di kuta itu nerimau nian kici'an Paulus, ukan luak jemau Tesalunika. Ngan riang ughangtu ndengaghka ceritau Yesus. Idang aghi ughangtu melajaghi nian Injil endak ngeruani, apu gegalaunyau nyela luak itu.

¹²Banyak jak di ughangtu percayau ngan Yesus, ngan banyak pulau jemau Yunani diau diregaui, empuak tinau empuak lanang.

¹³Anyautu jemau Yahudi di Tesalunika ndengagh, bansau di Beria pulau Paulus la ngiciakka katau Allah. Ughangtu datang pulau ke situ ngasung jemau banyak mbuat rumbungan pengacau.

¹⁴Jemau diau percayau di situ cecepat ngantat Paulus ke pantai. Silas ngan Timutius masia mendam di Beria.

¹⁵Jemau diau ngantat Paulus ngantini diau sampai di Atina. Mangku ughangtu baliak ke Beria mbatak pesan jak di Paulus, supayau Silas ngan Timutius cecepat njenguak diau.

¹⁶Penarau Paulus nunggu Silas ngan Timutius di Atina, diau madak nian nginak kuta itu penua ngan patung.

¹⁷Karnau itu Paulus peragau di ghuma sembayang ngan jemau Yahudi ngan jemau lain diau takut ngan Allah. Luak itula pulau di pekan idang aghi diau ngiciak ngan jemau diau adau di situ.

¹⁸Adau pulau guru-guru ajaghan Ipikurus ngan Setua diau peragau ngan Paulus. Adau jemau diau bekatau, “Tuapau diau endak dikiciakka tukang mbu'ung ini?” Adau pulau jemau lain diau bekatau, “Upaunyau diauni ngiciakka diwau bangsau lain.” Karnau Paulus ngiciakka ceritau Yesus ngan ceritau ngulang idup jak di mati.

¹⁹Mangku ughangtu mbatak Paulus ngadap sidang Ariupagus ngan ngiciakka, “Kami endak keruan ajaghan empai diau dighi kiciakka itu.

²⁰Karnau dighi ngiciakka setu diau lum kekela kami dengagh ka adau. Itula sebapau kami endak keruan retiau gegalaunyau itu.”

²¹Adau banyak jemau Atina ngan jemau bangsau lain diau mendam di situ, kerjaunyau cuman ndengagh ngan ngiciakka ceritau diau empai.

²²Mangku Paulus betegak di adapan jemau diau betunggal di Ariupagustu ngan bekatau, “Ui, kapu dighi jemau Atina. Aku nginak kapu dighi buagamau nian.

²³Aku la ngerayau ngidari kuta kapu dighi, mangku aku ngina'i bada sembayang kapu dighi. Aku nginak pulau sutiak bada bekerban. Di bada itu ditulis luak ini, ‘Batan endak Allah diau nidau kami keruani!’ Allah diau kapu dighi semba, anyautu nidau kapu dighi keruani, Diau itula kukiciakka ngan kapu dighi.

²⁴Allah diau njadika deniau ini ngan gegalau isiau, Diautu Tuhan ngan nguasaui langit ngan deniau. Diau nidau mendam di keramat diau dibuat manusiau.

²⁵Diau pulau nidau kurang tuapau-apau endak ditulung manusiau, karnau Diau itula ngenjuakka manusiau idup ngan nyawau ngan gegalaunyau.

²⁶Jak di sughang jemau ajau Diau mbuat gegalau bangsau ngan ngajung ughangtu mendam di gegalau deniau. Diau pulau netapka jak di penembai, kebilau ngan di manau ughangtu bulia idup.

²⁷Gegalaunyautu dikerjauka Allah, supayau ughangtu ndala'i Diau, kalu-kalu betemu ngan Diau, amun didala'i, empuak Allah sebenaghau nidau jawua ngan kitau.

²⁸Luak itu pulau dikiciakka jemau, ‘Kitau idup, kitau bekerjau, kitau adau di deniau ini karnau Diau.’ Semegi pulau ngan setu diau dikiciakka tukang pengarang kapu dighi, kataunyau, ‘Gegalau kitau pengadau Allah.’

²⁹Karnau asal kitau jak di Allah, kitau nidau bulia nganggap sipat Allah semegi ngan patung diau dibuat jak di emas, pirak ngan batu, diau dibuat ngan kepandaian manusiau.

³⁰Masau kitau nidau keruan nidau diingatka Allah agi. Mbak kini Allah ngajung gegalau jemau di deniau ngubai jak di peremba'au diau ja'attu.

³¹Diau la netapka aghi endak ngadili deniau ini ngan adil. Titu ka dikerjauka Sughang diau dipilia Allah. Mangku Allah la mbuktika titu ngan ngidupka Jemau itu jak di mati.”

³²Satu ughangtu ndengagh, bansau jemau mati ka ngulang idup, adau diau nawauka Paulus. Adau pulau diau bekatau, “Nanti ajau kami ndengagh kici'an kaba agi.”

³³Mangku Paulus pegi ninggalka ughangtu.

³⁴Anyautu adau pulau bebeghapau jemau diau ngikut Paulus ngan percayau ngan Yesus. Di antaraunyau adau Diunisius, angguta sidang Ariupagus ngan sughang tinau, namaunyau Damaris ngan bebeghapau jemau lain agi.