Read Central Malay RASUL 18 Bible Online

RASUL 18 - Central Malay bible

RASUL 18

¹La udim itu, Paulus ninggalka Atina mangku pegi ke Kurintus.

²Di situ diau betemu ngan sughang jemau Yahudi, namaunyau Akwila, asalau jak di Puntus. Akwila empai datang jak di Italia ngan biniau Periskila, karnau Kaisar Kelaudius la ngajung jemau Yahudi pegi jak di Rum galau. Paulus berayak ke ghuma ughang duautu.

³Ughang duautu tukang kima semegi ngan Paulus. Karnau itu Paulus mendam di situ ngan bekerjau ngan ughangtu.

⁴Idang aghi Sabat Paulus pegi ke ghuma sembayang ngiciak ngan jemau Yahudi ngan jemau Yunani di situ, ngici'i ughangtu supayau percayau ngan Yesus.

⁵Silas ngan Timutius la sampai jak di Makedunia, kerjau Paulus cuman ngiciakka ceritau jak di Allah ngan jemau Yahudi, mbak bansau Yesus itula Mesias, Rajau Penyelamat itu.

⁶Anyautu ughangtu melawan ngan nggelakkanyau, mangku Paulus ngepaska debu jak di bajuau, tandau batan endak ngingatka sala ughangtu ngan bekatau, “Amun kapu dighi celakau, itu sala kapu dighi itula. Aku belepas tangan. Mulai mbak kini aku ka pegi ke bangsau lain.”

⁷Mangku diau ninggalka ughangtu pegi ke ghuma Titius Yustus. Jemautu nyemba Allah, ghumahau guak ghuma sembayang tadi.

⁸Anyautu Kerispus, kepalak ghuma sembayang itu ngan jemau di ghumahau percayau ngan Tuhan Yesus, ngan banyak pulau jemau Kurintus lainau ndengagh kici'an Paulus. Ughangtu percayau mangku dibaptis.

⁹Adau semalam Paulus adau pengina'an, mangku Tuhan bekatau ngan diau, “Jangan penakut! Kiciakkala maju katau Allah. Jangan mandak,

¹⁰karnau Aku ngantini kaba. Nidau bediau sughang kia diau pacak ngerjauka setu diau ja'at ngan kaba. Karnau umatKu di kuta ini banyak.”

¹¹Mangku Paulus mendam di Kurintus tenga duau taun. Diau ngajaghka katau Allah ngan ughangtu.

¹²Mangku Galiu njadi gubernur di Akaya. Masau itu jemau Yahudi sepakat melawan Paulus, mangku dibata'inyau ngadap pengadilan.

¹³Katau ughangtu, “Jemau ini ngajung jemau nyemba Allah ngan carau diau belawanan ngan ukum Taurat.”

¹⁴Satu Paulus endak nimbal, Galiu bekatau ngan jemau Yahudi, “Ui, jemau Yahudi, amun diau diaduka ini pelanggaran ngan keja'atan, sepantasau aku ndengagh aduan kapu dighi.

¹⁵Anyautu ikak bebala mbalaka katau-katau ngan namau ngan ukum kapu dighi, mangku kapu dighila mesti ngurusau. Aku enggup ngadili pekarau luak itu.”

¹⁶Udim itu diau melaratka ughangtu.

¹⁷Mangku ughangtu nangkap Sustenis, kepalak ghuma sembayang, ngan mbadukinyau di guak pengadilan. Anyautu Galiu nidau nyanaukanyau.

¹⁸La udim itu Paulus masia lamau di Kurintus, mangku diau pamit ngan jemau percayau di situ. Diau belayar ke Siria serempak ngan Periskila ngan Akwila. Di Kengkeria Paulus ncukur gumba'au diau la dienangkanyau panjang, karnau niatau ngan Tuhan.

¹⁹La sampai di Ipisus, Paulus beceghai ngan Periskila ngan Akwila. Diau masuak ghuma sembayang, peragau ngan jemau Yahudi.

²⁰Ughangtu mintak, supayau diau lamau mendam ngan ughangtu, anyautu diau enggup.

²¹Diau laka bejalan, diau bekatau, “Amun Allah ngenda'i, aku ka ngulang agi ke sini.” La udim ngiciak luak itu, diau belayar ninggalka Ipisus.

²²Diau ndaghat di Kaisaria, mangku pegi endak betemu ngan jemau Keristen. La udim itu diau pegi ke Antiukia.

²³La lamau jugau di situ, diau pegi agi ngidari gegalau daira Galatia ngan Perigia endak neguaka iman jemau percayau.

²⁴Penarau itu, adau sughang jemau Yahudi datang ke Ipisus. Jemautu asalau jak di Aliksanderia, namaunyau Apulus. Diautu pintar ngiciak ngan keruan gegalau isi Injil.

²⁵Diau la diajagh ajaghan Tuhan Yesus, mangku ngan riang nian diau ngajagh ngan neghagi ngajaghka ceritau Yesus, empuak diau empai ngeruani baptisan Yuhanis ajau.

²⁶Ngan beghani diau mulai ngajagh di ghuma sembayang. Periskila ngan Akwila ndengagh diau. Ughang duautu mbata'inyau ke ghuma, mangku diterangkanyau ngan neghagi ceritau Allah nyelamatka manusiau.

²⁷La udim itu, Apulus endak pegi ke Akaya. Mangku jemau percayau di Ipisus nyurati jemau diau percayau di Akaya, supayau ughangtu nerimau Apulus ngan riang. Apulus la sampai di Akaya, mangku nulung nian jemau percayau karnau keilu'an Allah.

²⁸Karnau ngan kuasau diau ngiciak di mukau jemau banyak, nyalaka jemau Yahudi ngan mbuktika, mbak bansau Yesusla Mesias, Rajau Penyelamat.