Read Central Malay RASUL 19 Bible Online

RASUL 19 - Central Malay bible

RASUL 19

¹Penarau Apulus gi adau di Kurintus, Paulus ngidari daira itu, mangku sampai di Ipisus. Di situ diau betemu ngan bebeghapau jemau diau percayau ngan Yesus.

²Diau betanyau ngan ughangtu, “Apu kapu dighi la nerimau Rua Allah, masau kapu dighi percayau ngan Tuhan Yesustu?” Ughangtu nimbal, “Lum, kami nidau kekela ndengaghau, bansau adau Rua Allah.”

³“Amun luak itu,” Katau Paulus, “Ngan baptisan apau kapu dighi dibaptiska?” Timbal ughangtu, “Ngan baptisan Yuhanis.”

⁴Mangku katau Paulus, “Yuhanis mbaptiska jemau diau endak nyatauka, bansau diau la ngubai peremba'au jak di dusaunyau. Yuhanis pulau ngiciakka ngan jemau banyak, bansau ughangtu mesti percayau ngan Jemau diau ka datang la udim diau, diautu Yesus.”

⁵Satu ndengagh titu, ughangtu mintak dibaptiska atas namau Tuhan Yesus.

⁶Penarau Paulus nepiakka tanganau di palak ughangtu, ughangtu dikuasaui Rua Allah, mangku mulai ngiciak ngan basau Rua ngiciakka ceritau Allah.

⁷Gegalau ughangtu kekirau duau belas ughang.

⁸Selamau tigau bulan Paulus maju pegi ke ghuma sembayang ngajagh jemau di situ ngan beghani. Ngan ajaghannyautu diau ngajung ughangtu percayau ngan kici'annyau ceritau Allah endak merinta.

⁹Anyautu adau bebeghapau jemau diau enggup ndengagh kici'annyautu ngan enggup percayau, lagi di mukau jemau banyak ughangtu nggelakka kici'annyau ceritau jalan Tuhan. Itula sebapau Paulus ninggalka ughangtu, mangku pegi ke sekul Tiranus serempak ngan jemau diau percayau ngan Yesus. Idang aghi diau peragau ngan jemau di situ.

¹⁰Diau ngerjauka titu selamau duau taun, mangku gegalau jemau diau mendam di daira Asia ndengagh katau Allah, empuak jemau Yahudi, empuak jemau bangsau lain. Ughangtu ndengagh katau Allah galau.

¹¹Paulus ngerjauka banyak tandau nyelia karnau Allah.

¹²Lagi setangan ngan kain diau la dipakai Paulus dibatak jemau, ditepiakka di jemau buidapan, mangku idapannyau ghadu ngan rua sitan ngeluagh jak di ughangtu.

¹³Adau pulau bebeghapau dukun jemau Yahudi diau pegi ke manau-manau di daira itu. Ughangtu ncubau ngisitka iblis pakai namau Tuhan Yesus. Ughangtu bekatau, “Atas namau Yesus diau dikiciakka Paulus itu aku ngajung kaba keluagh.”

¹⁴Dukun itu tujua anak Sekiwa. Diautu sughang imam bepangkat tinggi jemau Yahudi.

¹⁵Anyautu iblis tadi nimbal ngan ughangtu, kataunyau, “Yesus aku keruan, Paulus aku keruan pulau, anyautu kamuni sapau?”

¹⁶Mangku jemau diau diarung iblistu nerengkam ughangtu, dibaduki ngan dikalakanyau. Mangku ughangtu belaghi jak di ghumahau ngan telanjang ngan lukau-lukau.

¹⁷Gegalau jemau Yahudi ngan jemau bangsau lain di Ipisus ndengagh ceritau itu. Ughangtu penakut galau, mangku namau Yesus tamba dipuji-puji.

¹⁸Banyak jemau diau la percayau ngan Yesus datang ngaku'i di mukau jemau banyak setu diau la dikerjaukaNyau.

¹⁹Banyak pulau jak di ughangtu diau ngerjauka kuasau gelap nunggalka buku-buku mangku disilap di mukau jemau banyak. Regau bukutu kekirau limau pulua ribu tanci pirak.

²⁰Ngan carau luak itu katau Tuhan tamba tesiar ngan tamba bekuasau.

²¹La udim gegalaunyau itu, Paulus merencanauka endak pegi ke Makedunia ngan Akaya mangku ke Yerusalim. Kataunyau, “La udim pegi ke situ, aku mesti pegi pulau ke Rum.”

²²Mangku diau ngajung duau ughang anak-buahau, Timutius ngan Irastus, dulu pegi ke Makedunia, penarau diautu gi mendam di Asia.

²³Kekirau masau itula adau keributan besak karnau ajaghan ceritau Yesus.

²⁴Di situ adau sughang tukang pirak, namaunyau Dimetrius. Diau mbuat cak ghuma diwau Artemis jak di pirak. Kerjaunyautu ngasilka banyak tanci batan endak tukangau.

²⁵Diautu nunggalka anak-buahau ngan tukang pirak lainau, mangku bekatau, “Kamuni keruan, ngan kerjau ini kitau dapat pengidupan.

²⁶Mbak kini kamu la nginak ngan ndengagh galau setu diau dikerjauka Paulus itu. Diau ngiciakka, bansau diwau diau dibuat jemau ukan diwau ngan nidau bediau kuasau. Mangku diau la buasil mbuat banyak jemau percayau ngan ajaghannyautu, ukan cuman di Ipisus, tapitu laka di gegalau Asia pulau.

²⁷Bayaunyau, kerjau kitauni ka digelakka jemau. Ukan itu ajau, ghuma diwau Artemis pulau nidau ka bediau retiau agi. Mangku Artemistu ka kelengitan keagungannyau, awuak diautu disemba ngan dipuji gegalau jemau di Asia ngan gegalau deniau.”

²⁸Ndengagh titu, ati ughangtu besak, mangku ughangtu tegauk-gauk, kataunyau, “Idup Artemis, diwau jemau Ipisus!”

²⁹Gegalau kuta itu kacau-balau, mangku ughangtu rami-rami pegi ke balai petemuan. Ughangtu nangkap Gayus ngan Aristarkus, jemau Makedunia, kantin Paulustu, mangku ditaghiak ke balaitu.

³⁰Paulus endak masuak ngikut ughangtu, anyautu jemau percayau di situ nidau ngajung diau.

³¹Lagi bebeghapau pengulu daira Asia itu diau la sekawan ngan Paulus ngajung jemau ngiciakka ngan Paulus, supayau jangan pegi ke balai itu.

³²Penarau itu, jemau diau betunggal di balai tadi tegauk-gauk. Diau sughang ngiciakka luak itu, diau sughang ngiciakka luak ini. Gegalaunyautu kacau-balau. Kebanya'an jak di ughangtu nidau keruan, ngapau ughangtu betunggal.

³³Separau jak di ughangtu ngirau Aliksandar njadi kepala'au, karnau diautu diajung jemau Yahudi ke mukau jemau banyak. Mangku Aliksandar ngenjuakka tandau ngan tanganau endak ngiciak mbenaghka diriau di adapan jemau banyak itu.

³⁴Anyautu satu ughangtu nginak, mbak bansau diautu jemau Yahudi, ughangtu serempak tepekiak-pekiak selamau duau jam, kataunyau, “Idup Artemis, diwau jemau Ipisus!”

³⁵Udim-udimau tukang tulis kuta itu pacak nenangka jemau banyak itu, kataunyau, “Ui, jemau Ipisus. Bilang jemau di gegalau deniau keruan, bansau kuta Ipisus inila nyayia ghuma diwau Artemis ngan batuau diau tumban jak di langit.

³⁶Titu nidau pacak dibanta. Karnau itu tenangla, jangan ngerjauka setu ngan nidau sepadau.

³⁷Kamu mbatak ughang ini ke sini, empuak ughangtu nidau merampuk ghuma diwau kitau ngan nidau nggelakka namaunyau.

³⁸Amun Dimetrius ngan anak-buahau adau aduan, apu nidau bediau pengadilan ngan gubernur? Nengkela ughangtu mbatak pekaraunyautu ke pengadilan.

³⁹Amun gi adau agi setu lainau diau kamu kenda'i, titu mesti dikiciakka di sidang jemau banyak diau sah.

⁴⁰Karnau setu diau tejadi saghini mbayauka kitau. Kitau ka diburuakka ngacauka pemerinta, karnau nidau bediau tapakan diau pacak kitau kiciakka endak mbenaghka kekacauan ini.”

⁴¹Ngan kici'an luak itu diau ngajung jemau banyaktu baliak.