Read Central Malay RASUL 2 Bible Online

RASUL 2 - Central Malay bible

RASUL 2

¹Aghi Pentakusta la sampai, mangku gegalau jemau diau percayau ngan Yesus betunggal sebada.

²Adau muni kedengaghan jak di langit luak angin deghas. Muniautu pacak didengagh di gegalau ghuma bada ughangtu betunggal.

³Mangku tekinak luak lida api diau njilat-njilat, mangku nginggapi ughangtu galau.

⁴Ughang u dikuasaui Rua Allah, mangku mulai ngiciak ngan serbau basau. Ughangtu ngiciak luak la dienjuakka Ruatu.

⁵Masau itu banyak jemau Yahudi diau alim jak di gegalau nenggeri di deniauni ngerayau ke Yerusalim. Ughangtu jemau diau ta'at ngan Allah.

⁶Ndengagh munitu tadi, banyak kematila jemau datang. Ughangtu tegagau galau, karnau ndengagh rasul itu ngiciak ngan basau sesughangan.

⁷Ughangtu kepagauan nian, mangku bekatau, “Apu ukan jemau diau ngiciak ini jemau Galilia galau?

⁸Luak manau kitau pacak ndengagh ughangtu ngiciak ngan basau kitau sesughangan, basau diau kitau pakai di nenggeri asal kitau.

⁹Kitau jak di Partia, Midia, Ilam, jak di Mesuputamia, Yudia ngan Kapadukia, jak di Puntus ngan Asia,

¹⁰jak di Perigia ngan Pampilia, jak di Mesir ngan daira Libia pasigh Kirini. Adau pulau diau datang jak di Rum.

¹¹Adau jemau Yahudi, adau jemau bangsau lain diau la masuak agamau Yahudi. Adau pulau diau datang jak di Kerita ngan Arab. Gegalau kitauni ndengagh ughangni ngiciak ngan basau kitau sesughangan ngiciakka setu diau nyelia diau dikerjauka Allah.”

¹²Ughangtu kemangan ngan kepagauan galau, mangku sangi tanyaui, “Tuapau retiautu?”

¹³Adau pulau jemau nyindir, “Ughangtu mabuak.”

¹⁴Pitrus betegak ngan sebelas rasul itu, mangku ngiciak ngan jemau banyaktu. Ngan suarau bias diau bekatau, “Ui, gegalau kapu dighi diau adau di Yerusalim. Dengaghkala iluak-iluak kataukuni.

¹⁵Jemau ini nidau mabuak luak kapu dighi sangkautu, karnau mbak kini gi akap.

¹⁶Inila diau la dipesan Allah ngan nabi Yuil,

¹⁷‘Allah bekatau: Masau pengabisan saman Aku ka ngenjuakka RuaKu ngan gegalau manusiau. Mangku anak-anak kamu empuak lanang empuak tinau ka ngiciakka katau Allah. Budak bujang ka nginak pengina'an, jemau tuau ka bemimpi mimpika ceritau Allah.

¹⁸Jugau ngan anak-buaKu empuak lanang empuak tinau ka Kuenjuakka RuaKu masau itu, mangku ughangtu ka ngiciakka katau Allah.

¹⁹Aku ka ngerjauka setu diau nyelia di langit ngan tandau di deniau, ka adau dagha ngan api ngan asap bekabut.

²⁰Matau-aghi ka njadi keleman, bulan ka njadi abang luak dagha, antak ka aghi Tuhan datang, aghi besak diau nyelia itu.

²¹Mangku jemau diau ka mintak tulung ngan Tuhan ka diselamatka.’

²²Ui, kapu dighi, dengaghkala kataukuni. Yesus, jemau Nasarit itu, la dipilia Allah. Itu dinyatauka ngan kapu dighi ngan tandau-tandau ngan setu diau nyelia diau dikerjauka Yesus guak kapu dighi ngan kuasau Allah, luak kapu dighi la keruan galau.

²³Nurut rencanauNyau Allah la nyeraka Diau, la kapu dighi bunua ngan ngajung jemau ja'at makuka Diau di kayu salip.

²⁴Anyautu Allah ngidupka Diau jak di mati, dilepaskaNyau jak di sengsarau maut, karnau nidau ka adau Diau maju dalam kuasau mauttu.

²⁵Karnau Daud ngiciakka Diau, ‘Aku maju nginak ke Tuhan. Diau guak Aku, mangku Aku nidau mundur.

²⁶Itula sebapau atiKu riang ngan mulutKu ngagungka Tuhan, mangku badanKu ka mendam tenang ngaghapka Tuhan.

²⁷Dighi nidau ka ngenangka Aku di bada jemau mati. Dighi nidau ngenangka mayat Budak Dighi diau ta'at njadi busuak.

²⁸Dighi nunjuakka ngan Aku jalan diau nuju idup. Aku injiak nianan, karnau Dighi adau guak Aku.’

²⁹Aku endak ngiciak ngan kapu dighi terang-terangan ngiciakka ceritau Daud, bapak bangsau kitau. Diautu mati, mangku dikuburka. Kuburannyautu gi adau guak kitau enggut mbak kini.

³⁰Daudtu sughang nabi, mangku keruan, Allah la bejanji ngan besumpa, mbak bansau sughang jak di pengadau Daud ka dijadika Allah rajau luak diau.

³¹Itula sebapau diau la keruan ngan ngiciakka Mesias, Rajau Penyelamattu, ka ngulang idup ngan ngiciakka, bansau Diau nidau ditinggalka di bada jemau mati ngan badanAu nidau ka busuak.

³²Yesus itula diau Allah idupka agi jak di mati. Kami gegalaunyau la ngina'au nian ngan ngiciakkanyau.

³³Diau diangkat Allah di sebela kananAu, mangku nerimau Rua Allah diau la dijanjika Bapak. Mangku setu diau la kapu dighi dengagh ngan kinak mbak kini, itu Rua Allah diau la dienjuakka ngan kami.

³⁴Daud itu nidau nayiak ke sergau. Diautu bekatau, ‘Allah bekatau ngan TuhanKu,

³⁵duduakla di sebela kananKu, enggut Aku mbuat musua Kaba nyemba Kaba.’

³⁶Mangku gegalau jemau Israil mesti keruan nian, Yesus diau kapu dighi salipkatu dijadika Allah Tuhan ngan Rajau Penyelamat.”

³⁷Satu ndengagh kici'annyautu, ughangtu nyesal nian ngan bingung, mangku betanyau ngan Pitrus ngan rasul lainau, “Tuapau diau mesti kami kerjauka?”

³⁸Pitrus nimbal, “Ubaila perembak kapu dighi jak di dusau ngan mintak dibaptis ngan namau Yesus Keristus, mangku dusau kapu dighi diabiska, mangku kapu dighi ka dienju'i Rua Allah.

³⁹Karnau inila setu diau dijanjika Allahtu batan endak kapu dighi ngan pengadau kapu dighi ngan batan endak jemau diau di bada jawua diau ka dipilia Allah, Tuhan kitautu.”

⁴⁰Luak itula Pitrus ngiciak ngan ughangtu. Mangku ngan banyak katau lain diau ngajung ughangtu nian, supayau njawuaka diriau jak di jemau ja'attu diau ka diukum Allah.

⁴¹Banyak jemau percayau ngan kici'an Pitrus, mangku mintak dibaptis. Gegalau jemau diau percayau aghi itu kekirau tigau ribu ughang.

⁴²Ngan rajin jemau diau percayautu belajagh jak di rasul ngan maju seghundak. Ughangtu makan, makan jamuan Tuhan ngan bedu'a seghundak.

⁴³Banyak nian tandau nyelia diau dikerjauka rasul itu, mangku gegalau jemau kepagauan ngan penakut.

⁴⁴Gegalau jemau diau percayau maju seghundak, mangku setu diau adau di ughangtu dienjuakka ngan jemau diau nidau bediau.

⁴⁵Adau jemau diau njualka retau bendaunyau, mangku tanciau dienjuakka ngan jemau nurut kepentingannyau sesughangan.

⁴⁶Idang aghi ughangtu maju seghundak di Ghuma Allah. Ughangtu makan, makan jamuan Tuhan jak di ghuma ke ghuma ngan riang ngan tulus ati.

⁴⁷Ughangtu maju ngagungka Allah, mangku gegalau jemau riang ngan ughangtu. Mangku idang aghi ughangtu maju betamba, karnau Tuhan ngenju'i jemau diau diselamatkaNyau.