Read Central Malay RASUL 20 Bible Online

RASUL 20 - Central Malay bible

RASUL 20

¹La udim Ipisus tenang agi, Paulus nunggalka jemau percayau ngan neguaka ati ughangtu. Mangku diau pamit endak pegi ke Makedunia.

²Diau berayak ke daira itu. Ngan banyak petua diau neguaka ati jemau percayau di situ. Mangku diau pegi ke Yunani.

³Selamau tigau bulan diau mendam di situ, mangku diau endak belayar ke Siria. Anyautu adau ceritau, bansau jemau Yahudi sepakat endak mbunua diau. Itula sebapau diau mutuska endak pegi wuan Makedunia.

⁴Diau dikantini Supatar, anak Pirus, jemau Beria, ngan Aristarkus ngan Sekundus, jemau Tesalunika, ngan pulau Gayus, jemau Derbi, ngan Timutius, ngan Tikikus ngan Terupimus, jemau Asia.

⁵Ughangtu pegi ndului kami, mangku nunggu kami di Teruas.

⁶La udim aghi rerayau Ruti Nidau Beghagi, kami ninggalka Pilipi belayar ke Teruas. Limau aghi udim itu, kami la sampai di Teruas nunggal agi ngan ughangtu. Kami singga di situ seminggu.

⁷Malam minggu kami betunggal makan, makan jamuan Tuhan, mangku Paulus beketuba ngan jemau percayau di situ enggut tenga malam, karnau pagiau diau endak bejalan agi.

⁸Kami betunggal di luan di pucuak. Di situ banyak lampu dimaghakka.

⁹Adau budak bujang, namaunyau Iutikus. Diautu duduak di awangan. Mangku karnau Paulus lamau nian ngiciak, budak bujangtu tekantuak mangku tekelap, mangku tumban jak di tingkat tigau. Satu diau dikatangka, diau la mati.

¹⁰Paulus tughun ke bawa, mangku meluak budak bujangtu, kataunyau, “Jangan ghegak. Diauni gi idup.”

¹¹La udim itu diau nayiak agi ke pucuak, diau ngagiaka ruti mangku makan jamuan Tuhan. La udim makan diau ngulang ngiciak, enggut paghak siang, mangku diau bejalan.

¹²Budak bujang tadi diantat baliak ke ghumahau, ughangtu riang galau.

¹³Kami ndulu pegi ke kapal endak belayar ke Asus. Di situ kami endak ndepatka Paulus ke kapal. Diau endak luak itu, karnau diau ka ke situ jalan daghat.

¹⁴La betemu kami di Asus, diau nayiak kapal, mangku kami belayar ke Metilini.

¹⁵Jak di situ kami belayar agi, pagiau kami lalu di bada tipatan Kius. Pagi di aghiau kami ke Samus, mangku pagi di aghiau agi kami sampai di Militus.

¹⁶Paulus la mutuska nidau ka singga di Ipisus, supayau jangan lamau di Asia, karnau diau endak cecepat sampai di Yerusalim, amun pacak antak ka aghi rerayau Pentakusta.

¹⁷Di Militus Paulus ngajung jemau pegi ke Ipisus mintak pengulu jemau Keristen datang ke Militus.

¹⁸Ughangtu la sampai, mangku Paulus bekatau, “Kapu dighi keruan, luak manau carau idupku selamau ini di guak kapu dighi, jak di petamau aku sampai di Asia.

¹⁹Ngan ngensian aku bekerjau batan endak Tuhan. Aku banyak ngeluaghka ayiak-matau ngan banyak meghasauka penanggungan jak di jemau Yahudi diau endak mbunua aku.

²⁰Aku nidau mandak ngiciakka setu diau begunau ngan kapu dighi. Gegalaunyautu kukiciakka ngan ajaghka, empuak di mukau jemau banyak empuak di ghuma kapu dighi.

²¹Empuak jemau Yahudi empuak jemau Yunani aku maju ngingatka nian, supayau ughangtu ngubai peremba'au, datang ngan Allah ngan percayau ngan Tuhan kitau Yesus Keristus.

²²Mbak kini aku pegi ke Yerusalim, karnau endak na'ati Rua Allah. Aku nidau keruan, tuapau diau ka tejadi ngan akuni di situ.

²³Aku cuman keruan, setu diau dinyatauka Rua Allah di bilang kuta, bansau aku ka masuak jil ngan sengsarau.

²⁴Anyautu aku nidau nyanauka idupkuni, asal aku pacak ngudimi kerjauku diau la ditugaska Tuhan Yesus ngan aku ngan setia enggut mati, ngiciakka ceritau keilu'an Allahtu.

²⁵Aku la nandangi kapu dighi galau ngan la ngiciakka pulau ceritau Allah merinta njadi Rajau. Mbak kini keruanila, kapu dighi nidau ka betemu agi ngan aku.

²⁶Itula sebapau kukatauka ngan kapu dighi mbak kini, amun adau jak di kapu dighi diau benasau, itu ukan salaku agi.

²⁷Karnau nidau kekela aku malas ngerjauka kerjauku ngiciakka ngan kapu dighi gegalau rencanau Allah.

²⁸Jagauila diri kapu dighi ngan jagauila pulau gegalau jemau Keristen diau la dipercayauka Rua Allah ngan kapu dighi, supayau dijagaui, karnau kapu dighi la dijadika tukang sayia jemau Keristen. Allahtu diau njadika ughangtu hak Allah, karnau Ana'Autu la mati batan endak ughangtu.

²⁹Aku keruan, amun aku la pegi, setuau diau ganas ka datang guak kapu dighi, mangku jemau diau kapu dighi jagauitu ka njadi makanan setuautu.

³⁰Lagi jak di kapu dighini pulau ka adau jemau diau ka ngiciakka ceritau diau nidau benagh. Ughangtu ngerjauka titu, mangku jemau diau la percayau ngan Yesus ka sesat ngan ngikut ughangtu.

³¹Karnau itu, sepepadaula! Ingatkala, mbak bansau aku ngajagh kapu dighi siang malam selamau tigau taun ngan banyak ayiak matau.

³²Mangku mbak kini aku nyeraka kapu dighi ngan Allah, supayau Diau njagaui kapu dighi ngan kapu dighi na'ati ceritau keilu'an Allah. Allahtu bekuasau nguatka kapu dighi ngan ngenjuakka setu diau iluak diau la disediauka batan endak gegalau umatAu.

³³Nidau kekela aku endak pirak ngan emas ngan baju jak di jemau.

³⁴Kapu dighini keruan, mbak bansau aku rajin bekerjau ngan tangankunila batan endak pengidupanku ngan kantin-kantinku diau ngikut aku.

³⁵Ngan gegalaunyautu aku la ngenjuakka penauan ngan kapu dighi, bansau ngan kerjau luak itula kitau mesti nulung jemau diau nidau kuat. Kitau mesti ngingatka katau Tuhan Yesus diau dikiciakkaNyautu, ‘Iluakla ngenjuak sangkan nerimau!’ ”

³⁶La udim ngiciak luak itu, Paulus ngan gegalau jemau itu nunduak mangku bedu'a.

³⁷Ughangtu nangis sesedanan galau, mangku sampai besalaman ngan Paulus, ngiciakka, “Bejalanla!”

³⁸Ughangtu kemada'an nian, karnau diau ngiciak, ughangtu nidau ka betemu ngan diau agi. Mangku ughangtu ngantat diau ke kapal.