Read Central Malay RASUL 21 Bible Online

RASUL 21 - Central Malay bible

RASUL 21

¹La udim pamit, kami beceghai ngan ughangtu, mangku belayar ke pulau Kus. Pagiau kami sampai di Rudus, mangku jak di situ kami belayar ke Patara.

²Di Patara kami dapat kapal diau endak ke Pinisia. Kami nayiak kapal itu mangku belayar.

³Mangku kina'an Siprus di sebela kidau. Kami maju belayar nuju ke Siria, mangku kami ndaghat di Tirus, karnau isi kapaltu endak dibungkar di kuta itu.

⁴Di situ kami tandang ngan jemau diau percayau ngan Yesus, mangku singga ngan ughangtu seminggu. Ngan petunjuak Rua Allah ughangtu ngici'i Paulus, supayau jangan pegi ke Yerusalim.

⁵Anyautu la abis masaunyau, kami pegi jak di situ melajuka pejalanan kami. Gegalau ughangtu ngan anak-biniau ngantat kami inggan luagh kuta. Di tepi pantai di situ kami nunduak galau ngan bedu'a.

⁶La udim itu, kami salaman mangku nayiak kapal. Ughangtu baliak ke ghumahau.

⁷Kami maju belayar jak di Tirus ke Petulemais. Di situ kami tandang ngan jemau percayau, mangku kami seghundak ngan ughangtu semalam.

⁸Pagi di aghiau kami pegi mangku sampai di Kaisaria. Di situ kami pegi ke ghuma Pilipus, penginjiltu, mangku mendam di ghumahau. Diautu sala sughang jak di tujua ughang diau dipilia di Yerusalim senitu.

⁹Pilipustu adau empat ughang anak gadisau diau pacak ngiciak luak nabi.

¹⁰La bebeghapau aghi kami di situ, adau sughang nabi datang jak di Yudia, namaunyau Agabus.

¹¹Diau datang njenguak kami, ngambiak bebat Paulus, mangku ngebat keting ngan tanganau sendighi ngan bekatau, “Luak inila diau dikiciakka Rua Allah, ‘Jemau diau ngempu bebat ini ka dikebat jemau Yahudi luak ini di Yerusalim, mangku diseraka ngan jemau bangsau lain.’ ”

¹²Ndengagh titu kami ngan jemau percayau di situ mintak nian, supayau Paulus jangan pegi ke Yerusalim.

¹³Anyautu Paulus nimbal, “Ngapau kapu dighi nangis galau? Ngan carau luak itu kapu dighi mbuat aku madak ajau. Karnau aku sukau ukan ajau endak dikebat, tapitu pulau endak mati di Yerusalim karnau namau Tuhan Yesus.”

¹⁴Paulus enggup ndengaghka kami, mangku kami mandak negahinyau. Katau kami, “Nengkela kendak Tuhan ajaula diau tejadi.”

¹⁵La bebeghapau aghi kami singga di Kaisaria, kami bedandan mangku pegi ke Yerusalim.

¹⁶Adau bebeghapau jemau percayau jak di situ pegi pulau serempak ngan kami. Ughangtu ngantat kami ke ghuma Manasun. Diautu jemau Siprus ngan la lamau jugau percayau. Kami ka numpang di ghumahau.

¹⁷Satu kami sampai di Yerusalim, kami diterimau jemau percayau ngan riang.

¹⁸Pagi di aghiau kami pegi serempak ngan Paulus nandangi Yakubus. Gegalau pengulu jemau Keristen adau pulau di situ.

¹⁹Paulus ngiciakka pesan jak di jemau Keristen lain, mangku nceritauka ngan neghagi nian gegalaunyau diau dikerjauka Allah di guak jemau bangsau lain karnau kerjau Paulus.

²⁰Ndengagh ceritau Paulustu ughangtu ngagungka Allah galau. Mangku ughangtu bekatau ngan Paulus, “Paulus, kaba la keruan, mbak bansau beribu-ribu jemau Yahudi la percayau. Ughangtu maju na'ati ukum Taurat.

²¹Ughangtu la ndengagh ceritau kaba, bansau kaba ngajagh gegalau jemau Yahudi diau di guak bangsau lain, supayau jangan na'ati ukum Musatu, karnau kaba ngiciakka, supayau ughangtu nidau nyunatka ana'au ngan nidau nuruti adat lembagau kitau.

²²Jemau Yahudi diau percayau cengki ka ndengagh, bansau kaba la adau di sini. Mbak kini luak manau?

²³Iluakla kaba nuruti katau kamini: Adau empat ughang di sini diau la beniat ngan Tuhan.

²⁴Bata'ila ughangtu ngan kerjaukala pembasuan nyucika diri serempak ngan ughangtu, mangku bayighila bayighan ughangtu, supayau gumba'au pacak dicukur. Mangku gegalau jemau ka keruan, bansau gegalaunyau diau ughangtu dengagh ceritau kaba nidau benagh nian, karnau kabatu pulau nuruti ukum Taurat.

²⁵Ceritau jemau bangsau lain diau percayau ngan Tuhan, kami la ngighimka surat ngan ughangtu ceritau pendapat kami, mbak bansau ughangtu jangan makan makanan diau la disiwauka, jangan makan dagha ngan daging benatang diau mati ditekiak ngan jangan menaugawia.”

²⁶Pagiautu Paulus pegi ngadauka pembasuan diri serempak ngan empat ughangtu. Udim itu ughangtu pegi masuak Ghuma Allah endak ngiciakka, kebilau pembasuantu ka udim, mangku kerban batan endak bilang ughangtu ka dikerbanka.

²⁷Jangkau tujua aghi itu laka udim, jemau Yahudi jak di Asia nginak Paulus dalam Ghuma Allah, mangku ughangtu ngasung jemau banyak, udim itu ditangkap

²⁸sampai tegauk, kataunyau, “Ui, jemau Israil, mela tetulungan! Inila jemaunyau diau ngajagh di manau-manau, ngajaghka gegalau jemau melawan bangsau kitau, melawan ukum Taurat ngan Ghuma Allah ini. Mbak kini diau mbata'i pulau jemau Yunani masuak dalam Ghuma Allah, mangku ngumuhi bada diau suci ini.”

²⁹Ughangtu ngiciak luak itu, karnau la nginak Terupimus jak di Ipisus ngan Paulus di kuta, mangku ughangtu sangkau, Paulus la mbatak diau masuak Ghuma Allah.

³⁰Gegalau kuta njadi kacau-balau. Jemau banyak datang rami-rami begumbul, mangku ughangtu nangkap Paulus, ditaghi'au keluagh jak di Ghuma Allah. Masau itu pulau mukau lawang Ghuma Allah dikatupka galau.

³¹Penarau ughangtu endak mbunua diau, la dikiciakka ngan kumandan tentera Rum, bansau gegalau kuta dang kacau-balau.

³²Kumandantu cecepat mbatak tenterahau pegi ke guak jemau banyak tadi. Satu jemau banyaktu nginak kumandan ngan tenterahautu, ughangtu mandak mbaduki Paulus.

³³Kumandantu pegi guak Paulus nangkap diau, mangku ngajung anak-buahau ngebat diau ngan duau rantai ngan betanyau, “Sapau jemau ini? Tuapau la dikerjaukanyau?”

³⁴Separau jak di jemau banyaktu tegauk luak ini, separau luak itu. Ughangtu ganau, mangku kumandantu nidau pacak ngeruani, tuapau sebenaghau diau la tejadi. Mangku diau ngajung Paulus dibatak ke binting.

³⁵La sampai di tanggau, jemau banyaktu mara kematila, mangku Paulus tepasau diinjungka tentera.

³⁶Jemau banyaktu ngikut sampai tegauk, “Bunuala diau!”

³⁷La endak masuak dalam binting, Paulus bekiciak ngan kumandan tadi, “Bulia aku ngiciak jerang ngan dighi?” Katau kumandantu, “Kaba pacak basau Yunani?

³⁸Amun luak itu, kaba ukan jemau Mesir diau empaini ngadauka kekacauan, mangku belaghi mbatak empat ribu ughang pengacau bepakaian ke padang bungin?”

³⁹Paulus nimbal, “Akuni jemau Yahudi, asalku jak di Tarsus, kuta diau pentingtu di Kilikia. Ajungla aku ngiciak ngan jemau banyak ini.”

⁴⁰La udim diajung ngiciak, Paulus betegak di tanggau, mangku ngenjuakka tandau endak ngiciak. Jemau banyaktu la diam, diau mulai ngiciak pakai basau Ibrani, kataunyau,