Read Central Malay RASUL 25 Bible Online

RASUL 25 - Central Malay bible

RASUL 25

¹La tigau malam Pestus sampai di situ, diau pegi jak di Kaisaria ke Yerusalim.

²Di situ imam-imam bepangkat tinggi ngan pengulu-pengulu jemau Yahudi datang ngadap diau mburuakka Paulus. Ughangtu mintak tulung nian,

³supayau diau iluak ngan ughangtu, mangku ngajung Paulus dibata'i ke Yerusalim, karnau ughangtu la sepakat endak mbunua diau di tenga jalan.

⁴Pestus nimbal, “Paulus dang dikawalka di Kaisaria. Akuni pulau nidau lamau agi ka ngulang ke situ.

⁵Jadi, pengulu-pengulu pacak ngikut ke situ serempak ngan aku, mangku ngadukanyau, amun ngenian diau besala.”

⁶Kekirau delapan apu sepulua aghi agi Pestus adau di Yerusalim. La udim itu diau ngulang ke Kaisaria. Pagi di aghiau diau ngadauka sidang pengadilan ngan ngajung Paulus diadapka.

⁷Paulus la sampai, jemau Yahudi diau la datang jak di Yerusalim betegak ngelilingi diau ngan mulai ngiciakka banyak buru'an diau ja'at. Anyautu ughangtu nidau pacak mbuktika buru'annyautu.

⁸Mangku Paulus mbenaghka diriau, kataunyau, “Aku dikit kia endiak besala, empuak ngan ukum Taurat jemau Yahudi, empuak ngan Ghuma Allah, empuak ngan Kaisar.”

⁹Anyautu Pestus endak melemakka ati jemau Yahudi, mangku diau bekatau, “Kaba endak pegi ke Yerusalim, mangku diadili di situ di adapanku karnau buru'an itu?”

¹⁰Paulus nimbal, “Mbak kini aku betegak di sini ngadap pengadilan Kaisar. Di bada inila aku mesti diadili. Dighitu keruan pulau aku dikit kia endiak besala ngan jemau Yahudi.

¹¹Amun aku sala nian ngan ngerjauka setu diau ja'at diau pantas diukum ngan ukuman mati, aku sukau mati. Anyautu amun buru'an ughangtu nidau benagh, nidau sughang kia pacak nyeraka aku ngan ughangtu endak meriangka ughangtu. Aku mintak diadili ngan Kaisar!”

¹²Pestus buijau ngan jemau diau ngenjuakka petua ngan diau. La udim itu diau bekatau, “Kaba la mintak diadili ngan Kaisar, kaba mesti pegi ngadap Kaisar.”

¹³Nidau lamau udim itu rajau Agripa ngan Berniki datang ke Kaisaria endak ngiciakka salam ngan Pestus.

¹⁴La bebeghapau aghi ughang duautu adau di situ, Pestus ngiciakka pekarau Paulus ngan rajau, kataunyau, “Di sini adau sughang kawalan diau ditinggalka Pelikes.

¹⁵Masau aku adau di Yerusalim, imam-imam bepangkat tinggi ngan pengulu-pengulu jemau Yahudi ngiciakka buru'an ughangtu mburuakka jemau itu ngan mintak, supayau diau diukum.

¹⁶Katauku ngan ughangtu, ‘Nidau biasau jemau Rum nyeraka sughang diau diburuakka luak itu ajau, amun diau lum diadapka ngan jemau mburuakka ngan lum pacak mbenaghka diriau.’

¹⁷Itula sebapau ughangtu ngikut ke sini serempak ngan aku, mangku pagi di aghiau aku ngadauka sidang pengadilan ngan ngajung jemau itu dibatak ngadap.

¹⁸Satu jemau diau mburuakkanyau betegak ngiciakka buru'annyautu, ughangtu nidau ngiciakka setu diau ja'at, luak aku kirau ka dikiciakka.

¹⁹Ughangtu cuman bebala mbalaka ceritau agamau ngan ceritau sughang jemau diau benamau Yesus diau la mati. Anyautu Paulus ngiciakka, bansau Diau idup nian.

²⁰Aku bingung, luak manau aku mesti merisau pekarau luak itu, mangku aku betanyau, apu diau sukau pegi ke Yerusalim ngan diadili di situ.

²¹Anyautu Paulus mintak diadili ngan Kaisar. Diau mintak maju tekawal sampai nunggu, enggut pekaraunyau diputuska ngan Kaisar. Itula sebapau aku ngajung diau tekawal, enggut pacak kukighimka ke Kaisar.”

²²Katau Agripa ngan Pestus, “Aku endak ndengagh jemau itu.” Katau Pestus, “Pagi dighi ka ndengaghka diau.”

²³Pagi di aghiau Agripa ngan Berniki datang ngan gegalau kekayauannyau ngan diregaui nian. Ughang duautu masuak bada pengadilan, ngan kumandan ngan pengulu-pengulu kuta masuak pulau. La udim itu Pestus ngajung, supayau Paulus diadapka.

²⁴Pestus bekatau, “Rajau Agripa ngan gegalau kapu dighi diau adau di sini. Kina'ila jemau ini. Diautu diburuakka gegalau jemau Yahudi, empuak diau adau di Yerusalim, empuak diau adau di sini. Ughangtu la njenguak aku ngan ngiciakka tegauk-gauk, bansau jemautu nidau bulia idup lamau agi.

²⁵Anyautu akuni nidau nemuka setu diau dikerjaukanyau diau pantas diukum mati. Mangku karnau diautu la mintak diadili ngan Kaisar, aku mutuska endak ngighimkanyau ngadap Kaisar.

²⁶Anyautu lum bediau setu diau mesti kutulis ngan Kaisar ceritau diau. Itula sebapau aku ngadapka diau ngan gegalau kapu dighi, petamau ngan dighi, rajau Agripa, supayau la udim diau diperisau, adau setu diau pacak kutulis.

²⁷Karnau pendapatku nidau pantas ngighimka sughang kawalan ngan nidau nyatauka buru'an diau diaduka ngan diau.”