Read Central Malay RASUL 26 Bible Online

RASUL 26 - Central Malay bible

RASUL 26

¹Agripa bekatau ngan Paulus, “Kaba bulia ngiciak endak mbenaghka diri kaba.” Mangku Paulus ngangkat tanganau ngan ngiciak endak mbenaghka diriau, kataunyau,

²“Rajau Agripa diau kuregaui. Aku riang nian, karnau saghini aku pacak ngiciak mbenaghka diriku di adapan dighi karnau gegalau buru'an jemau Yahudi,

³petamau karnau dighi keruan nian adat lembagau jemau Yahudi ngan pendapat ughangtu diau nidau semegi. Itula sebapau aku mintak, supayau dighi ndengaghka kici'anku ngan ngaligh.

⁴Gegalau jemau Yahudi keruan carau idupku jak di keciak, karnau jak di keciak aku mendam di pugan bangsauku di Yerusalim.

⁵La lamau ughangtu keruan aku. Amun ughangtu endak, ughangtu pacak ngiciakka, mbak bansau aku la idup luak jemau Parisi nurut peraturan agamau kitau diau ketat nian.

⁶Mangku mbak kini aku ngadap pengadilan, karnau aku ngaghapka janji diau la Allah janjika ngan niniak puyang kitau ka ditepati.

⁷Janji itu pulau diaghapka duau belas jungku bangsau kitau, mangku ughangtu sembayang ngan Allah siang-malam. Karnau janji itula diau kuaghapka, aku diaduka jemau Yahudi.

⁸Ngapau kapu dighi nidau endak percayau, bansau Allah ngidupka jemau mati?

⁹Senitu akuni pulau bependapat, bansau aku mesti ngerjauka gegalaunyau endak melawan Yesus, jemau Nasarit itu.

¹⁰Nyela, aku ngerjauka titu di Yerusalim. Aku bulia surat kuasau jak di imam-imam bepangkat tinggi, mangku banyak jemau percayau kumasuakka dalam jil ngan tetuju, amun ughangtu diukum mati.

¹¹Aku rajin nganiayau ughangtu ngan masau ughangtu, supayau ninggalka setu diau dipercayaui. Karnau mara nian nginak ughangtu, aku nganiayau ughangtu di manau-manau, sampai di kuta jawua.”

¹²“Ngan rencanau itu aku pegi ke Damsik mbatak surat kuasau jak di imam-imam bepangkat tinggi.

¹³Aku dang di tenga jalan kekirau tengaghi, adau sinagh jak di langit, terangla diau sangkan matau-aghi. Terangtu nyinaghi di sekitar aku ngan kantin-kantinku.

¹⁴Kami rubua galau, mangku aku ndengagh suarau ngiciak ngan aku pakai basau Ibrani, ‘Saulus, ngapau kaba maju nganiayau Aku? Kabatu ka sengsarau, amun maju melawan Aku.’

¹⁵Mangku katauku, ‘Sapau Dighi, Tuhan?’ Katau Tuhan, ‘Akuni Yesus diau kaba aniayau.

¹⁶Mbak kini mela, betegakla! Aku ngancakka diriKu ngan kaba endak netapka kaba njadi tukang ngiciak ngiciakka gegalaunyau diau la kaba kinak ceritau Aku ngan setu diau ka Kutunjuakka ngan kaba nantitu.

¹⁷Aku ka mbibaska kaba jak di jemau Yahudi ngan bangsau lain. Aku ka ngajung kaba njenguak ughangtu

¹⁸endak mbukakka matau ughangtu, supayau ughangtu ngeluagh jak di keleman masuak terang, supayau ughangtu lepas jak di kuasau iblis mangku dikuasaui Allah. Mangku dusaunyau ka diabiska, karnau ughangtu percayau ngan Aku, mangku ughangtu njadi angguta umat Allah diau dipilia itu.’ ”

¹⁹“Itula sebapau, rajau Agripa, aku maju ta'at ngan pengina'an diau la kuterimau jak di Allah.

²⁰Ngan terang-terangan aku ngiciakka ngan jemau, mbak bansau ughangtu mesti ngubai peremba'au jak di dusaunyau ngan ngulang njenguak Allah ngan mbuktika ngan idupau, bansau ughangtu la ngubai nian. Aku ngiciakka titu dulu sekali di Damsik, udim itu di Yerusalim ngan di gegalau Yudia, mangku pulau ngan jemau bangsau lain.

²¹Itula sebapau jemau Yahudi nangkap aku di Ghuma Allah endak mbunua aku.

²²Anyautu enggut mbak kini aku dijagaui Allah, mangku aku pacak betegak di sini ngiciak ngan gegalau jemau, empuak besak empuak keciak. Setu diau kukiciakka itu semegi ngan setu diau la dikiciakka nabi-nabi ngan Musa.

²³Ughangtu ngiciakka, mbak bansau Rajau Penyelamat diau dijanjika Allahtu mesti sengsarau, mangku Diau dulu sekali ka ngulang idup jak di mati. Mangku Diau ka ngenjuakka pengertian ngan jemau Yahudi ngan jemau lain pulau luak manau ka selamat.”

²⁴Penarau Paulus ngiciakka gegalaunyautu endak mbenaghka diriau, Pestus tegauk, kataunyau, “Kaba gilau, Paulus! Kepintaran kaba mbuat kaba gilau.”

²⁵Paulus nimbal, “Aku nidau gilau, Pestus diau kuregaui. Aku ngiciakka diau benagh ngan rupu'an diau waras.

²⁶Rajau pulau keruan nian gegalau ceritau itu. Karnau itu aku ngiciak terang-terangan ngan rajau. Aku percayau rajau cetau la ndengagh gegalau ceritautu, karnau gegalaunyautu nidau tejadi di bada diau tuasing.

²⁷Rajau Agripa, apu dighi percayau ngan kici'an nabi-nabi? Aku keruan, dighi percayau.”

²⁸Katau Agripa, “Kaba kirau gampang njadika aku jemau Keristen ngan jangkau luak ini?”

²⁹Paulus nimbal, “Apu gi lamau, apu jerang agi, aku bedu'a ngan Allah, supayau rajau ngan kapu dighi gegalaunyau diau adau di sini ngan ndengagh kici'anku njadi luak aku, cuman nidau tekawal.”

³⁰Mangku rajau ngan gubernur ngan Berniki ngan gegalau jemau lainau betegak galau.

³¹Ughangtu ngeluagh ngan bekiciak sughang ngan diau lain, “Jemau ini nidau ngerjauka setu diau pantas diukum mati ngan dijilka.”

³²Mangku Agripa bekatau ngan Pestus, “Sebenaghau jemau ini pacak dilepaska, amun diau nidau mintak diadili ngan Kaisar.”