Read Central Malay RASUL 5 Bible Online

RASUL 5 - Central Malay bible

RASUL 5

¹Adau sughang diau benamau Ananias ngan biniau, namaunyau Sapira. Ughang duautu njualka sebidang tanahau pulau.

²Tanciau separau dibunika batan endak diau, separau diserakanyau ngan rasul. Biniau pulau keruan.

³Mangku Pitrus ngiciak ngan diau, kataunyau, “Ananias, ngapau kaba enangka iblis nguasaui ati kaba? Ngapau kaba mbu'ungi Rua Allah ngan mbunika separau tanci regau tanatu?

⁴Selamau tanatu lum dijual, itu hak kaba. La udim dijual, tanciau hak kaba pulau. Ngapau kaba endak mbuat luak itu? Kaba ukan mbu'ungi manusiau, tapitu mbu'ungi Allah.”

⁵Satu ndengagh kici'an itu, Ananias rubua mangku mati. Jemau diau ndengagh kejadian itu takut galau.

⁶Mangku budak bujang datang, dibalutau mayattu, dibatak keluagh endak dikuburkanyau.

⁷La tigau jam udim itu, bini Ananias datang. Diau lum keruan tuapau diau empai tejadi.

⁸Katau Pitrus ngan diau, “Kiciakkala ngan aku. Apu sebesak itula tana itu kamu jual?” “Au, nyela.” katau tinautu.

⁹Katau Pitrus, “Ngapau kaba ngan laki kaba sepakat endak nguji Rua Tuhan? Keruanila, jemau diau empai nguburka laki kaba la baliak, mangku ka mbata'i kaba pulau keluagh.”

¹⁰Masau itu pulau tinautu rubua mati di adapan Pitrus. Budak bujang tadi masuak, nginak diautu la mati, mangku dibata'inyau keluagh, dikuburka pasigh lakiau tadi.

¹¹Mangku gegalau jemau percayau takut nian, ngan jemau diau ndengagh ceritau itu takut galau.

¹²Rasul-rasul banyak ngadauka tandau nyelia di guak jemau banyak. Ngan sepakat gegalau jemau percayau maju seghundak di Ghuma Allah di anggung diau benamau Salumu.

¹³Jemau lain nidau bediau diau beghani nyeghundak ngan ughangtu, empuak ughangtu diregaui jemau banyak.

¹⁴Tamba lamau tamba banyak jemau diau percayau empuak lanang empuak tinau.

¹⁵Mangku jemau buidapan dibata'i ke jalan ghedang, ditiduakka belapiak tikagh, mangku amun Pitrus lalu, senidau-nidaunyau kenau bayangau.

¹⁶Mangku jemau datang bererumbungan jak di dusun-dusun di ngepungan Yerusalim, dibata'inyau jemau buidapan ngan jemau diau diarung sitan. Ughangtu dighadui galau.

¹⁷Mangku Imam Besak ngan anak-buahau diau jak di rumbungan jemau Saduki sengit nian,

¹⁸mangku rasul-rasul ditangkap, dimasuakka dalam jil.

¹⁹Malamautu sughang malaikat Tuhan mbukakka duaghau jil, mangku rasultu dibata'inyau keluagh. Malaikattu bekatau,

²⁰“Pegila, betegak di Ghuma Allah ngan kiciakka ngan jemau banyak ceritau idup empai.”

²¹Mangku rasultu nuruti pesan malaikattu. Gi akap nianan ughangtu masuak Ghuma Allah mangku mulai ngajagh di situ. Penarau itu Imam Besak ngan anak-buahau ngajung gegalau pengulu-pengulu jemau Yahudi betunggal endak ngadauka sidang pengadilan agamau. Mangku ughangtu ngajung jemau njenguak rasul tadi di jil endak dibatak ngadap sidangtu.

²²Jemau diau diajungautu la sampai di jil, anyautu rasultu nidau tekinak agi ngan ughangtu, mangku ughangtu ngelipat, dikiciakkanyau.

²³“Kami la sampai di jil,” katau ughangtu, “Kami temuni duaghau jiltu tekunci iluak. Gegalau penjagau adau di badahau di mukau duaghau, anyautu la udim dibukakkanyau, nidau bediau sughang kia diau kami kinak di dalamau.”

²⁴Kumandan penjagau Ghuma Allah ngan imam-imam ndengagh kici'antu, ughangtu temas ngan nanyauka, tuapau diau la tejadi ngan rasul tadi.

²⁵Mangku adau jemau datang njenguak ughangtu ngan ngiciakka, “Ndengaghla, jemau diau kapu dighi masuakka dalam jil, adau di Ghuma Allah ngajagh jemau banyak.”

²⁶Mangku kumandan penjagau pegi ngan anak-buahau ke Ghuma Allah endak mbata'i rasul itu, anyautu nidau ngan carau masau, karnau ughangtu takut, kalu disipati jemau banyak.

²⁷Rasultu dibatak masuak ngadap pengadilan, mangku Imam Besak merisau nanyaui rasultu,

²⁸kataunyau, “Kami nidau nian ngajung kamu agi ngajagh pakai namau Jemau itu. Anyautu mbak kini tenyatau, kamu la nyiarka ajaghan kamu di gegalau Yerusalim, mangku kamu mburuakka kami mbunua Jemau itu.”

²⁹Pitrus ngan rasul lain nimbal, “Kami mesti nuruti kendak Allah, ukan kendak manusiau.

³⁰Yesus itu diau kamu bunua ngan pakuka di kayu salip la diidupka Allah diau niniak puyang kitau semba.

³¹Diautu la ditinggika Allah di sebela kananAu, dijadikaNyau Penguasau ngan Rajau Penyelamat, supayau jemau Israil pacak ngubai ngan dusaunyau diabiska.

³²Kamini la ngeruani ngan ngiciakka gegalau ceritau itu, kami ngan Rua Allah diau dienjuakka Allah ngan gegalau jemau diau na'ati Diau.”

³³Ndengagh kici'antu, ughangtu mara kematila endak mbunua rasul-rasul itu.

³⁴Anyautu adau sughang Parisi jak di angguta pengadilan agamautu, namaunyau Gamali'il. Diautu guru ukum Taurat ngan diregaui gegalau jemau. Diau betegak ngan mintak, supayau rasul tadi diajung keluagh jerang.

³⁵Mangku diau bekiciak ngan sidangtu, “Ui, kapu dighi, rupuakkala iluak-iluak, tuapau diau endak kapu dighi buat ngan ughangtu.

³⁶Senitu adau Tiudas diau nganggap diriau jemau penting. Anak-buahau adau kekirau empat ratus ughang. Diautu dibunua, anak-buahau teceghai-beghai mangku abis.

³⁷La udim itu, masau jemau didaptarka adau Yudas, jemau Galiliatu. Banyak jemau dijadikanyau anak-buahau. Anyautu diau pulau dibunua, mangku gegalau anak-buahautu teceghai-beghai.

³⁸Mbak kini dengaghkala kataukuni: Jangan diapau-apauka ughangtu, dienangka ajau. Amun ajaghan ngan kerjau ughangtu asalau jak di manusiau, cengki ka abis.

³⁹Amun itu asalau jak di Allah, kapu dighi nidau pacak ngabiska ughangtu. Asauku ka tenyatau, bansau kapu dighi melawan Allah.” Mangku petua Gamali'iltu diterimau.

⁴⁰Rasul tadi dipantau, dibaduki ngan pemecit ngan ditegahi agi ngajaghka dalam namau Yesus. Udim itu dilepaskanyau.

⁴¹Rasul itu pegi jak di pengadilantu ngan riang, karnau pantas sengsarau karnau namau Yesus.

⁴²Mangku idang aghi ughangtu maju ngajagh, empuak di Ghuma Allah empuak di ghuma jemau, ngiciakka ceritau Yesus, Diaula Almasih ngan Rajau Penyelamat.