Read Central Malay RASUL 6 Bible Online

RASUL 6 - Central Malay bible

RASUL 6

¹Anak-bua Yesus tamba lamau tamba banyak. Mangku jemau Yahudi diau bebasau Yunani bemumut mumuti jemau Yahudi asli, karnau randaunyau nidau dapat bagian luak diau dienjuakka ngan randau lain batan makanan idang aghi.

²Mangku duau belas rasultu ngajung gegalau anak-buahau betunggal ngan bekatau, “Nidau iluak, amun kami lalai ngiciakka katau Allah, karnau ngurus makanan randau-randau.

³Jadi, kapu dighi piliala tujua ughang jak di kapu dighi diau iluak ngan dikuasaui Rua Allah lagi bepengertian, mangku kami njadika ughangtu pengurus makanan tadi.

⁴Mangku tugas kamini bedu'a ngan nceritauka katau Allah.”

⁵Pendapat itu diterimau gegalau ughangtu. Mangku ughangtu milia Setipanus diau percayau nian ngan dikuasaui Rua Allah, ngan Pilipus, Perukurus, Nikanur, Timun, Parmenas ngan Nikulaus, jemau Antiukia diau masuak agamau Yahudi.

⁶Tujua ughangtu diadapka ngan rasul, mangku rasultu ndu'akanyau ngan nepiakka tanganau di palak ughangtu.

⁷Luak itula ceritau jak di Allah maju tamba tesiar ngan anak-bua Yesus di Yerusalim maju tamba banyak ngan banyak pulau imam percayau ngan Yesus.

⁸Allah iluak nian ngan Setipanus, mangku dienjuakka kuasau ngerjauka banyak tandau nyelia di guak jemau banyak.

⁹Anyautu adau jemau diau melawan Setipanus. Ughangtu asalau jak di Kirini ngan Aliksanderia. Ughangtu sembayang di ghuma sembayang diau dinamauka Libertini. Ughangtu ngan jemau Yahudi jak di Kilikia ngan diau jak di Asia bebala ngan Setipanus.

¹⁰Anyautu ughangtu nidau pacak melawan kici'an Setipanustu, karnau Rua Allah ngenjuakka pengertian nian ngan diau.

¹¹Mangku ughangtu nyuduk jemau batan endak ngiciakka, “Kami la ndengagh jemautu nggelakka Musa ngan Allah.”

¹²Ngan carau luak itula ughangtu ngasung jemau banyak ngan tuau-tuau jemau Yahudi ngan guru-guru ukum Taurat. Mangku Setipanus ditangkap, dibata'i ngadap pengadilan agamau.

¹³Mangku ughangtu ngajung jemau diau ngiciakka setu mbu'ung, kataunyau, “Jemau ini maju nggelakka Ghuma Allah ini ngan ukum Taurat.

¹⁴Karnau kami la ndengagh diau ngiciakka, bansau Yesus, jemau Nasarittu, ka merubuaka bada ini ngan endak nguba adat lembagau diau diajaghka Musa ngan kitau.”

¹⁵Gegalau jemau diau adau dalam sidang pengadilan agamau itu ngina'i Setipanus. Masau itu dayiau kina'an luak dayi sughang malaikat.