Read Central Malay RASUL 7 Bible Online

RASUL 7 - Central Malay bible

RASUL 7

¹Imam Besak betanyau, “Nyela, luak itu?”

²Katau Setipanus, “Ui, kapu dighi gegalaunyau, dengaghkala. Allah diau Mahabesak la datang njenguak Abraham, niniak puyang kitau, masau diau di Mesuputamia, antak ka mendam di Haran.

³Allahtu bekatau, ‘Tinggalkala nenggeri ini ngan adiak-sanak kaba, pegila ke nenggeri diau ka Kutunjuakka ngan kaba.’

⁴Abrahamtu ninggalka nenggeri Kasdim, mangku mendam di Haran. Ba'au la mati, Allah ngajung diau ngalia jak di situ ke nenggeri ini, bada kapu dighi mendam mbak kini.

⁵Masau itu sebagi kia nenggeri ini lum Allah enjuakka ngan Abraham njadi retaunyau ngan retau pengadaunyau, dijanjika ajau, empuak masau itu diau lum adau anak.

⁶Luak ini katau Allah ngan diau, ‘Pengadau kaba ka njadi jemau asing di nenggeri jemau. Ughangtu ka dibudakka ngan dibuati ngan kejam selamau empat ratus taun.

⁷Anyautu Aku ka ngukum bangsau diau mbudakka ughangtu,’ katau Allah. ‘La udim itu ughangtu ka ngeluagh jak di nenggeritu, mangku ka nyemba Aku di bada ini.’

⁸La udim ngiciakka luak itu, janjitu diteguaka Allah ngan carau sunat. Isak, anak Abraham, la adau, mangku Abraham nyunatkanyau masau umurau tujua malam. Udim itu Isak njadi bak Yakub, mangku Yakub njadi bak duau belas ana'au, niniak puyang kitau.

⁹Niniak puyang kitau sengit ngan adingau Yusup, mangku dijualkanyau njadi budak di Mesir. Anyautu Allah njagaui diau,

¹⁰dilepaskaNyau jak di gegalau sengsaraunyau, dienjuakkaNyau pengertian, masau ngadap Piraun, rajau Mesirtu. Mangku Piraun ngenjuakkanyau kuasau nguasaui nenggeri Mesir ngan ngurus gegalau istana Pirauntu.

¹¹Udim itu adau kelapaghan di nenggeri Mesir ngan Kanaan, mangku jemau banyak sengsarau. Mangku niniak puyang kitau nidau bulia makanan.

¹²Satu Yakub ndengagh, adau banyak padi di Mesir, diau ngajung ana'au, niniak puyang kitau, pegi ke situ. Itula empai penembai ughangtu pegi ke Mesir.

¹³Timpau ughangtu pegi ke duau kaliau, Yusup ngiciakka ngan ughangtu, bansau diautu Yusup, ading ughangtu. Mangku Piraun keruan, asal-mulaunyau Yusup.

¹⁴Mangku Yusup ngajung nepatka Yakub, ba'au ngan anak-beghanak cucung-becucung; gegalaunyau tujua pulua limau ughang.

¹⁵Mangku Yakub ngalia ke Mesir. Di situla diau mati ngan niniak puyang bangsau kitau mati pulau di situ.

¹⁶Mayat ughangtu dibatak ke Sikim, dikuburka di kuburan diau dibeli Abraham jak di jemau Himur di Sikim.

¹⁷Laka masaunyau Allah endak nepati janjiAu diau dijanjika ngan Abraham senitu, jemau bangsau kitau di Mesir la tamba banyak.

¹⁸Mangku adau sughang rajau lain merinta di Mesir diau nidau keruan Yusup.

¹⁹Rajau itu nipuka bangsau kitau. Diau kejam ngan niniak puyang kitau, dipasaunyau ncapakka ana'au diau empai adau, mangku bangsau kitau jangan betamba.

²⁰Masau itu Musa lahir. Kupiak itu alap nianan. Selamau tigau bulan diau disayia di ghuma ba'au.

²¹Mangku diau dicapakka, anyautu anak gadis Piraun ngambi'au, mangku disayiau luak ana'au sendighi.

²²Musatu diajagh gegalau ilmu jemau Mesir, mangku diau njadi jemau bekuasau, empuak kici'annyau empuak kerjaunyau.

²³Umur Musa la empat pulua taun, diau terupuak endak pegi nginak adiak-sana'au, jemau Israil.

²⁴Masau itu diau nginak sughang jak di ughangtu disiksau, mangku diau endak mbenaghka jemautu ngan mbunua jemau Mesir tadi.

²⁵Musa sangkau adiak-sana'au ka terti, bansau Allah dang makai diau endak melepaska ughangtu. Anyautu ughangtu nidau terti.

²⁶Pagi di aghiau diau nginak pulau duau ughang jemau Israil belagau, mangku ncubau endak ndamaika ughang duautu, kataunyau, ‘Kamuni sebangsau. Ngapau kamu belagau?’

²⁷Anyautu jemau diau mbaduk kantinautu nulakka Musa ngan bekatau, ‘Sapau diau njadika kaba pengulu ngan akim kami?

²⁸Apu kaba endak mbunua aku pulau, luak kaba mbunua jemau Mesirtu kemaghi?’

²⁹Ndengagh kici'annyautu, Musa larat jak di Mesir, mangku mendam luak jemau asing di Midian. Di situ diau adau duau ughang ana'au.

³⁰La udim empat pulua taun di situ, Musa tekinak sughang malaikat di padang bungin di pasigh Bukit Sinai. Malaikattu adau dalam maghak api di pugan dughi itu.

³¹Musa kemangan ngina'autu, mangku diau masigh ke situ endak ngeruaninyau, mangku diau ndengagh suarau Tuhan diau bekatau,

³²‘Akunila Allah niniak puyang kaba, Allah Abraham, Isak ngan Yakub.’ Musa gemetagh ketakutan, mangku nidau beghani agi ngina'i apitu.

³³Mangku Tuhan bekatau, ‘Paculila terumpa diau kaba pakaitu, karnau bada kaba betegaktu bada beresia.

³⁴Aku la nginak nian kesengsarauan umatKu di Mesir. Aku la ndengagh ughangtu nyempit, mangku Aku la datang endak melepaska ughangtu. Mbak kini pegila, Aku ngajung kaba ngulang ke Mesir agi.’

³⁵Musa itula diau nidau diterimau jemau Israil itu ngan kici'an luak ini, ‘Sapau diau njadika kaba pengulu ngan akim kami?’ Musa itula diajung Allah njadi pengulu ngan penyelamat, ditulung malaikat diau kina'an dalam maghak api di pugan dughi tadi.

³⁶Diautu mbatak jemau Israil keluagh jak di Mesir ngan ngadauka banyak tandau nyelia di Mesir, di Laut Abang ngan di padang bungin selamau empat pulua taun.

³⁷Musa itu pulau ngiciak ngan jemau Israiltu, ‘Sughang nabi luak akuni ka dienjuakka Allah jak di bangsau kamuni.’

³⁸Musatu adau ngan jemau Israil diau betunggal di padang bungin. Diautu adau di situ ngan malaikat di Bukit Sinai ngan niniak puyang kitau. Diautu nerimau katau Allah diau nunjuakka jalan idup, mangku disampaika ngan kitau.

³⁹Empuak luak itu niniak puyang kitau nidau endak ta'at ngan diau. Ughangtu nidau nerimaunyau, endak baliak ke Mesir ajau.

⁴⁰Ngan Harun ughangtu bekatau, ‘Buatla patung batan endak kami, mangku patungtu mimpin kami. Karnau kami nidau keruan agi, tuapau diau tejadi ngan Musa diau mbata'i kami keluagh jak di Mesir.’

⁴¹Masau itu ughangtu mbuat sikuak anak sapi, mangku bekerban ngan patung itu ngan keriangan lagi ngagungka buatan diau dibuat ughangtu.

⁴²Mangku Allah ninggalka ughangtu ngan ngenangka ughangtu nyemba setu di langit luak ditulis dalam kitab nabi-nabi, ‘Ui, kapu dighi, apu batan endak Aku kamu ngerbanka benatang selamau empat pulua taun di padang bungin?

⁴³Nidau nian. Kima diwau Muluk diau kamu batak-bataktu ngan bintang diwau Ripan, patung-patung diau kamu buattu endak kamu semba. Karnau itu Aku ka ncapakka kamu jawua, sampai ke beghang Babil.’

⁴⁴Kima, bada Tuhan nyatauka diriAu ngan manusiau, adau di niniak puyang kitau di padang bungin. Kimatu dibuat karnau diperintaka Allah luak cuntau diau la Musa kinak.

⁴⁵Mangku kima itu dibatak niniak puyang kitau masuak ke nenggeri ini, masau ughangtu pegi ngan Yusua merebut nenggerini jak di kuasau bangsau diau la dilaratka Allah. Kimatu adau di situ enggut saman Daud.

⁴⁶Daud melemakka ati Allah, mangku mintak, supayau diau diajung negakka ghuma batan endak Allah.

⁴⁷Mangku Salumu negakka ghuma itu batan endak Allah.

⁴⁸Anyautu Allah diau Mahabesak nidau mendam dalam ghuma diau dibuat manusiau, luak ditulis dalam kitab nabi,

⁴⁹‘Langit bada duduak Aku, deniau alas ketingKu. Ghuma apau diau kamu tegakka batan endak Aku? Di manau bada Aku gheghadu?

⁵⁰Apu ukan Akunila diau njadika gegalaunyau diau adau? Luak itula katau Allah.’

⁵¹Ui, kapu dighi maju melawan, enggup ta'at ngan Allah. Amun ndengagh katau Allah, telingau kapu dighi tuli kematila. Kapu dighi luak niniak puyang kapu dighi, maju melawan Rua Allah.

⁵²Gegalau nabi diluatka niniak puyang kapu dighi. Lagi ughangtu mbunua jemau diau senitu la ngiciakka, mbak bansau Jemau Benaghtu ka datang. Diautu kapu dighi celakauka ngan bunua empaini.

⁵³Kapu dighi la nerimau ukum Taurat diau disampaika malaikat, anyautu kapu dighi nidau na'atinyau.”

⁵⁴Ndengagh kici'an Setipanustu, gegalau angguta pengadilan agamau mara kematila.

⁵⁵Anyautu Setipanus dikuasaui Rua Allah ncungak ke langit, mangku nginak terang Allah ngan Yesus betegak di sebela kanan Allah.

⁵⁶“Ngenian,” katau Setipanustu, “Aku nginak langit tebukak ngan Anak Manusiau betegak di sebela kanan Allah.”

⁵⁷Ughangtu nekup telingau sampai tegauk-gauk, mangku serempak nganduni diau,

⁵⁸ditaghiak keluagh kuta, disipati ngan batu. Ughangtu nyeghumaka bajuau ngan sughang budak bujang, namaunyau Saulus.

⁵⁹Setipanus dang disipati, diau bedu'a, kataunyau, “Tuhan Yesus, terimaula ruaku.”

⁶⁰Mangku diau nunduak ngan tegauk, “Tuhan, dusau ini jangan ditanggungka ngan ughangni.” Udim ngiciakka luak itu diau mati.