Read Central Malay RASUL 8 Bible Online

RASUL 8 - Central Malay bible

RASUL 8

¹Saulus pulau tetuju Setipanus dibunua. Mulai aghi itu jemau percayau di Yerusalim banyak dianiayau, mangku gegalau ughangtu lain jak di rasul teceghai-beghai ke gegalau Yudia ngan Samaria.

²Jemau diau takut ngan Allah nguburka Setipanus ngan nangis berandaian nangisi diau.

³Mangku Saulus maju beusaha endak ngacauka jemau percayau. Diau masu'i bilang ghuma, tinau lanang diau percayau ditaghi'au keluagh endak dijilka.

⁴Jemau diau teceghai-beghai pegi ngiciakka ceritau iluak jak di Allah di manau-manau.

⁵Pilipus pegi ke kuta Samaria ngiciakka ceritau Rajau Penyelamat ngan jemau di situ.

⁶Ughang banyak di situ ndengagh kici'an Pilipus ngan nginak tandau-tandau diau dibuatau, mangku ughangtu nerimau setu diau dikiciakka Pilipustu,

⁷karnau jak di banyak jemau diau diarung iblis rua ja'at ngeluagh ngan tepekiak-pekiak ngan jemau lumpua ngan jemau kincut pulau banyak diau dighadukanyau.

⁸Mangku jemau Samaria riang nianan.

⁹Di kuta itu adau sughang lanang, namaunyau Simun. Jak di senitu diau njadi dukun besak. Jemau Samaria kemangan nginak kerjaunyau ngan laga'au luak jemau nian.

¹⁰Mangku gegalau jemau di kuta itu, besak-keciak, nuruti diau ngan bekatau, “Jemauni adau kuasau Allah diau dikiciakka ‘Kuasau Besak’ itu.”

¹¹Ughangtu la lamau kepagauan nginak kerjaunyau ngan nurutinyau.

¹²Mbak kini ughangtu percayau ngan Pilipus diau ngiciakka ceritau Allah njadi rajau ngan ceritau Yesus Keristus, Rajau Penyelamat, mangku ughangtu, tinau lanang mintak dibaptis.

¹³Simuntu pulau percayau. Diau dibaptis mangku maju seghundak ngan Pilipus. Diau kepagauan nginak tandau nyelia diau dibuat Pilipustu.

¹⁴Rasul-rasul di Yerusalim ndengagh, mbak bansau jemau Samaria nerimau katau Allah, mangku diajungau Pitrus ngan Yuhanis ke situ.

¹⁵La sampai di situ, ughang duautu bedu'a du'aka jemau Samariatu, mangku bulia Rua Allah,

¹⁶karnau Rua Allah lum nguasaui sughang kia jak di ughangtu. Ughangtu empai dibaptis dalam namau Tuhan Yesus ajau.

¹⁷Mangku ditepiakkanyau tanganau di pucuak palak jemau Samariatu, mangku ughangtu nerimau Rua Allah.

¹⁸Simun pulau nginak, mbak bansau jemau nerimau Rua Allah, karnau Pitrus ngan Yuhanis nepiakka tanganau di ughangtu, mangku diau endak ngenjuakka tanci ngan ughang duautu,

¹⁹sampai bekiciak, “Enju'ila aku kuasau itu pulau, mangku amun aku nepiakka tanganku di jemau, diau nerimau Rua Allah.”

²⁰Katau Pitrus, “Benasaula dighi ngan tanci dighi. Dighi sangkau, pengenjuak Allah pacak dibeli ngan tanci?

²¹Dighi nidau behak endak ngikut kerjau kami, karnau ati dighi nidau lughus di adapan Allah.

²²Karnau itu, ubaila perembak dighi diau ja'attu, mintak ngan Tuhan, supayau Diau ngabiska rupu'an diau ja'attu.

²³Aku keruan, dighi sengit nian ngan ati dighi ja'at.”

²⁴Simun nimbal, “Tulung du'aka aku mintak ngan Tuhan, mangku setu diau kaba kiciakkatu jangan tejadi ngan aku.”

²⁵La udim Pitrus ngan Yuhanis ngiciakka setu diau ughang duautu keruan ceritau Tuhan Yesus ngan nyampaika katau Tuhan, ughang duautu baliak ke Yerusalim. Di jalan ughangtu ngiciakka ceritau iluak itu di dusun-dusun Samaria.

²⁶La udim itu sughang malaikat Tuhan ngiciak ngan Pilipus, kataunyau, “Pegila ke selatan, nurut jalan tughun jak di Yerusalim ke Gasa.” Jalantu suni.

²⁷Mangku Pilipus pegi. Adau sughang pegawai istana, pangkatau tinggi. Diautu kepalak retau bendau Kandaki, ratu nenggeri Itiupia. Tadi diau pegi ke Yerusalim endak sembayang di situ.

²⁸Mbak kini diau dang baliak ke nenggeriau, duduak dalam pelangkinau sampai mbacau kitab nabi Yesaya.

²⁹Rua Allah bekatau ngan Pilipus, “Pegila, masighi pelangkin itu.”

³⁰Pilipus pegi masighi pelangkintu, mangku ndengagh jemau itu mbacau kitab nabi Yesaya. Pilipus betanyau, “Apu dighi ngerti diau dighi bacautu?”

³¹Jemautu nimbal, “Luak manau aku terti, amun nidau bediau jemau diau meretikanyau ngan aku?” Mangku diau ngajak Pilipus nayiak pelangkin duduak guak diau.

³²Diau dibacaunyautu muniau luak ini, “Luak sikuak bebiri Diau ditaghiak endak disembelia. Luak anak bebiri Diau nidau ngembiak, amun buluau digunting, luak itula Diau nidau ngiciakka sepata katau kia.

³³Diau digelakka ngan dibuati nidau adil. NyawauNyau diambiak jak di deniau, mangku sughang kia nidau bediau diau pacak ngiciakka pengadauNyau.”

³⁴Pegawai jak di Itiupiatu bekatau ngan Pilipus, “Cubau kiciakka ngan aku, sapau diau dikiciakka nabitu. Apu ngiciakka diriau, apu ngiciakka jemau lain?”

³⁵Mangku Pilipus ngiciak. Mulai ngan katau nabi tadi diau ngiciakka ceritau Yesus, ceritau iluaktu ngan jemau tadi.

³⁶Di tenga jalan ughangtu sampai ke bada diau adau ayiak. Pegawai itu bekatau, “Kina'ila, itu adau ayiak. Tuapau agi alangan aku dibaptiska?”

³⁷Katau Pilipus, “Amun dighi percayau nian, bulia dibaptis.” “Aku percayau Yesus Keristustu Anak Allah.” Katau pegawai itu.

³⁸Mangku diau ngajung pelangkinautu mendam. Pilipus ngan pegawaitu tughun ke ayiak, mangku pegawaitu dibaptis.

³⁹Ughang duautu la keluagh jak di ayiak, Pilipus diambiak Rua Allah. Mangku pegawai jak di Itiupiatu nidau nginak diau agi. Diautu melajuka pejalanannyau ngan riang.

⁴⁰Tenyatau Pilipus la adau di Asdud. Diau lalu di daira itu ngan ngiciakka ceritau iluak di gegalau kuta ngan dusun enggut ke Kaisaria.