Read Central Malay RASUL 9 Bible Online

RASUL 9 - Central Malay bible

RASUL 9

¹Masau itu Saulus maju ngancam endak mbunua anak-bua Tuhan Yesus. Diau pegi ngadap Imam Besak,

²mintak surat kuasau endak dibatak ke kepalak ghuma sembayang jemau Yahudi di Damsik, supayau amun diau betemu di situ jemau diau percayau ngan Tuhan Yesus, pacak diau tangkap ughangtu, tinau lanang, mangku dibata'inyau ke Yerusalim.

³Ngancamka Damsik, Saulus la pasigh ngan kuta itu, adau sinagh jak di langit di ngepungannyau.

⁴Diau rubua ke tana, mangku ndengagh suarau diau bekatau ngan diau, “Ui, Saulus, tuapau sebapau kaba nganiayau Aku?”

⁵Saulus betanyau, “Sapau Dighi, Tuhan?” Suarau itu nimbal, “Akunila Yesus diau kaba aniayau.

⁶Mbak kini betegakla mangku pegi masuak kuta itu. Di situ ka dikiciakka ngan kaba tuapau diau mesti kaba kerjauka.”

⁷Kantin-kantin diau bejalan serempak ngan Saulustu kemangan, karnau ndengagh suarau tadi, anyautu nidau nginak sughang kia.

⁸Saulus betegak ngan mbukak mataunyau, anyautu mataunyau nidau pacak nginak tuapau-apau, mangku diau dipapa masuak ke Damsik.

⁹Tigau aghi diau nidau pacak nginak. Selamau itu diau nidau makan nidau minum dikit kiala.

¹⁰Di Damsik adau sughang anak-bua Tuhan Yesus, namaunyau Ananias. Tuhan bekatau ngan diau dalam pengina'an, “Ananias!” Timbalau, “Ngapau, Tuhan?”

¹¹Katau Tuhan, “Mela, pegi ke ghuma Yudas di Jalan Lughus. Tanyauka di situ jemau benamau Saulus diau asalau jak di Tarsus. Diautu dang bedu'a.

¹²Dalam pengina'annyau diau nginak sughang lanang benamau Ananias njenguak diau, nepiakka tangan ke pucuak pala'au, supayau diau pacak nginak agi.”

¹³Ananias nimbal, “Tuhan, aku la ndengagh banyak jemau ngiciakka jemau itu. Banyak kematila perembak diau ja'at dikerjaukanyau ngan jemau diau percayau di Yerusalim.

¹⁴Mbak kini diau la datang ke sini mbatak surat kuasau jak di imam-imam bepangkat tinggi endak nangkap gegalau jemau diau percayau ngan Dighi.”

¹⁵Katau Tuhan, “Pegila ajau, karnau Aku la milia diau bekerjau batan endak Aku, ngiciakka Aku ngan bangsau-bangsau ngan rajaunyau ngan jemau Israil pulau.

¹⁶Akunila ka nunjuakka ngan diau banyak sengsarau diau mesti dighasaukanyau karnau Aku.”

¹⁷Mangku Ananias pegi ke situ masuak ghumatu, ditepiakkanyau tanganau di pucuak palak Saulus. Katau Ananias, “Tuhan Yesus diau kaba kinak di tenga jalan masau kaba endak ke sini, Diau ngajung aku njenguak kaba, supayau kaba pacak nginak agi ngan dikuasaui Rua Allah.”

¹⁸Masau itu pulau setu diau luak sisiak ikan di matau Saulus pacul, mangku pacak nginak agi. Udim itu diau dibaptis.

¹⁹Diau makan mangku diau kuat agi. Saulus mendam bebeghapau aghi di Damsik ngan anak-bua Yesus.

²⁰Diau pegi ke ghuma sembayang ngan ngiciakka, bansau Yesus itula Anak Allah.

²¹Gegalau jemau kemangan ndengagh kici'annyautu ngan bekatau, “Diau inila asauku di Yerusalim mbunua gegalau jemau diau percayau ngan Yesus itu. Mangku diau datang ke sini endak nangkap ughangtu, dibata'inyau ngadap imam-imam bepangkat tinggi.”

²²Anyautu Saulus tamba bekuasau mbuktika, Yesus itula Almasih, Rajau Penyelamat, mangku jemau Yahudi diau mendam di Damsiktu nidau pacak agi nimbal.

²³Lum lamau udim itu, jemau Yahudi sepakat endak mbunua Saulus.

²⁴Rencanau diau ja'attu keruan ngan diau. Siang-malam ughangtu nunggu di mukau lawang kuta endak mbunua diau.

²⁵Empuak luak itu, adau semalam anak-buahau ngambiak Saulus, mangku ditughunkanyau jak di dinding kuta pakai kinjagh.

²⁶Saulus pergi ke Yerusalim. Di situ diau ncubau nyeghundak ngan anak-bua Yesus. Anyautu ughangtu penakut galau ngan diau, karnau lum percayau nian, bansau Saulus la njadi anak-bua Yesus pulau.

²⁷Mangku Barnabas nulung diau, dibata'inyau njenguak rasul-rasul, dikiciakkanyau ngan ughangtu ceritau Saulus nginak Tuhan di tenga jalan ngan Tuhan ngiciak ngan diau. Dikiciakka pulau ceritau Saulus diau beghani nian ngajagh di Damsik pakai namau Yesus.

²⁸Mangku Saulus mendam ngan ughangtu di Yerusalim ngajaghka namau Tuhan ngan beghani.

²⁹Diau pulau ngiciak ngan bebala ngan jemau Yahudi diau bebasau Yunani. Anyautu ughangtu maju ncubau endak mbunua diau.

³⁰Jemau percayau la keruan ceritau itu, mangku Saulus diantat ke Kaisaria. Jak di situ diau diajung pegi ke Tarsus.

³¹Mangku jemau percayau di gegalau Yudia, Galilia ngan Samaria njadi tenang. Rua Allah nulung ughangtu njadi kuat ngan tamba banyak, karnau ughangtu idup takut ngan Tuhan.

³²Masau itu Pitrus pegi ke manau-manau nandangi jemau percayau, mangku diau pulau nandangi jemau diau percayau di Lida.

³³Di situ diau betemu jemau lanang benamau Inias. Diautu lumpua, nidau mbangun-bangun jak di bada tiduak la delapan taun.

³⁴Katau Pitrus ngan diau, “Inias, Yesus Keristus meghaduka dighi. Betegakla, gulungkala bada tiduak dighi!” Masau itu pulau Inias betegak.

³⁵Gegalau jemau di Lida ngan Sarun nginak diau, mangku ughangtu percayau ngan Tuhan.

³⁶Di Yupi adau sughang tinau jemau percayau, benamau Tabita. Basau Yunani itu Durkas, retiau ghusau. Diau maju ngerjauka setu diau iluak, nulungi jemau serik.

³⁷Masau itu diau buidapan mangku mati. La udim mayattu dimandika, diau ditepiakka di biliak pucuak.

³⁸Yupi nidau jawua jak di Lida. Masau ndengagh Pitrus adau di Lida, jemau percayau di Yupi ngajung duau ughang pegi njenguak Pitrus ngan ngiciakka, “Cepatla datang ke sini.”

³⁹Pitrus bedandan mangku pegi serempak ngan ughang duautu. La sampai di situ, diau dibata'i ke biliak bada mayat tadi. Gegalau randau di situ ngelilingi diau sampai nangis, diancakka ngan diau baju-baju diau dijayit Durkas tadi, masau gi idup.

⁴⁰Pitrus ngajung gegalau ughangtu keluagh, mangku diau nunduak ngan bedu'a. Udim itu diau ngadapi mayattu ngan bekatau, “Tabita, bangunla!” Mangku Tabita mbukak mataunyau. Satu nginak Pitrus, diau duduak.

⁴¹Pitrus ngecakka tanganau ngan nulung diau betegak. Udim itu dipantaunyau jemau percayau di situ ngan randau tadi, diserakanyau tinau diau la ngulang idup tadi ngan ughangtu.

⁴²Ceritau itu dikiciakka di gegalau Yupi, mangku banyak jemau percayau ngan Yesus.

⁴³Udim itu Pitrus mendam di situ bebeghapau aghi agi di ghuma Simun diau sughang tukang bawuak.