Read Central Malay RUM 15 Bible Online

RUM 15 - Central Malay bible

RUM 15

¹Kitau diau tegua imanau mesti ngaligh ngan jemau diau nidau semegi pendapat ngan nidau tegua imanau. Jangan kitau melemakka ati kitau ajau.

²Bilang kitau mesti melemakka ati kantin kitau batan endak keilu'annyau, mangku diau tamba percayau.

³Keristus pulau nidau merupuakka diriAu ajau. Di Injil ditulis, “Gegalau gela'an diau kaba asauka la Kutanggungka.”

⁴Gegalaunyau diau la ditulis di Injil endak ngajagh kitau, supayau kitau tekun ngan tegua ngaghapka Allah, karnau ajaghan Injiltu.

⁵Aku bedu'a, supayau Allah mbuat kamu suijauan ngan menau Keristus. Allahtu mbuat jemau tekun ngan tegua.

⁶Mangku ngan suati gegalau kamu pacak muji Allah, Bapak Yesus Keristus, Tuhan kitau.

⁷Karnau itu terimaula sughang ngan diau lain, luak Keristus pulau nerimau kamu, mangku Allah dipuji.

⁸Ingatkala, bansau Keristus datang endak nulung jemau Yahudi, supayau ngerti, bansau Allah itu pacak dipercayaui ngan nepati janjiAu ngan niniak puyang kitau.

⁹Diau pulau mbuat jemau bangsau lain meregaui Allah, karnau keilu'an atiAu ngan ughangtu. Di Injil ditulis, “Karnau itu aku ka muji Dighi di antarau jemau bangsau lain. Aku ka benyanyi muji namau Dighi.”

¹⁰Mangku pulau, “Ui, bangsau-bangsau, beriangla kamu ngan umat Allah.”

¹¹Lagi, “Pujila Allah, ui gegalau bangsau. Gegalau jemau mesti muji Diau.”

¹²Mangku nabi Yesaya la ngiciak, “Jak di pengadau Isai ka adau sughang diau merinta bangsau-bangsau. Ughangtu ka ngaghapka Diau.”

¹³Allah itu bada kamu buaghap. Aku bedu'a, supayau Allah mbuat ati kamu riang ngan meghasau damai karnau kamu percayau, mangku ngan kuasau Rua Allah kamu ka tamba ngaghapka Diau.

¹⁴Kantin-kantinku, aku keruan, bansau kamutu iluak. Kamutu pulau la keruan gegalaunyau, mangku pacak sangi ajaghi.

¹⁵Mangku dalam surat ini aku beghani nulis bebeghapau petua-peturun ngan kamu, karnau titu la ditugaska Allah ngan aku.

¹⁶Diautu ngajung aku bekerjau batan endak Yesus Keristus. Diau njadika aku imam batan endak ngiciakka ceritau iluak jak di Allah ngan jemau bangsau lain, supayau ughangtu nyeraka diriau ngan Allah endak idup melemakka ati Allah ngan diberesiaka Rua Allah.

¹⁷Karnau aku seghundak ngan Keristus, aku bulia meghasau bangga, karnau bekerjau batan endak Allah.

¹⁸Aku beghani ngiciak luak itu ngiciakka cuman setu diau dikerjauka Keristus karnau aku, supayau mbuat jemau bangsau lain ta'at ngan Allah. Aku ngerjauka titu ngan kici'anku ngan perembakku,

¹⁹ngan kuasau ngan tandau nyelia. Gegalaunyautu karnau kuasau Rua Allah. Luak itula kerjauku di manau-manau, mulai jak di Yerusalim enggut Ilirikum aku ngiciakka gegalau ceritau iluak nceritauka Keristus.

²⁰Tujuanku jak di senitu endak ngiciakka ceritau iluak jak di Allah di guak jemau diau lum ndengaghka ceritau Keristustu, karnau aku enggup ndalak untung jak di kerjau jemau.

²¹Luak ditulis di Injil, “Jemau diau lum kekela ndengagh ceritauNyau ka keruan. Jemau diau lum nerimaunyau ka ngerti.”

²²Itula sebapau aku lum pacak berayak ngan kamu.

²³Anyautu mbak kini kerjauku di daira ini la udim. La lamau aku endak berayak ngan kamu.

²⁴Nanti amun aku ke Sepanyul, aku pacak berayak ngan kamu, mangku betunggal jerang ngan kamu. Udim itu kamu pacak nulung aku melajuka pejalananku ke Sepanyul.

²⁵Anyautu mbak kini aku endak pegi ke Yerusalim kudai, endak mbatak tanci batan endak umat Allah di situ.

²⁶Karnau jemau Keristen di Makedunia ngan Akaya la nyetujui endak nunggalka tanci batan endak jemau Keristen diau serik di Yerusalim.

²⁷Nyela, ngan riang nian ughangtu ngerjauka titu. Sepantasau ughangtu nulung kantin kitau di situ. Jak di jemau Yahudi jemau bangsau lain la nerimau keilu'an Allah, mangku ughangtu sepantasau ngenjuakka jak di retau bendaunyau ngan ughang tadi.

²⁸Amun kerjaukuni la udim, la kuseraka tanci diau la ditunggalka ughangtu, aku ka bejalan ke Sepanyul, mangku lalu di guak kamu.

²⁹Mangku aku keruan, amun aku datang berayak ngan kamu, aku ka mbatak banyak setu diau iluak jak di Keristus.

³⁰Karnau kitau semegi percayau ngan Keristus ngan kitau sangi sayangi karnau Rua Allah, mangku aku mintak nian, supayau kamu ndu'aka aku.

³¹Bedu'ala, supayau jemau di Yudia diau nidau percayau nidau ngancam aku, supayau kerjauku batan endak Yerusalim diterimau jemau Keristen di situ ngan riang.

³²Mangku amun Allah ngenda'i, aku pacak berayak ngan kamu ngan riang, mangku aku diteguaka di guak kamu.

³³Aku bedu'a, supayau Allah diau ngenjuakka damai ngan manusiau nyertaui gegalau kamu. Amin.