Read Central Malay RUM 16 Bible Online

RUM 16 - Central Malay bible

RUM 16

¹Aku endak ngiciakka kantin kitau Pibe ngan kamu. Diautu bekerjau batan endak Tuhan di guak jemau Keristen di Kengkeria.

²Terimaula diau dalam Tuhan ngan carau diau pantas batan endak jemau percayau. Tulungla diau, amun diau kurangan, karnau diau la banyak nulung jemau, temasuak aku.

³Sampaika pesanku ngan Periska ngan Akwila, kantin sekerjauku batan endak Keristus.

⁴Ughang duautu mati-matian endak ngilakka nyawauku. Aku beterimau-kasia nian ngan ughangtu. Ukan ajau aku diau beterimau-kasia ngan ughang duautu, tapitu gegalau jemau Keristen jak di bangsau lain.

⁵Sampaikala pulau pesanku ngan jemau Keristen diau betunggal di ghuma ughang duautu. Pesan pulau ngan Ipenitus diau kusayangi. Diautu jemau diau dulu sekali percayau ngan Keristus di daira Asia.

⁶Pesanku pulau ngan Maria diau la bekerjau nian batan endak kamu.

⁷Sampaikala pulau pesanku ngan Anderunikus ngan Yunias. Ughang duautu sebangsau ngan aku ngan pulau tejil serempak ngan aku. Ughang duautu la percayau antak ka aku percayau ngan tekenal jak di rasul.

⁸Pesanku ngan Ampeliatus diau kusayangi. Diau njadi kantinku karnau semegi percayau ngan Tuhan.

⁹Pesanku ngan Urbanus, kantin sekerjau kitau batan endak Keristus ngan pulau Setakis diau kusayangi.

¹⁰Pesanku ngan Apelis diau la diuji karnau Keristus. Pesan pulau ngan kapu Aristubulus.

¹¹Pesanku ngan Herudiun diau sebangsau ngan aku. Pesanku pulau ngan kapu Narkisus diau la percayau.

¹²Pesanku ngan Teripina ngan Teripusa diau mbanting tulang bekerjau batan endak Tuhan. Pesanku ngan Persis diau kusayangi diau pulau mbanting tulang nian bekerjau batan endak Tuhan.

¹³Pesanku ngan Rupus, jemau diau dipilia Tuhan, ngan endu'au diau kuanggap luak makku.

¹⁴Sampaikala pulau pesanku ngan Asinkeritus, Peligun, Hermis, Patrubas, Hermas ngan gegalau kantin percayau diau seghundak ngan ughangtu.

¹⁵Pesanku pulau ngan Pilulugus ngan Yulia, ngan Narius ngan kelawaiau ngan Ulimpas ngan gegalau jemau percayau diau seghundak ngan ughangtu.

¹⁶Sangi pesankala kamu ngan carau diau iluak. Gegalau jemau Keristen bepesan ngan kamu.

¹⁷Kantin-kantinku, aku mintak nian, supayau kamu sepepadau ngan jemau diau melawan ajaghan diau la kamu terimau, diau mbuat kacau ngan nyesatka. Jawuhi jemau luak itu,

¹⁸karnau jemau diau ngerjauka titu ukan bekerjau batan endak Keristus, Tuhan kitau. Jemau itu bekerjau batan endak muaska serilaunyau. Ngan makai katau diau iluak ngan lemak didengagh ughangtu nipuka jemau diau iluak.

¹⁹Gegalau jemau la keruan kamu ta'at nian. Karnau itu aku riang ngan ceritau kamu. Aku endak, supayau kamu bepengertian ngan setu diau iluak, tapitu bigal ngan setu diau ja'at.

²⁰Allah ngenjuakka damai ngan manusiau. Diau ka cepat ngancurka kuasau iblis ngan nunduakka diau ngan kamu. Yesus, Tuhan kitau, maju iluak ngan kamu.

²¹Timutius, kantin sekerjauku, bepesan ngan kamu. Luak itu pulau Lukius, Yasun ngan Susipatir, jemau sebangsau ngan aku.

²²Diau nulis surat ini aku, Tertius. Aku bepesan ngan kamu diau semegi percayau ngan Tuhan.

²³Gayus bepesan ngan kamu. Aku numpang di ghumahau ngan jemau Keristen pulau betunggal endak sembayang di situ. Erastus, kepalak menyapi tanci kuta, bepesan ngan kamu. Luak itu pulau kantin kitau Kuartus.

²⁴Aku bedu'a, supayau Tuhan kitau, Yesus Keristus, iluak nian ngan gegalau kitau. Amin.

²⁵Tepujila Allah! Diau bekuasau neguaka kamu nurut ceritau iluak jak di Allah diau kuceritauka ngiciakka Yesus Keristus. Aku ngiciakka titu nurut setu diau dinyatauka Allah ceritau rencanau Allah diau buabad-abad nidau dikeruani jemau.

²⁶Anyautu mbak kini rencanau itu la dinyatauka karnau perinta Allah, mangku dikiciakka ngan gegalau bangsau jak di tulisan nabi-nabi, supayau ughangtu percayau ngan ta'at ngan Allah.

²⁷Cuman Diau sughang itula Allah diau bepengertian nian. Aku bedu'a supayau Diau maju diagungka selelamaunyau karnau Yesus Keristus! Nyela nian. Amin.