Read Central Malay RUM 2 Bible Online

RUM 2 - Central Malay bible

RUM 2

¹Ui kantin-kantinku, apu kamu endak nyalaka jemau? Amun luak itu, kamu nidau bediau tapakan endak mbenaghka diri kamu. Amun kamu nyalaka jemau, awuak kamu pulau ngerjauka kerjau diau ughangtu kerjauka, kamu ngukum diri kamu itula.

²Mangku kitau keruan galau, Allah nidau sala, amun Diau ngukum jemau diau ngerjauka kerjau itu tadi.

³Anyautu kamutu pulau ngerjauka setu diau kamu buruakka ngan jemau. Apu kamu sangkau kamu pacak luput jak di ukuman Allah?

⁴Apu kamu nganggap mura karnau Allah iluak, ngaligh ngan lambat ngukum? Cengki kamu keruan, bansau Allah iluak karnau Diau endak, supayau kamu ngubai jak di dusau-dusau kamu.

⁵Anyautu kamu maju melawan, enggup beghuba. Karnau itu kamu itula diau mbuat ukuman kamu tamba beghat masau aghi kiamat nanti, amun Allah nyatauka maraHau ngan ukumanNyau diau adil,

⁶karnau Allah ka ngukum bilang jemau nurut kerjaunyau.

⁷Jemau diau maju ngerjauka diau iluak ngan ndalak setu diau dipuji ngan diregaui ngan ta'an selelamaunyau ka dienjuakkaNyau idup selelamaunyau.

⁸Anyautu jemau diau ndalak idup batan endak diau sughang, nidau endak ta'at ngan Allah ngan maju ngerjauka diau ja'at, jemautu ka didawaika Allah nian.

⁹Bilang jemau diau galak ngerjauka diau ja'at ka sengsarau ngan nanggung. Jemau Yahudi kudai mangku jemau Yunani mangku pulau jemau bangsau lain.

¹⁰Anyautu gegalau jemau diau galak ngerjauka diau iluak ka dipuji ngan diregaui ngan dienju'i damai ketenteraman jak di Allah, jemau Yahudi kudai mangku pulau jemau bangsau lain.

¹¹Karnau Allah nidau milia rupau jemau.

¹²Jemau diau bedusau ngan nidau keruan ukum Taurat ka benasau, empuak nidau keruan ukum itu. Jemau Yahudi bedusau, empuak keruan ukum Taurat, mangku ughangtu diukum nurut ukumtu.

¹³Jemau nidau dibenaghka, amun keruan ukum Taurat. Jemau dibenaghka, amun ngerjauka setu diau diajung ukum Taurattu.

¹⁴Jemau bangsau lain nidau keruan ukum Taurat, mangku amun ughangtu ngerjaukanyau karnau kenda'an atiau, ughangtu nyatauka, bansau atiau keruan setu diau mesti dikerjauka, empuak nidau keruan ukum Taurat.

¹⁵Perembak ughangtu nunjuakka, bansau setu diau diajung ukum Taurattu la adau dalam atiau. Ati keciak ughangtu pulau mbuktikanyau, karnau kekadangan ughangtu disalaka rupu'annyau, kekadangan dibenaghka.

¹⁶Nurut ceritau iluak diau kukiciakkatu, gegalaunyau ka tejadi nanti masau aghi itu, amun Allah ngajung Yesus Keristus ngukum gegalaunyau diau tebuni dalam ati jemau.

¹⁷Mbak kini luak manau ngan kamu? Kamu ngakuak kamu jemau Yahudi. Kamu bepaut ngan ukum Taurat ngan bangga karnau njadi umat Allah.

¹⁸Kamu diajagh ukum itu, mangku kamu keruan kendak Allah, mangku pacak mbidaka setu diau iluak ngan diau ja'at.

¹⁹Kamu percayau, kamu mapa jemau butau ngan nunjuakka terang batan endak jemau diau mendam di keleman.

²⁰Kamu njadi guru jemau bigal ngan pengajagh budak keciak, karnau kamu percayau, bansau dalam ukum Taurat kamu keruan gegalaunyau diau benagh.

²¹Kamu ngajagh jemau. Ngapau kamu nidau ngajagh diri kamu sendighi? Kamu ngajagh jemau mangku jangan maling, apu kamutu nidau maling?

²²Kamu ngajagh jemau mangku jangan menaugawia, apu kamutu nidau menaugawia? Kamu luat ngan jemau nyemba diwau, apu kamutu nidau ngambiak dandanan jak di ghuma diwau.

²³Kamu bangga karnau keruan ukum Taurat, apu kamu nidau nggelakka Allah ngan carau nidau nuruti ukumtu?

²⁴Di Injil ditulis luak ini, “Karnau kamu mangku namau Allah digelakka jemau bangsau lain.”

²⁵Nyela, sunat adau gunaunyau, amun kamu ta'at ngan ukum Taurat. Anyautu amun kamu nidau ta'at ngan ukumtu, sunattu nidau bediau gatiau.

²⁶Amun jemau diau nidau disunat ta'at ngan perinta ukum Taurat, apu diau ukan dianggap semegi ngan jemau diau la disunattu?

²⁷Mangku jemau diau nidau disunat anyautu ngerjauka ukum Taurat ka nyalaka kamu diau la keruan ukum Taurat ngan disunat, anyautu melanggar ukumtu.

²⁸Sapau jemau Yahudi? Ukan jemau diau adau bapa'au jemau Yahudi ngan disunat di luagh.

²⁹Anyautu jemau diau ngenian Yahudi, jemau diau jiwahau jemau Yahudi. Sunat diau ngenian, sunat di ati diau dikerjauka Rua Allah ukan diau dikerjauka nurut setu diau ditulis di kitab. Mangku jemau luak itu dipuji Allah, ukan dipuji manusiau.