Read Central Malay RUM 3 Bible Online

RUM 3 - Central Malay bible

RUM 3

¹Amun luak itu, tuapau untungau jemau Yahudi? Tuapau gunaunyau besunat?

²Banyak nian! Terutamau jemau Yahudi nerimau katau Allah.

³Mangku luak manau, amun adau jemau Yahudi diau nidau setia? Apu karnau itu Allah pulau nidau setia?

⁴Nidau ka adau! Cetau Allah maju benagh, empuak bilang jemau mbu'ung. Di Injil ditulis, “Cengki Dighi maju nyatau benagh. Dighi menang, amun disalaka.”

⁵Amun keilu'an Allah tamba nyatau karnau dusau kitau, tuapau katau kitau? Apu Allah nidau adil, amun kitau diukum? Titu rupu'an jemau.

⁶Nidau nian! Amun Allah nidau adil, luak manau Diau endak ngadili deniauni?

⁷Amun karnau perembak diau nidau benagh keilu'an Allah tamba nyatau ngan tamba dipuji, ngapau jemau bedusautu maju diukum?

⁸Ngapau kitau nidau bulia ngiciakka, “Iluakla kitau bebuat ja'at, supayau keilu'an Allah tamba nyatau.” Adau pulau jemau nggelakka kami, bansau kami ngiciak luak itu. Jemau luak itu pantas diukum.

⁹Mbak kini luak manau? Tuapau lebihau kitau jemau Yahudi? Nidau bediau lebihau. La kukiciakka, empuak jemau Yahudi empuak jemau bangsau lain, gegalaunyau dikuasaui dusau.

¹⁰Di Injil ditulis, “Nidau bediau diau benagh, sughang kiala nidau.

¹¹Nidau sughang kiala diau ngerti. Nidau sughang kiala pulau diau nurut kendak Allah.

¹²Gegalau jemau nidau nyanauka Allah, la sesat galau. Nidau bediau diau ngerjauka setu diau benagh, sughang kiala nidau.

¹³Kelungkungan ughangtu tengangau luak kuburan tebukak. Mulut ughangtu nipuka jemau ngan kici'an ughangtu bebayau luak bisau ulagh.

¹⁴Ughangtu maju meluatka ngan ndawaika jemau.

¹⁵Ughangtu cepat, amun endak nyaraui ngan mbunua jemau.

¹⁶Ke manau kila ughangtu pegi, di situ mbuat kacau ngan sengsarau.

¹⁷Ughangtu nidau keruan jalan damai.

¹⁸Ughangtu nidau meregaui Allah.”

¹⁹Kitau keruan, gegalaunyau diau ditulis di ukum Taurat ditulis batan endak jemau diau semestiau nuruti ukum Taurattu. Mangku nidau bediau tapakan agi ngan gegalau jemau diukum Allah.

²⁰Karnau nidau sughang kiala pacak dibenaghka di adapan Allah ngan jalan nuruti ukum Taurat. Ukum Taurattu cuman nyatauka manusiau jemau bedusau.

²¹Mbak kini Allah la nunjuakka jalan, mangku manusiau dibenaghka Allah. Caraunyautu nidau bediau sangkut-pautau ngan ukum Taurat. La dikiciakka dalam ukum Taurat ngan kitab nabi-nabi,

²²bansau jemau pacak dibenaghka Allah, amun percayau ngan Yesus Keristus. Itula carau Allah mbenaghka gegalau jemau diau percayau ngan Keristus, karnau Allah nidau mbidaka jemau,

²³karnau gegalau jemau la bedusau ngan nidau bediau diau pacak meriangka ati Allah.

²⁴Karnau keilu'an Allah ughangtu dibenaghka Allah. Nidau bediau bayighan, dienjuakka ajau, karnau Yesus Keristus la nebusau.

²⁵Yesus Keristus itula la ditetapka Allah batan endak mati, mangku manusiau pacak seilu'an ngan Allah, amun percayau. Allah ngerjauka titu endak nyatauka, bansau Diautu adil. Senitu Allah ngaligh ngan jemau bedusau, mangku lum diukum.

²⁶Mbak kini Diau nidau agi ngenangka perembak jemau, anyautu Diau endak seilu'an ngan jemau. Ngan carau itu Diau nyatauka, bansau Diautu benagh ngan pulau mbenaghka jemau diau percayau ngan Yesus.

²⁷Amun luak itu, nidau bediau sebapau kitau bangga? Ngapau? Apu pacak bangga karnau ta'at ngan ukum? Nidau pacak, karnau percayau.

²⁸Kami keruan, bansau jemau dibenaghka karnau percayau ngan Keristus ukan karnau ta'at ngan ukum Taurat.

²⁹Apu Allahtu Allah jemau Yahudi ajau? Apu ukan Allah jemau bangsau lain pulau? Nyela, Diau Allah jemau bangsau lain pulau.

³⁰Allah gi sughang. Diautu mbenaghka jemau Yahudi karnau percayau, mangku jemau bangsau lain pulau karnau percayau.

³¹Apu retiautu, kitau ncapakka ukum Taurat karnau percayau? Nidau nian! Karnau kitau percayau, kitau maju mbenaghka ukum Taurat.