Read Central Malay RUM 7 Bible Online

RUM 7 - Central Malay bible

RUM 7

¹Kantin-kantinku, cengki gegalau kamu la keruan peraturan, mangku kamu keruan, bansau peraturan belaku ngan jemau, masau jemau gi idup.

²Misalau jemau tinau diau la belaki tekungkung ngan lakiau nurut peraturan, masau lakiautu gi idup. Amun lakiau mati, tinautu bibas jak di peraturan itu.

³Amun tinautu idup ngan lanang lain, masau lakiautu gi idup, tinautu menaugawia. Anyautu amun lakiau la mati, tinautu la bibas jak di peraturan tadi. Mangku amun diau nika agi ngan lanang diau lain, diau nidau menaugawia.

⁴Luak itu pulau ngan kamu. Kamu la mati tuadap ukum Taurat, karnau kamu la seghundak ngan badan Keristus. Mangku kamu la njadi hak Keristus diau la diidupka agi jak di mati, supayau kitau begunau batan endak Allah.

⁵Senitu kitau idup nurut carau manusiau. Masau itu serilau bedusau nguasaui kitau. Serilautu nimbul karnau ukum Taurat, mangku kitau ngerjauka setu diau nyebapka kitau mati.

⁶Mbak kini kitau la dilepaska jak di ukum Taurat. Mbak kini kitau la mati tuadap ukum diau senitu nguasaui kitau. Mangku kitau nidau agi nuruti carau lamau, ukum diau ditulis. Mbak kini kitau idup nurut carau diau empai diau ditunjuakka Rua Allah.

⁷Amun luak itu, tuapau diau pacak kitau kiciakka? Apu ukum Taurat ja'at? Nidau ka adau! Aku keruan dusau karnau ukum Taurat. Aku nidau keruan, tuapau retiau ngibauka barang jemau, amun ukan ukum ngiciakka, “Jangan ngibauka barang jemau.”

⁸Anyautu karnau perintatu dusau bulia jalan nimbulka di atiku serbau serilau diau ngibauka. Karnau amun ukum Taurat nidau bediau, nidau keruan dusau.

⁹Senitu aku idup nidau keruan ukum Taurat. Masau aku keruan ukumtu, dusau mulai nimbul,

¹⁰mangku aku mati. Mangku ukum diau sebenaghau njanjika idup tenyatau mbuat aku mati.

¹¹Dusau bulia jalan nipuka ngan mbunua aku karnau ukum itu.

¹²Ukum Taurattu beresia ngan perintahau pulau beresia, benagh ngan iluak.

¹³Apu itu bereti, bansau setu diau iluak mbuat aku mati? Nidau ka adau! Dusau itu makai setu diau iluak, mangku mbuat aku mati, mangku jemau keruan nian tuapau itu dusau. Ukumtu nyatauka alaka ja'atau dusau.

¹⁴Kitau keruan, ukum Taurat asalau jak di Rua Allah. Anyautu aku manusiau biasau. Aku la tejual njadi budak dusau.

¹⁵Aku nidau terti perembakku, karnau setu diau endak kukerjaukatu nidau kukerjauka, tapitu setu diau kuluatka itula diau kukerjauka.

¹⁶Amun aku ngerjauka setu diau nidau kukenda'i, aku nyetujui, bansau ukum Taurattu benagh.

¹⁷Amun luak itu, ukan agi aku diau ngerjauka titu, tapitu dusau diau mendam di atiku.

¹⁸Aku keruan, nidau bediau setu diau iluak dalam atiku, karnau aku manusiau ajau. Nyela, aku endak ngerjauka setu diau iluak, anyautu nidau pacak ngerjaukanyau.

¹⁹Aku nidau ngerjauka setu diau iluak diau endak kukerjauka. Aku ngerjauka setu diau ja'at diau enggup kukerjauka.

²⁰Amun aku ngerjauka setu diau nidau endak kukerjauka, mangku ukan aku diau ngerjaukanyau, tapitu dusau diau mendam di atiku.

²¹Mangku adau carau ini di aku: amun aku, endak ngerjauka setu diau iluak, anyautu diau adau di aku cuman diau ja'at.

²²Atiku riang nian ngan perinta Allah.

²³Anyautu aku meghasau di aku adau pulau carau lain diau belawanan ngan carau diau disetujui rupu'anku. Carau itu diau nguasaui diriku, mangku aku tunduak ngan dusau diau mendam di atiku.

²⁴Celakau aku! Sapau diau ka ngilakka aku jak di badan ini diau mbuat aku mati?

²⁵Terimau-kasia ngan Allah. Diau endak nyelamatka aku karnau Yesus Keristus, Tuhan kitau. Luak inila aku: Ngan rupu'anku aku na'ati ukum Allah, anyautu ngan perembakku aku na'ati dusau.