Read Central Malay 1 KURINTUS 12 Bible Online

1 KURINTUS 12 - Central Malay bible

1 KURINTUS 12

¹Kantin-kantinku, mbak kini ceritau pengenjuak Rua. Ceritau itu kendakku, supayau kamu keruani diau benagh.

²Kamu keruan, timpau kamu lum percayau ngan Tuhan, kamu disesatka nyemba diwau diau bisu ngan mecam-mecam carau.

³Mangku kamu mesti keruan, bansau nidau bediau jemau diau dipimpin Rua Allah diau bekatau, “Meghakaula Yesus!” Luak itula pulau nidau bediau jemau diau ngaku'i, “Yesusla Tuhan!”, amun ukan dipimpin Rua Allah.

⁴Adau bemecam-mecam pengenjuak, anyautu gegalaunyau dienjuakka Rua semegi.

⁵Adau bemecam-mecam kerjau batan endak Tuhan, anyautu Tuhan gi sughang.

⁶Mangku adau bemecam-mecam carau ngerjauka kerjautu. Anyautu diau ngenjuakka kuasau ngan bilang jemau batan endak gegalaunyautu, itu Allah diau gi sughang itula.

⁷Rua Allah bekerjau di bilang jemau batan endak neguaka gegalau kitau.

⁸Ngan diau sughang Ruatu ngenjuakka kuasau, mangku pacak ngiciak ngan pengertian. Ngan jemau lain Rua diau semegitu ngenjuakka kuasau, mangku diau pacak ngiciakka katau Allah.

⁹Ngan diau sughang agi Rua diau semegitu ngenjuakka kuasau, mangku pacak percayau nian. Ngan jemau lain Rua itu ngenjuakka kuasau, mangku pacak meghaduka jemau buidapan.

¹⁰Diau sughang dienjuakka kuasau ngadauka tandau nyelia, diau lain dienjuakka kuasau ngiciak luak sughang nabi. Adau diau dienjuakka kuasau mbidaka, manau diau Rua Allah manau diau ukan. Adau diau dienjuakka kuasau bekiciak basau rua. Adau pulau diau dienjuakka kuasau ngiciakka reti basau ruatu.

¹¹Gegalaunyautu dikerjauka Rua semegi. Bilang jemau dienju'i kuasau sesughangan nurut kendak Ruatu.

¹²Keristus umpamau badan manusiau. Badanautu sutiak, anyautu dandanannyau banyak. Gegalau dandanannyautu empuak banyak cuman sutiak badan.

¹³Luak itu pulau gegalau kitau, empuak jemau Yahudi empuak jemau Yunani, empuak ambau empuak tuan, gegalau kitau la dibaptis ngan Rua diau semegi, supayau kitau njadi sutiak badan Keristus, mangku gegalau kitau dienjuakka Rua diau semegitu.

¹⁴Nyela, badantu ukan cuman badan ajau. Anyautu adau banyak dandanannyau.

¹⁵Misalau keting bekatau, “Aku ukan tangan, mangku aku ukan dandanan badan.” Apu nyela diau ukan dandanan badan?

¹⁶Misalau telingau bekatau, “Aku ukan matau, mangku aku ukan dandanan badan.” Apu nyela diau ukan dandanan badan?

¹⁷Misalau gegalau badantu cuman matau ajau, luak manau pacak ndengagh? Misalau gegalau badan telingau ajau, luak manau pacak ngembau?

¹⁸Kitau nginak, bansau Allah la netapka bada dandanan badantu. Bilang mecam ditetapka badahau nurut kendak Allah.

¹⁹Misalau gegalaunyau cuman semecam dandanan ajau, manau diau dikiciakka badan?

²⁰Nyela nian, bemecam-mecam dandanannyautu, anyautu badan gi sutiak.

²¹Mangku matau nidau pacak ngiciakka ngan tangan, “Aku nidau endak kaba.” Palak nidau pacak ngiciakka ngan keting, “Aku nidau endak kaba.”

²²Awuak dandanan badan diau dikiciakka litak nian, itula diau penting nian.

²³Dandanan diau kitau anggap kurang beregau, kitau regaui nian. Mangku dandanan diau nidau alap, tamba kitau sanauka.

²⁴Dandanan badan diau alap nidau nanti kitau sanauka nian. Allah la mbuat badan kitau ngan carau, supayau dandanan diau nidau pantas diancakka diperatika nian.

²⁵Ngan carau luak itu badantu nidau tebagi-bagi, mangku bilang dandanan sangi peratika.

²⁶Amun sutiak dandanan nanggung, gegalau dandanan diau lain nanggung pulau. Amun sutiak dandanan dipuji, gegalau dandanan diau lainau ngikut riang pulau.

²⁷Gegalau kamu umpamau badan Keristus. Bilang ughang dandanannyau.

²⁸Mangku Allah la netapka mecam-mecam jemau di guak jemau Keristen, diau dulu sekali rasul, mangku nabi, mangku guru, mangku adau pulau diau pacak mbuat tandau nyelia ngan diau pacak meghaduka jemau buidapan, mangku diau pacak nulung jemau lain ngan diau pacak mimpin, mangku pulau diau pacak ngiciak basau rua.

²⁹Apu gegalaunyau rasul, apu nabi, apu guru? Apu gegalaunyau pacak ngadauka tandau nyelia,

³⁰apu pacak meghaduka, apu ngiciak basau rua, apu meretika basau ruatu? Nidau.

³¹Beusahala kamu, supayau kamu bulia pengenjuak Rua diau penting sekali jak di gegalaunyau. Anyautu aku endak nunjuakka ngan kamu jalan diau iluak sekali.