Read Central Malay 1 KURINTUS 14 Bible Online

1 KURINTUS 14 - Central Malay bible

1 KURINTUS 14

¹Beusahala kamu nyayangi jemau. Beusahala pulau nerimau kuasau jak di Rua Allah. Diau penting supayau pacak ngiciakka katau Allah.

²Jemau diau ngiciak basau rua, ukan ngiciak ngan manusiau, tapitu ngan Allah. Nidau bediau jemau diau terti setu diau dikiciakkanyautu, karnau Rua Allah mbuat diau ngiciakka setu diau cuman dikeruani Allah.

³Anyautu jemau diau ngiciakka katau Allah ngan manusiau, jemautu nulungi ngan neguaka ngan ngenjuakka semangai.

⁴Jemau diau ngiciak basau rua cuman neguaka diriau, tapitu jemau diau ngiciakka katau Allah majuka iman jemau Keristen.

⁵Alaka iluak, amun gegalau kamu pacak ngiciak basau rua, anyautu iluakla, amun kamu pacak ngiciakka katau Allah. Jemau diau ngiciakka katau Allah, begunaula diau sangkan jemau diau ngiciak basau rua, lain amun jemau diau ngiciak basau ruatu pacak meretika setu diau dikiciakkanyautu, supayau begunau batan endak gegalau jemau Keristen.

⁶Amun aku datang guak kamu ngan ngiciak basau rua, tuapau gunaunyau ngan kamu? Dikit kia nidau begunau, lain amun aku ngiciakka pengina'an jak di Allah ngan nerangka setu ceritau Allah, ngiciakka rencanau Allah ngan ngajagh.

⁷Misalau dandanan musik diau nidau benyawau luak seruling ngan kecapi, amun nidau belainan muniau, luak manau ngeruani lagu tuapau diau dimunika?

⁸Misalau pulau amun terumpit perang dimunika asal ajau, sapau ka bedandan endak beperang?

⁹Luak itu pulau amun kamu ngiciak basau rua: Amun kamu nidau makai katau diau jelas, nidau sughang kia pacak ngerti, setu diau kamu kiciakka. Kici'an kamu ka lengit ajau.

¹⁰Di deniauni banyak nian basau, tapitu nidau bediau sutiak kia diau nidau bereti.

¹¹Anyautu amun aku nidau ngerti basau, jemau diau ngiciak basautu jemau asing ngan aku. Mangku aku pulau jemau asing ngan diau.

¹²Luak itu pulau kamu: Nyela, kamu beusaha bulia kuasau Rua Allah, anyautu kamu mesti beusaha makaiau, supayau begunau batan endak jemau Keristen.

¹³Karnau itu jemau diau ngiciak basau rua mesti bedu'a, supayau diau pulau dienjuakka kuasau endak meretika setu diau dikiciakkanyautu.

¹⁴Amun aku bedu'a ngan basau rua, ruaku bedu'a, tapitu rupu'anku nidau bedu'a.

¹⁵Mangku tuapau diau mesti kukerjauka? Ini diau kukerjauka: Aku endak bedu'a ngan ruaku, tapitu aku pulau endak bedu'a ngan rupu'anku. Aku endak benyanyi ngan muji ngan ruaku, tapitu aku pulau endak benyanyi ngan muji ngan rupu'anku.

¹⁶Amun kamu beterimau-kasia ngan Allah ngan basau rua ajau, mangku jemau lain nidau pacak ngaminka du'a beterimau-kasia, karnau nidau terti setu diau kamu kiciakkatu.

¹⁷Empuak du'a terimau-kasia ngan Allah iluak nian, du'a itu nidau begunau ngan jemau.

¹⁸Aku beterimau-kasia ngan Allah, karnau akuni pacak ngiciak basau rua lebia jak di gegalau kamu.

¹⁹Anyautu amun jemau Keristen betunggal, galakla aku ngiciak limau katau diau jemau ngerti endak ngajagh ughangtu, sangkan aku ngiciak beribu-ribu katau makai basau rua.

²⁰Jangan kamu berupuak luak rupu'an budak keciak. Amun ngan keja'atan nengkela kamu luak budak keciak, tapitu rupu'an kamu mesti njadi luak rupu'an jemau besak.

²¹Di ukum Taurat ditulis luak ini, “Tuhan bekatau, ‘Jemau diau ngiciak basau Kuajung ngiciak ngan umatKu. Jemau asing Kuajung ngiciak katauKu. Empuak luak itu ughangtu enggup ndengagh kici'anKu.’ ”

²²Amun luak itu, kuasau pacak ngiciak basau rua itula tandau batan endak jemau diau nidau percayau, ukan batan endak jemau percayau. Mangku kuasau ngiciak katau Allah itula tandau batan endak jemau percayau, ukan batan endak jemau diau nidau percayau.

²³Misalau gegalau jemau Keristen betunggal, mangku bilang jemau ngiciak basau rua, mangku datang jemau diau nidau terti ngan jemau diau nidau percayau, cengki jemautu ka ngiciakka kamu gilau galau.

²⁴Anyautu amun gegalau kamu ngiciakka katau Allah, mangku datang jemau diau nidau terti ngan jemau diau nidau percayau, jemautu ka nyadari dusaunyau ngan diukum karnau gegalaunyau diau didengaghautu.

²⁵Gegalau resiau dalam atiau ka kina'an, mangku diau ka nunduak nyemba Allah ngan ngaku'i, “Nyela, Allah adau nian guak kamu.”

²⁶Luak manau mbak kini, ui kantin-kantinku? Amun kamu betunggal, adau diau nyanyi, adau diau ngajagh, adau diau ngiciakka pengina'an Allah, adau diau ngiciak basau rua, adau diau meretika kici'antu. Anyautu gegalaunyautu mesti dikerjauka, supayau begunau batan endak gegalaunyau.

²⁷Amun adau jemau diau endak ngiciak basau rua, nengkela duau ughang, sebanyak-banya'au tigau ughang, sejagh sughang, mangku mesti adau jemau diau meretikanyau.

²⁸Amun nidau bediau jemau diau pacak meretikanyau, jemau diau endak ngiciak basau ruatu tadi mesti diam. Nengkela diau ngiciak dalam atiau ajau ngan Allah.

²⁹Enangka duau apu tigau ughang ngiciakka katau Allah, penarau diau lain merupuakka setu diau dikiciakkatu.

³⁰Anyautu amun adau jemau lain diau duduak di situ bulia katau Allah, jemau diau ngiciak tadi mesti diam.

³¹Ngan carau luak itu gegalau kamu pacak ngiciakka katau Allah sejagh sughang, mangku kamu diajaghi galau ngan tamba percayau.

³²Kuasau ngiciakka katau Allah mesti dijagaui jemau diau ngiciaktu,

³³karnau Allah enggup kekacauan, tapitu Diau galak damai. Di manau-manau, amun jemau percayau betunggal,

³⁴jemau tinau mesti diam. Ughangtu nidau bulia ngiciak. Ughangtu mesti nunduak, luak itu ditulis di ukum Taurat.

³⁵Amun adau setu diau endak dikeruani, itu mesti ditanyaukanyau ngan lakiau di ghumahau, karnau nidau pantas, amun jemau tinau ngiciak di bada betunggal.

³⁶Apu katau Allah asalau jak di kamu? Apu ngan kamu ajau katau Allahtu dikiciakka?

³⁷Amun adau jemau meghasau pacak ngiciakka katau Allah ngan adau kuasau jak di Rua Allah, jemau itu mesti keruan, bansau setu diau kukiciakkatu perinta Tuhan.

³⁸Amun adau jemau diau enggup nerimaunyau, jangan kamu nerimau jemautu.

³⁹Mangku, kantin-kantinku, beusahala bulia kuasau ngiciakka katau Allah. Anyautu jangan negahi jemau ngiciak basau rua.

⁴⁰Tapitu gegalaunyau mesti dikerjauka iluak-iluak.