Read Central Malay 1 KURINTUS 16 Bible Online

1 KURINTUS 16 - Central Malay bible

1 KURINTUS 16

¹Ceritau kumpulan tanci diau ka dienjuakka ngan jemau Keristen diau adau di Yudia, kamu mesti ngerjaukanyau luak la kutunjuakka ngan jemau Keristen di Galatia.

²Idang aghi minggu gegalau kamu mesti ngasingka tanci sesughangan nurut pulian kamu. Penyapila tancitu enggut aku datang, mangku masau itu nidau nanti ditunggalka agi.

³Nanti amun aku la sampai, aku ka ngajung jemau diau kamu anggap pantas pegi ke Yerusalim mbatak surat, mangku ughangtu mbatak tanci kumpulantu ke Yerusalim.

⁴Mangku amun iluak, bansau aku pegi pulau, ughangtu pacak pegi serempak ngan aku.

⁵Aku endak berayak ngan kamu, udim aku ngidari Makedunia, karnau rencanauku endak lalu di situ.

⁶Asauku aku ka lamau mendam guak kamu, asauku selamau pangkau dingin. Mangku kamu pacak nulung aku melajuka pejalananku.

⁷Aku enggup cuman singga. Aku endak lamau berayak ngan kamu, amun Tuhan kenda'i.

⁸Aku ka mendam di Ipisus enggut aghi rerayau Pentakusta,

⁹karnau mbak kini banyak jalan tebukak batan endak ngerjauka kerjau diau penting, empuak adau banyak diau melawan.

¹⁰Amun Timutius datang, terimaula diau iluak-iluak, mangku diau riang guak kamu, karnau luak aku pulau diau bekerjau batan endak Tuhan.

¹¹Jangan adau diau nidau meregauinyau. Tulungla diau melajuka pejalanannyau ngulang guak aku ngan selamat. Aku nunggu diau datang serempak ngan kantin-kantin kitau diau lain.

¹²Amun ceritau kantin kitau Apulus, la rajin kuajung, supayau diau pegi berayak ngan kamu serempak ngan kantin-kantin diau lain. Anyautu diau lum endak pegi mbak kini. Nanti diau ka datang, amun diau kungang.

¹³Sepepadaula, percayaula ngan tegua, beghanikala diri kamu ngan maju kuat.

¹⁴Gegalaunyau diau kamu kerjauka, kerjaukala ngan sayang.

¹⁵Kamu cengki keruan Setipanus ngan denga-sana'au. Ughangtu jemau diau dulu sekali njadi Keristen di Akaya. Ngan ngenian ughangtu bekerjau nulung umat Allah.

¹⁶Aku ngajung kamu nian, supayau kamu nurut nian ajaghan jemau luak itu ngan jemau lainau diau bekerjau ngan diau ngenian.

¹⁷Aku riang, Setipanus, Purtunatus ngan Akaikus datang, karnau ughangtu nggenti kamu nulungi aku.

¹⁸Ughangtu meriangka atiku nian, luak itu pulau ati kamu. Jemau luak itu mesti diregaui nian.

¹⁹Adau pesan jak di jemau Keristen di perupinsi Asia. Akwila ngan Periskila ngan kantin kitau diau betunggal di ghumahau bepesan pulau ngan gegalau kamu.

²⁰Gegalau kantin di sini bepesan ngan kamu. Sangi pesankala sughang ngan diau lain ngan carau iluak.

²¹Aku namba pesanku diau kutulis ngan tangankuni, “Pesan jak di aku, Paulus.”

²²Jemau diau nidau nyayangi Tuhan Yesus nengkela diukum Allah. Maranata — Tuhan datangla!

²³Tuhan Yesus nyayangi kamu.

²⁴Aku pulau nyayangi gegalau kamu diau percayau ngan Yesus Keristus.