Read Central Malay 1 KURINTUS 2 Bible Online

1 KURINTUS 2 - Central Malay bible

1 KURINTUS 2

¹Kantin-kantinku, luak itu pulau, timpau aku datang guak kamu endak ngiciakka ngan kamu rencanau Allah, aku endiak ngiciak ngan katau pintar, nidau pulau makai kepintaran manusiau.

²Karnau masau aku guak kamu, aku la mutuska nidau endak ngeruani tuapau-apau, lain jak di Yesus Keristus, lagi pulau Diautu mati di kayu salip.

³Masau aku guak kamu, aku litak ngan gemetagh ketakutan.

⁴Ceritau diau kukiciakka ngan kamu nidau kukiciakka ngan katau kepintaran manusiau, anyautu ceritautu kukiciakka ngan carau diau mbuktika kuasau Rua Allah.

⁵Aku ngerjauka titu, supayau kamu percayau, ukan karnau asil kepintaran manusiau, tapitu karnau kuasau Allah.

⁶Empuak luak itu, ngan jemau diau la tegua imanautu nyela aku ngajaghka bepengertian, anyautu pengertiantu ukan pengertian deniau, ukan pulau jak di penguasau-penguasau deniauni, jemau diau kuasaunyau ka lengit.

⁷Pengertian diau kukiciakkatu pengertian jak di Allah. Pengertiantu nidau dikeruani deniau. Allah la nyediaukanyau batan endak keriangan kitau, antak ka deniau dijadikaNyau.

⁸Nidau sughang kia jak di penguasau mbak kini diau keruan pengertian itu, karnau amun ughangtu la ngeruaninyau, cengki ughangtu nidau makuka Tuhan diau agungtu di kayu salip.

⁹Luak itula diau ditulis dalam Injil, “Setu diau nidau kekela dikinak ngan didengagh manusiau, ngan nidau pulau kekela dirupuakka manusiau, titu disediauka Allah batan endak jemau diau nyayangiNyau.”

¹⁰Allah la ngajung RuaHau nyataukanyau ngan kitau, karnau Ruatu ngeruani gegalaunyau, lagi pulau rencanau Allah diau tebuni.

¹¹Diau ngeruani isi ati sughang jemau, rua jemau itula. Luak itu pulau ngan Allah, diau ngeruani isi ati Allah, Rua Allah itula.

¹²Kitau nidau nerimau rua deniau, tapitu Rua diau asalau jak di Allah, mangku kitau keruan gegalaunyau diau la dienjuakka Allah ngan kitau.

¹³Mangku, amun kami ngiciakka Allah ngan jemau diau adau Rua Allah, kami nidau ngiciakkaNyau nurut rupu'an jemau, tapitu nurut ajaghan Rua Allah.

¹⁴Jemau diau nidau bediau Rua Allah nidau pacak nerimau setu diau dinyatauka Rua itu. Jemau luak itu nidau pacak ngerti, karnau nganggap titu bigal, karnau titu cuman pacak dikeruani, amun diajagh Rua Allah.

¹⁵Jemau diau diajagh Ruatu pacak ngeruani reti gegalaunyau, anyautu diautu nidau pacak dikeruani sughang kiala.

¹⁶Di Injil ditulis, “Sapau keruan rupu'an Tuhan? Sapau pacak nasihatiNyau?” Anyautu kamini adau rupu'an Keristus.