Read Central Malay 1 KURINTUS 3 Bible Online

1 KURINTUS 3 - Central Malay bible

1 KURINTUS 3

¹Mangku aku, kantin-kantinku, aku nidau pacak ngiciak ngan kamu luak ngiciak ngan jemau diau adau Rua Allah. Anyautu aku cuman pacak ngiciak ngan kamu luak ngan jemau diau gi idup nurut serilau manusiau, luak gi kupiak dalam iman Keristen.

²Puan kuenjuakka ngan kamu senitu, ukan makanan jemau besak, karnau kamu lum pacak nerimaunyau. Mbak kini kamu lum pulau pacak nerimaunyau,

³karnau kamu gi idup nurut serilau manusiau. Amun kamu gi sengit ngan belagau sughang ngan diau lain, apu titu ukan mbuktika, bansau kamu masia dikuasaui serilau manusiau, gi idup luak jemau deniauni?

⁴Karnau adau diau ngiciak, “Aku anak-bua Paulus.” Adau diau ngiciak, “Aku anak-bua Apulus.” Apu titu ukan mbuktika, bansau kamu semegi ngan jemau deniauni diau nidau bediau Rua Allah?

⁵Sebenaghau sapau Apulus, sapau Paulus? Kamini cuman pekerjau Allah diau mbimbing kamu percayau ngan Keristus. Kami cuman ngerjauka tugas diau diajungka Allah ngan kami sesughangan.

⁶Aku nanam, Apulus ngayi'inyau, anyautu Allah itu diau numbuakanyau.

⁷Mangku diau nanam ngan diau ngayi'inyau nidau penting; diau pentingtu Allah, sangkanau Diau numbuakanyau.

⁸Diau nanam ngan diau ngayi'i semegi. Diau ka nerimau upa sesughangan nurut kerjaunyautula.

⁹Kamini semegi ajau bekerjau batan endak Allah. Kamuni umpamau umau Allah, kamu pulau umpamau ghuma Allah.

¹⁰Ngan pengertian diau dienjuakka Allah, aku luak tukang negakka ghuma la mbuat pelapiak batan endak ghuma itu, mangku jemau negakka ghuma di pucuak pelapiaktu. Bilang jemau mesti ngeruani, luak manau negak di pucu'autu.

¹¹Karnau nidau sughang kiala pacak mbuat pelapiak lain jak di diau la dibuat Allah, diautu Yesus Keristus.

¹²Adau diau negakka ghuma di pucuak pelapiaktu makai emas, pirak ngan permatau, madak kayu, ghumput ngan jeghami.

¹³Mangku kerjau bilang jemau ka kina'an, masau Keristus ngulang datang nanti, karnau ka dinyatauka ngan api. Aghi itu kerjau bilang jemau ka diuji ngan api, mangku keruan regaunyau.

¹⁴Amun kerjau sughang jemau ta'an, diau ka nerimau upa.

¹⁵Amun kerjaunyau mutung, diau ka rugi. Diautu ka diselamatka, anyautu luak jemau diau luput jak di api.

¹⁶Keruan ngan kamu, bansau kamu ghuma Allah? Mangku kamu bada Rua Allah.

¹⁷Amun adau jemau diau merusakka ghuma Allah, Allah pulau ka merusakka jemautu, karnau ghuma Allah itu suci. Kamunila ghuma Allahtu.

¹⁸Jangan sughang kia nipuka diriau. Amun adau jak di kamu diau meghasau pintar nurut deniauni, nengkela diau njadi bigal, mangku diau bepengertian nian.

¹⁹Setu diau dianggap deniau pintar dikiciakka Allah bigal. Dalam Injil ditulis, “Allah ngenangka manusiau tetangkap ngan kepintarannyau.”

²⁰Mangku adau agi ditulis luak ini, “Tuhan keruan rupu'an jemau diau pintar. Gegalaunyautu endiak begati.”

²¹Karnau itu jangan adau diau langguak karnau sughang jemau. Gegalaunyau la dienjuakka njadi hak kamu:

²²empuak Paulus, empuak Apulus, empuak Pitrus, empuak deniau, empuak idup, empuak mati, empuak masau mbak kini, empuak masau nanti; gegalaunyautu hak kamu.

²³Anyautu kamu hak Keristus ngan Keristus hak Allah.