Read Central Malay 1 KURINTUS 4 Bible Online

1 KURINTUS 4 - Central Malay bible

1 KURINTUS 4

¹Anggapla kami pekerjau Keristus diau dipercayauka ngiciakka rencanau Allah diau lum keruan ngan deniau.

²Diau penting, supayau pekerjautu pacak dipercayaui.

³Amun aku, nidau ngapau-ngapau, apu aku diakimi kamu, apu jemau lain. Aku pulau nidau ngakimi aku sendighi.

⁴Aku nidau meghasau besala, anyautu titu ukan mbuktika, bansau aku endiak besala. Tuhan itula ka netapka, apu aku besala apu nidau.

⁵Itula sebapau, jangan kamu cepat ngakimi jemau, amun lum masaunyau, antak ka Tuhan datang. Diautu ka nginakka gegalaunyau diau dibunika di keleman. Diau ka ngancakka gegalaunyau diau direncanauka dalam ati manusiau. Masau itula bilang jemau ka nerimau jak di Allah pujian diau pantas diterimau.

⁶Kantin-kantinku, katauku ini kukenauka ngan aku ngan Apulus njadi cuntau batan endak kamu, supayau kamu belajagh jak di kami tuapau reti kici'an ini: “Turutila peraturan diau adau.” Jangan adau di guak kamu jemau diau ninggika diau sughang ngan nginauka diau lain.

⁷Sapau njadika kamu lebia jak di jemau lain? Apu ukan gegalaunyau diau adau di kamu kamu terimau? Ngapau kamu geduak, luak setu diau adau di kamutu ukan jak di Allah?

⁸Nyela, kamu la puas, nidau endak tuapau-apau agi. Kamu la kayau, la njadi rajau, kami nidau. Alaka ilu'au, amun kamu la njadi rajau nian, mangku kami pulau pacak njadi rajau ngan kamu.

⁹Nurut pendapatku, ngan kami diau la njadi rasul Allah ngenjuakka bada diau inau sekali, luak jemau diau la diukum mati, mangku kami la njadi tuntunan deniau, malaikat ngan manusiau.

¹⁰Karnau Keristus kamini bigal, kamutu pintar; kami litak, kamu kuat; kami digelakka, kamu dipuji.

¹¹Enggut mbak kini kami kelapaghan ngan keausan. Baju kami, baju jarit di badannila. Kami dilagaui, kami nidau bebada.

¹²Kami mbanting tulang. Amun kami didawaika, kami mbalaska ngan du'a. Amun kami disaraui, kami ngaligh.

¹³Amun jemau ngarutka kami, kami nimbal ngan katau iluak. Kami nidau lebia jak di sesara deniau, luak kapaghan enggut mbak kini.

¹⁴Aku nuliska ini ukan endak maluka kamu, anyautu endak ngajagh kamu luak anakku diau kusayangi.

¹⁵Empuak kamu beribu-ribu guru, bak kamu cuman sughang. Akunila bak kamu, karnau aku ngiciakka ceritau Keristus ngan kamu senitu, mangku kamu percayau.

¹⁶Karnau itu aku ngajung kamu menau aku.

¹⁷Itula sebapau aku ngajung Timutius guak kamu. Diautu anakku dalam Keristus diau kusayangi ngan pacak dipercayaui. Diau ka ngingatka kamu carau idupku ngikut Yesus Keristus, carau diau kuajaghka ngan jemau Keristen di manau kila.

¹⁸Adau bebeghapau jemau jak di kamu diau la geduak. Ughangtu sangkau, aku nidau agi ka datang guak kamu.

¹⁹Amun Tuhan ngenda'i, nidau lamau agi aku ka datang guak kamu, mangku aku ka ngeruani kuasau jemau geduaktu, ukan cuman kici'annyau ajau.

²⁰Karnau amun Allah njadi rajau dalam idup sughang jemau, titu dikeruani ngan kerjaunyau ukan ngan kici'annyau ajau.

²¹Kamu endak luak manau? Apu kamu ngenda'i aku datang mbatak pemecit, apu kamu ngenda'i aku datang ngan sayang ngan sabar?