Read Central Malay 1 KURINTUS 7 Bible Online

1 KURINTUS 7 - Central Malay bible

1 KURINTUS 7

¹Mbak kini aku endak ngiciakka setu diau la kamu tulis dalam surat kamu. Nyela, itu iluak, amun jemau lanang nidau bebunting.

²Anyautu, supayau nidau teguda, iluakla bilang lanang adau biniau ngan bilang tinau adau lakiau.

³Lakiau mesti ngerjauka diau pantas ngan biniau. Luak itu pulau biniautu mesti ngerjauka diau pantas ngan lakiau.

⁴Biniau nidau bekuasau di badanau, diau bekuasau itu lakiau. Luak itu pulau lakiau nidau bekuasau di badanau, diau bekuasau biniau.

⁵Jangan kamu beceghai sughang ngan diau lain. Bulia amun jerang ajau, amun tetuju galau, supayau pacak bedu'a. Udim itu kamu mesti ngulang seghundak, supayau jangan diguda iblis, karnau nidau pacak na'ani serilau.

⁶Diau kukiciakka ini ukan perinta, tapitu petua ajau.

⁷Empuak luak itu, iluakla, amun bilang ughang semegi ngan aku. Anyautu bilang ughang la dienjuakka Allah carau sesughangan. Diau sughang caraunyau luak ini, diau sughang caraunyau luak itu.

⁸Ngan jemau diau lum nika ngan diau la randau kukiciakka, iluakla kamu maju nyughang luak aku.

⁹Anyautu, amun diau nidau pacak na'an serilau, iluakla diau nika. Karnau iluakla nika, sangkan rusak ngan serilau.

¹⁰Jemau diau la nika aku merintaka, — sebenaghau ukan aku merinta tapitu Tuhan, — sughang bini jangan ninggalka lakiau.

¹¹Amun diau ninggalkanyau, diau nidau bulia belaki agi, amun ukan ngulang ngan lakiau tadi. Sughang laki nidau bulia nyagha'i biniau.

¹²Ngan diau lain aku ngiciakka luak ini — ini katauku, ukan katau Tuhan — amun jemau Keristen la bebunting ngan jemau diau nidau percayau mangku buntingautu tetuju idup ngan diau, tinau itu jangan disagha'i.

¹³Mangku amun adau jemau tinau diau Keristen la belaki ngan jemau diau nidau percayau mangku lakiau endak idup ngan diau, jangan lanangtu ditinggalka.

¹⁴Laki diau lum percayau njadi pantas di adapan Allah, karnau diau nika ngan biniau diau la njadi hak Allah. Luak itu pulau bini diau lum percayau njadi pantas di adapan Allah, karnau diau nika ngan lakiau diau la njadi hak Allah. Amun ukan luak itu, anak ughangtu luak anak jemau kapir, awuak anaktu njadi pantas di adapan Allah.

¹⁵Anyautu, amun jemau diau nidau percayau endak ninggalka lakiau apu biniau diau Keristen, nengkela. Ngan luak itu kamu bibas, karnau Allah endak kitau idup bedamai.

¹⁶Kamu bini diau percayau apu kamu keruan, bansau kamu nidau ka pacak nyelamatka laki kamu? Mangku kamu laki diau percayau apu kamu keruan, bansau kamu nidau ka pacak nyelamatka bini kamu? Cengki nidau!

¹⁷Bilang jemau mesti maju idup luak la ditetapka Tuhan ngan diau, luak masau diau empai percayau ngan Allah. Inila peraturan diau kukiciakka ngan gegalau jemau Keristen.

¹⁸Misalau adau jemau la besunat masau diau empai percayau ngan Allah, jangan diau ncubau melengitka tandau besunattu. Luak itu pulau amun adau jemau diau lum besunat masau diau empai percayau ngan Allah, nidau nanti mintak disunat.

¹⁹Besunat ngan nidau besunat nidau penting. Diau penting nuruti perinta Allah.

²⁰Iluakla bilang jemau maju idup, luak masau diau empai percayau ngan Allah.

²¹Amun kamu budak masau kamu empai percayau, nidau ngapau-ngapau. Anyautu amun kamu pacak bibas, gunaukala titu.

²²Karnau budak diau percayau ngan Tuhan njadi jemau bibas karnau Tuhan. Mangku jemau bibas diau percayau ngan Keristus njadi buda'Au.

²³Kamu la dibeli, regaunyau la dibayighi galau. Karnau itu, jangan kamu njadi budak manusiau.

²⁴Jadi, luak manau pulau kamu masau empai percayau ngan Allah, luak itula kamu pulau maju idup ngan Allah.

²⁵Mbak kini ceritau jemau diau lum nika. Ceritau ughangtu nidau bediau perinta Tuhan. Anyautu karnau pengertian jak di Tuhan ngan aku, aku endak ngiciakka pendapatku diau pacak dipercayaui.

²⁶Nginak kemada'an masau ini, iluakla amun jemau maju idup luak mbak kini.

²⁷Misalau kamu diau la bebunting, jangan nyagha'inyau. Amun kamu lum bebunting, sualapau nidau nanti bebunting.

²⁸Anyautu amun kamu nika, ukan dusau. Luak itu pulau amun budak gadis nika, ukan bedusau. Anyautu jemau diau nika banyak meghasauka penanggungan di deniauni, mangku aku endak supayau jangan kamu banyak meghasauka penanggungan luak jemau diau la nikatu.

²⁹Maksudku luak ini: Masaunyau la pandak. Mangku mulai mbak kini jemau diau bebunting mesti idup luak nidau bebunting.

³⁰Jemau diau nangis luak nidau nangis, jemau diau tetawau luak nidau riang, jemau diau la mbeli luak nidau bediau tuapau-apau.

³¹Mangku jemau diau pansan ngerjauka kerjau deniau luak nidau ngerjaukanyau, karnau deniauni nidau ka lamau agi.

³²Aku endak, supayau kamu nidau ghegak. Jemau diau nidau bebunting, musatka rupu'annyau ngan Tuhan, karnau diau endak melemakka ati Tuhan.

³³Jemau diau la bebunting, banyak merupuakka deniau, karnau endak melemakka ati buntingau.

³⁴Mangku rupu'annyau tebagi-bagi. Sughang tinau diau nidau belaki ngan budak gadis ka merupuakka kerjau Tuhan, karnau diau endak, supayau gegalau idupau njadi hak Allah. Tinau diau la belaki banyak merupuakka deniauni, karnau endak melemakka ati lakiau.

³⁵Gegalaunyautu kukiciakka batan endak keilu'an kamu, ukan nidau ngajung itu-ini, tapitu supayau ngerjauka setu diau benagh ngan iluak, mangku kamu pacak musatka rupu'an kamu ngan Tuhan.

³⁶Amun adau jemau meghasau nidau pantas ngan gadisau, karnau la tamba tuau, amun diau nidau pacak na'ani serilau ngan meghasau endak nika nian, nengkela ughangtu nika, amun diau endak. Itu ukan dusau.

³⁷Anyautu amun adau jemau diau la mutuska dalam atiau nidau ka nika, amun nidau dipasau ngan pacak na'ani serilau, mangku nidau nika, jemau itu bebuat iluak.

³⁸Jadi, jemau diau nika iluak kerjaunyau, jemau diau nidau nika lebia iluak agi kerjaunyau.

³⁹Bini tekungkung ngan lakiau selamau lakiautu gi idup. Amun pengantinannyau la mati, diau bibas nika ngan sapau kila diau endak, asal jemau itu jemau percayau.

⁴⁰Anyautu amun pendapatku, riangla tinau itu nidau nika agi. Mangku aku kirau setu diau kukiciakkatu kukiciakka ngan kuasau Rua Allah.