Read Central Malay 1 KURINTUS 9 Bible Online

1 KURINTUS 9 - Central Malay bible

1 KURINTUS 9

¹Apu ukan aku jemau bibas? Ukan aku rasul? Apu aku lum nginak Yesus, Tuhan kitau? Apu ukan kamu asil kerjauku batan endak Tuhan?

²Empuak jemau lain nidau endak ngaku'i aku rasul, cengki kamu ngaku'i aku rasul, karnau idup kamu jemau Keristen mbuktika, bansau aku rasul.

³Amun jemau diau nyalaka aku, aku nimbali luak ini:

⁴Apu aku nidau behak dienju'i makanan karnau kerjauku?

⁵Apu aku endiak behak mbatak bunting diau Keristen serempak bejalan ngan aku, luak diau dikerjauka rasul lain ngan ading-beghading Tuhan Yesus ngan Pitrus pulau?

⁶Apu cuman ughangtu diau behak nidau nanti kerjau batan endak pengidupan? Apu Barnabas ngan aku nidau pacak?

⁷Manau ka adau tentera diau dang beperang makai tanciau sendighi? Manau ka adau jemau diau nanam kebun anggur, mangku nidau makan asilau? Manau ka adau jemau diau nyayia bebiri, mangku nidau minum puan bebiritu?

⁸Katauku ini ukan cuman rupu'an manusiau ajau. Ukum Taurat ngiciakkanyau pulau.

⁹Di ukum Musa ditulis luak ini, “Jangan kamu nyempal mulut sapi diau dang ngighiak gendum.” Apu sapi diau Allah kiciakka?

¹⁰Apu ukan itu ditulis batan endak kitau? Nyela, batan endak kitau. Jemau diau njawat ngan jemau diau ngighiak ngerjaukanyau ngan ngaghapka bulia bagian asil kerjaunyau.

¹¹Kami la ngamburka benia ruhani dalam idup kamu. Apu ka banyak igau, amun kami mintak bagian asil deniau jak di kamu?

¹²Amun jemau lain behak ngaghapka titu jak di kamu, cengki kami lebia behak jak di ughangtu. Anyautu kami lum nggunauka hak itu. Iluakla aku nanggungka gegalaunyau sangkan ngengalangi ceritau iluak jak di Keristus.

¹³Cengki kamu keruan, bansau jemau diau bekerjau di Ghuma Allah bulia makanan jak di Ghuma Allah. Jemau diau ngurus bada bekerban bulia bagian jak di kerban itu.

¹⁴Luak itu pulau Tuhan la netapka, bansau jemau diau ngiciakka ceritau iluak pantas bulia pengidupan jak di kerjaunyautu.

¹⁵Anyautu lum kekela aku makai hakku itu. Aku nulis titu, ukan supayau titu dikerjauka ngan aku mbak kini. Iluakla aku mati sangkan kelengitan setu diau kubanggakatu.

¹⁶Karnau amun aku ngiciakka ceritau iluak, nidau bediau tanggua endak mbanggaka diri, karnau titu mesti kukerjauka. Celakaula aku, amun nidau ngiciakka ceritau iluaktu.

¹⁷Misalau aku ngerjaukanyau ngan kendakku sendighi, nyela aku behak nerimau upa. Anyautu aku ngerjauka titu karnau kewajibanku. Aku diajung Allah batan endak ngerjaukanyau.

¹⁸Amun luak itu, tuapau upaku? Inila upaku: Aku pacak ngiciakka ceritau iluak nidau mintak diupa, karnau nidau makai hakku, amun ngiciakka ceritau iluak.

¹⁹Aku ukan budak jemau, aku bibas. Empuak luak itu, aku njadika diriku budak gegalau jemau, supayau aku pacak banyak menangka jemau batan endak Keristus.

²⁰Ngan jemau Yahudi aku luak jemau Yahudi, mangku pacak menangka jemau Yahudi batan endak Keristus. Ngan jemau diau idup nurut ukum Taurat, aku njadi luak jemau diau idup nurut ukum Taurat, empuak aku sebenaghau nidau mesti nuruti ukum Taurattu, supayau pacak menangka ughangtu batan endak Keristus.

²¹Luak itu pulau ngan jemau diau nidau idup nurut ukum Taurat, aku luak jemau diau nidau idup nurut ukum Taurat. Itu nidau bereti, aku idup di luagh ukum Allah, karnau aku idup nurut ukum Keristus. Aku ngerjauka titu, supayau pacak menangka ughangtu batan endak Keristus.

²²Ngan jemau diau nidau tegua imanau, aku pulau luak jemau diau nidau tegua iman, mangku pacak menangka ughangtu batan endak Keristus. Aku njadi gegalaunyau batan endak gegalau jemau, supayau ngan carau manau ajau aku pacak nyelamatka bebeghapau jak di ughangtu.

²³Gegalaunyautu kukerjauka karnau ceritau iluak jak di Allah, supayau aku bulia bagian jak di Allah.

²⁴Kamu la keruan, bansau tanding belaghi gegalau angguta ngikut belaghi, anyautu cuman sughang bulia adia. Karnau itu belaghila nian, mangku kamu bulia adiahautu.

²⁵Bilang tukang main diau ngikut betanding mesti maju na'an diriau. Jemautu ngerjauka titu endak bulia adia diau nidau ka lamau. Anyautu kitau na'an diri, karnau endak bulia adia diau ta'an lamau.

²⁶Itula sebapau aku belaghi adau tujuan. Lagi pulau aku nidau ninju asal ajau.

²⁷Aku melatia badanku enggut nguasaui gegalaunyau, supayau udim ngiciakka ceritau iluak ngan jemau lain, jangan akuni nidau diterimau.